InfoHub Logo

گولوۆكين گەنناديي  — قازاقستاندىق كاسىپقوي بوكسشى، ورتا سالماقتا ونەر كورسەتەدى. ورتا سالماقتاعى الەم چەمپيونى (IBO تۇجىرىمى، 2010 - ق.ۋ؛ WBA تۇجىرىمى، 2011 - ق.ۋ؛ ۋاقىتشا WBC، 2014 - ق.ۋ IBF تۇجىرىمى، 2015-ق.ۋ). The Ring جۋرنالىنا سايكەس P4P سالماق دارەجەسىنە قاراماستان ۇزدىك بوكسشىلاردىڭ ۇشتىگىنە كىرەدى. 2013 جىلدىڭ سوڭىندا WBA تۇجىرىمى بويىنشا، ورتا سالماق دارەجەسىندەگى قازاقستاندىق سۋپەرچەمپيون گەنناديي گولوۆكين بەدەلدى امەريكاندىق USA Today باسىلىمىنىڭ نۇسقاسى بويىنشا، «جىل بوكسشىسى» اتانعان بولاتىن.

قازىرگى ۋاقىتتا، قازاق ەلىنىڭ ءبىرتۋار، قايتالانباس تۇلعاسى، بەلگىلى سپورتشى گەنناديي گولوۆكيندى بىلمەيتىن جان كەمدە-كەم شىعار. كەزىندە اۋەسقوي بوكستا قازاقستان نامىسىن الەم جانە وليمپيادا ويىندارىندا ابىرويلى قورعاي بىلگەن بوكسشى- قازىرگى تاڭدا ەلىمىزدىڭ اتىن كاسىپقوي دەڭگەيدە بۇكىل الەمگە تانىتىپ ءجۇر دەسەك، ارتىق ايتقاندىق ەمەس. كاسىپقوي بوكستا 34 كەزدەسۋ وتكىزىپ، بارىندە جەڭىس تۋىن تىككەن GGG-اتاقتى مايك تايسوننىڭ نوكاۋت جونىنەن رەكوردتىق كورسەتكىشىن جاڭالادى. بۇل دەگەنىڭىز، سوڭعى 21 كەزدەسۋدىڭ بارلىعىن نوكاۋتپەن اياقتادى دەگەن ءسوز. ال، سوناۋ 1992 جىلى يسلام ءدىنىن قابىلداعان مايك تايسوندا بۇل كورسەتكىش- تەك 18 نوكاۋت قانا. امەريكالىقتىڭ اسا اۋىر سالماقتا ونەر كورسەتكەنىن ەسكەرسەك، بۇل جەتىستىكتىڭ تەڭدەسسىز ەكەنىنە كوزىڭىز جەتە تۇسەدى. سەبەبى، اۋىر سالماقتاعى بوكسشىلار، ورتا سالماققا قاراعاندا، سالماعىنا بايلانىستى ءجيى نوكاۋتقا ۇشىرايدى. 

دەسە دە، سوڭعى ۋاقىتتارى ءبىزدىڭ بوكسشىعا لايىقتى قارسىلاس تابۋ قيىننىڭ قيىنىنا اينالىپ ءجۇر. نەگىزىندە، كاسىپقوي بوكستا بارشانىڭ كوز تىگەتىن 4 نەگىزگى  بەلدىك بار. بۇلار  تانىمال  -WBA(World Boxing Association) ، WBC(World Boxing Council)، WBO(World Boxing Organization ) جانە IBF(International Boxing Federation) ۇيىمدارىنىڭ بەلدىكتەرى. وسى تورتەۋىن بىرىكتىرگەن بوكسشىلار- نەكەن ساياق. قازاقستاندىق چەمپيوننىڭ ناعىز تانىمال تولىققاندى چەمپيونعا اينالۋى ءۇشىن، اتالمىش بەلدىكتەردى باعىندىرۋىن زامان تالاپ ەتىپ وتىر. ءبىزدىڭ ويىمىزشا، گولوۆكيننىڭ العا قويعان ماقساتى - وسىعان كەپ سايادى. قازىرگى كەزدە، گەنا - WBA مەن IBF تۇجىرىمدارى بويىنشا نەگىزگى چەمپيون. دەمەك، جولدىڭ جارتىسى ءجۇرىلىپ ءوتتى دەگەن ءسوز. قالعان 2 بەلدىكتى يەلەنۋ قيىن ەمەستەي كورiنگەن. الايدا، قىزىقتىڭ ءبارى وسى جەردەن باستالادى. WBO تۇجىرىمى بويىنشا، چەمپيوندىق اتاقتى يەلەنۋ مۇمكىندىگى 2-3 اي بۇرىن بەرىلگەندەي بولاتىن. وسى تۇجىرىم بويىنشا، بۇرىنعى چەمپيون ەندي لي گەنامەن كەزدەسۋگە ەرەكشە قۇلشىنىس تانىتقان ەدى.  دەگەنمەن ، مۇنىڭ الدىندا يرلاندىق بوكسشى ءوز وتانداسى بيللي دجو سوندەرسپەن جۇدىرىقتاسىپ، كۇتپەگەن جەردەن جەڭىلىس تاپتى. كوپتەگەن بوكس ماماندارىنىڭ پىكىرىنشە، ەگەر وسى كەزدەسۋدە ەندي لي جەڭگەندە، گەنناديي گولوۆكينمەن قولعاپ ءتۇيىستىرۋى شەشىلگەن ماسەلە بولاتىن. ەندىگى كەزەك، سۋ جاڭا چەمپيون دجو سوندەرسپەن كەلىسسوز جۇرگىزۋ ءۇشىن گەنا مەن ونىڭ كومانداسى ارنايى انگلياعا ات باسىن بۇردى. قازاق چەمپيونىنىڭ تانىمالدىلىعىن ۆەست حەم قالاسىنداعى ستاديوندا وتكەن فۋتبول ماچىندا اعىلشىن جانكۇيەرلەرىنىڭ قالاي قارسى العانىنان بايقاۋعا بولادى. وكىنىشكە وراي، كەلىسسوزدەر ناتيجەسىز بولدى. شەتەلدىك ءباسپاسوزدىڭ مالىمەتىنە سۇيەنسەك ، سوندەرس ۇلكەن سومادا اقشا تالاپ ەتكەن كورىنەدى. اتاپ ايتقاندا، باقانداي 6 ملن دوللار. ءتىپتى، گولوۆكيننىڭ كومانداسى ۇسىنعان 4 ءملن-دى مىسە تۇتپاپتى. قىسقاشا ايتقاندا، يرلاندتىق بوكسشى قازاقتىڭ جويقىن كۇشىنە توتەپ بەرە الماسىن ءبىلىپ، كەزدەسۋدەن ءۇزىلدى كەسىلدى باس تارتتى. كەلەسى كەزەكتە ، WBC تۇجىرىمى بويىنشا تولىققاندى چەمپيوندىق اتاقتى يەلەنۋ تۇردى. ەسكە سالا كەتەيىك، بۇل تۇجىرىم بويىنشا، GGG ۋاقىتشا چەمپيوندىق اتاقتى ۇزاق ۋاقىت بويى وزىندە ساقتاپ كەلە جاتىر. ابسوليۋتتىك چەمپيون بولۋ ءۇشىن، مەكسيكالىق ساۋل الۆارەسپەن جۇدىرىقتاسۋ نيەتىن گەنناديي ەشقاشان جاسىرعان ەمەس. ءتىپتى، بۇل ءۇشىن الۆارەستىڭ نامىسىن جىرتىپ جۇرگەن Golden Boy كومپانياسىمەن كەلىسىمگە كەلگەندەي بولدى. اتاپ ايتقاندا، الۆارەس پەن گولوۆكين ءوزارا كەزدەسۋدىڭ الدىندا ەرىكتى تۇردە ءبىر-بىر كەزدەسۋدەن وتكىزۋى ءتيىس ەدى. اتاقتى وسكار دە لا حوييانىڭ ءوزى  قىركۇيەك ايىندا ساۋل توبەلەسكە تولىق دايىن بولادى دەپ سەندىردى. دەگەنمەن، بۇل ۋادەنىڭ ىسكە اساتىنىنا سەنىم از. سەبەبى، قازىرگى كاسىپقوي بوكستا اقشا مەن ساياسات العاشقى ورىنعا شىعىپ كەتتى دەگەن پىكىرلەر ءجيى ايتىلىپ ءجۇر. مۇنىمەن تولىقتاي كەلىسۋگە بولادى. 

شىندىعىندا، قازىرگى تاڭدا، گولوۆكينمەن جۇدىرىقتاسۋعا جۇرەگى داۋلايتىن ەرلەر كەمدە-كەم. جويقىن سوققىلار استىنا ءتۇسىپ قالۋعا قورقاتىن باتىر-سىماقتار ، كەزدەسۋدى بارىنشا كەيىنگە شەگەرۋ ءۇشىن، ءارتۇرلى قيتۇرقى سىلتاۋلارمەن قاشىپ قۇتىلۋدا. گولوۆكيننىڭ جاسى 34 - تە ەكەنىن ەسكەرسەك، جىل وتكەن سايىن بەلسەندىلىكتىڭ ازايىپ، جاس كەلگەن سايىن كۇش-قۋاتتىڭ سارقىلاتىنى جاسىرىن ەمەس. سوندىقتان، ۋاقىتتى بارىنشا ءتيىمدى پايدالانىپ، ۇلى چەمپيوندار قاتارىنا قوسىلۋ ءۇشىن گولوۆكينگە 3 جولدىڭ ءبىرىن تاڭداۋىنا تۋرا كەلەدى.

1 جول.  
1 ورتا سالماققا ءتۇسىپ، اتاقتى فلويد مەيۆەزەرمەن شايقاسۋ. مەيۆەزەر - امەريكالىق بوكسشى، تابىسى جونىنەن الەمنىڭ ءنومىرى ءبىرىنشى سپورتشىسى. بۇل بوكسشىمەن جۇدىرىقتاسۋ - ءار بوكسشىنىڭ ارمانى. گولوۆكين بىرنەشە رەت تەك مەيۆەزەرمەن كەزدەسۋ ءۇشىن، ءبىر سالماق تومەن تۇسەتىنىن جاريالاعان بولاتىن. سوندىقتان، بارلىعىنا قول سىلتەپ، فلويد مەيۆەزەرمەن كەلىسىمگە كەلۋدىڭ جولىن ىزدەۋ كەرەك. از كۇن بۇرىن، امەريكالىقتىڭ اسا ۇلكەن گونورار ءۇشىن  بوكسقا قايتا ورالۋى مۇمكىن ەكەندىگىن جەتكىزگەنىن ەسكەرسەك، تەمىردى قىزعان كەزدە سوعۋدىڭ رەتى كەلگەن سياقتى.

2 جول.
سۋپەرورتا سالماققا كوتەرىلىپ، باسەكەگە ءتۇسۋ. گولوۆكيندى سىنعا الۋشىلاردىڭ نەگىزگى بولىگى-ونىڭ وسى ۋاقىتقا دەيىن ناعىز مىقتى قارسىلاسپەن جولىقپاعانىن ايتادى.ەگەر ، ءبىر سالماق جوعارى كوتەرىلسە، “سەن تۇر مەن اتايىن“ دەيتىن ەرلەر جەتىپ ارتىلادى. بۇلاردىڭ كەيبىرەۋلەرى-اعىلشىن ديگەيل مەن كارل فروچ، نەمىس ارتۋر ابراحام، مەكسيكالىق چاۆەس، پولشالىق فانفارا جانە ت.ب  ناعىز اتاق پەن تانىمالدىلىقتىڭ تەك مىقتىلارمەن جۇدىرىقتاسۋ ارقىلى كەلەتىنى بەلگىلى. سوندىقتان، كوزدى جۇمىپ، جوعارى قاراي سالماعىن اۋىرلاتۋى بەك مۇمكىن. ناعىز چەمپيوندىق اتاققا قول جەتكىزۋ ءۇشىن، امەريكا اتتى قۇرلىقتىڭ تۇرعىندارىن مويىنداتۋ كەرەك.

3 جول.
كومانداسىن اۋىستىرۋ. جاسىراتىنى جوق، گولوۆكيننىڭ پروموۋتەرى توم لەفلەر جامان مەنەدجەر ەمەس. بىلايشا ايتقاندا، ورتاقول. ال، ناعىز چەمپيونعا ەل حەيمون، بوب ارۋم سياقتى ابىرويلى پروموۋتەر قاجەت. وسى ۋاقىتقا دەيىن، ناعىز چەمپيوندىق كەزدەسۋ ۇيىمداستىرۋ قيىننان قيىستىراتىن مامان ءۇشىن اۋىر ءىس ەمەس.

قازىرگى تاڭدا، گەنناديي گولوۆكين بالشىققا باتىپ، شىعا الماي تۇرعان سايگۇلىكتى ەلەستەتەدى. جاقىندا 23 ساۋىرگە بەلگىلەنگەن امەريكالىق دومينيك ۋەيدپەن كەزدەسۋى وسىنىڭ ايقىن دالەلى. ۋەيد سەكىلدى ورتانقول اتلەتتەر الەمدە جەتىپ ارتىلادى. باسقاشا ايتقاندا، گولوۆكيننىڭ تىرناعىنا تاتىمايتىن قارسىلاس. بۇل كەزدەسۋدى قىران مەن قارعانىڭ  ايقاسىنا بالاۋعا بولادى. امەريكالىق بوكسشى - ءۇيدىڭ اينالاسىنان شىعا الماي، تەك وسال قارسىلاستارمەن قولعاپ ءتۇيىستىرىپ جۇرگەن ۇيكۇشىك سپورتشى. 18 كەزدەسۋدىڭ كوبىن ءالسىز بوكسشىلارمەن وتكىزىپ، باسىم بولىگىن تورەشىلەردىڭ شەشىمى ارقىلى ۇتقان. بۇل سياقتى قارسىلاسپەن جۇدىرىقتاسۋ مىندەتتى ەمەس. سوندىقتان، ناعىز تاڭداۋ جاساۋدىڭ ۋاقىتى كەلگەن سياقتى.

 

اۆتورى: ەربولات وستەمىر 

---