InfoHub Logo

«امازون» كومپانياسىنىڭ يەسى دجەفف بەزوس ونىڭ اەروعارىشتىق كومپانياسى ءبىر جىل بويى قۇپيا تۇردە جاساپ كەلگەن ادامدى ايعا ۇشىرۋعا ارنالعان اپپاراتتىڭ ماكەتىن قالىڭ بۇقارانىڭ نازارىنا ۇسىندى. بەزوستىڭ ايتۋىنشا، Blue Moon («كوگىلدىر اي») ءمودۋلى — باسقا عالامشارلارعا كوش تۇزەۋ جولىنداعى العاشقى قادام.

بەزوس ءۇشىن جەردىڭ بولاشاعى كۇنىلگەرى بەلگىلەنىپ قويعان. ءار جىل سايىن رەسۋرستار ازايىپ جاتىر جانە عارىشتىق كولونيزاسيانىڭ اۋىلى الىس ەمەس. «امازون» يەسى اتاقتى فيزيك دجەرارد و'ءنيلدىڭ كونسەپسياسىن نەگىز رەتىندە العان. بەزوس ول كونسەپسياعا پرينستوندا جۇرگەندە قىزىعا باستاعان ەدى. بەزوس قالالاردى، وندىرىستىك نىسانداردى، ءتىپتى ۇلتتىق قورىقتاردى ورنىقتىرۋعا بولاتىن دەربەس تىرشىلىك ورتالارىن قۇرۋعا كىرىسپەكشى.  

بەزوس عالامشارلاردى ىشكى جاعىندا جاساندى گراۆيتاسيا تۇزىلەتىن كەۋەك «لەنتالارمەن» شىرماپ تاستاۋدى ۇسىنادى. سوعان ۇقساس بىردەڭە «ينتەرستەللار» فيلمىندە كورسەتىلگەن بولاتىن. وسىنداي قالالاردىڭ ءارقايسىسىندا ءوزىنىڭ كولىك جۇيەسى، ينفراقۇرىلىمى جانە ءتىپتى اۋىل شارۋاشىلىعى بولادى. وعان قوسا، جاساندى قالالاردا جەر سىلكىنۋى، داۋىلدار، سۋناميلار سياقتى كاتاكليزمدەر بولمايدى. قازىرگى ادامداردى وزگە عالامشارلارعا قونىس اۋدارۋدان ساناۋلى عانا بۋىن ءبولىپ تۇر. دجەفف بەزوس ءقازىر ونىڭ مىندەتى — عارىشقا اپاراتىن «جول» سالۋ ەكەنىن باسا ايتتى. جانە دە ونىڭ Blue Moon جوباسى — ەڭ العاشقى ماڭىزدى قادام. 

---