تۇركىستانداعى مەكتەپتەردىڭ بىرىندە جاڭا وقۋ ماۋسىمى اتىسپەن باستالدى
جاڭا وقۋ جىلى تۇركىستاندىق مەكتەپتەردىڭ ءبىرى ءۇشىن توتەنشە جايتپەن باستالدى. 2 قىركۇيەك كۇنى جوعارعى سىنىپ وقۋشىلارى ءوزارا ەرەگىسىپ، مۇنىڭ سوڭى اتىسپەن اياقتالعان. بۇزاقىلاردىڭ اراسىندا مەكتەپتى بۇرىنىراق ءبىتىرىپ كەتكەندەرى دە بار. ولار ۇستالىپ، ءقازىر سوتقا دەيىنگى تەرگەۋ امالدارى باستالىپ كەتتى.
جەگىلىكتى TVK تەلەارناسىنىڭ حابارلاۋىنشا، اتىس سالدارىنان ءۇش بالا جاراقات الىپ، اۋرۋحاناعا جەتكىزىلگەن. ۇشەۋىنە دە وق ءتيىپتى، قازىرگى جاعدايلارى تۋرالى اقپارات جوق. پوليسەيلەر بولسا وسى ىسكە قاتىسى بار ەكى كۇدىكتىنى ۇستاعان.
«توبەلەستەن كەيىن دەرەۋ 15 جاستاعى بەكجان باقداۋلەت ەسىمدى وقۋشى ۇستالدى. ودان زاتتاي ايعاق رەتىندە 16 كاليبرلى اڭشى مىلتىعى تاركىلەنىپ الىنعان. "بۇزاقىلىق" دەرەگى بويىنشا قىلمىستىق ءىس قوزعالىپ، تەرگەۋ امالدارى ءجۇرىپ جاتىر. ەكىنشى كۇدىكتى — 18- جاستاعى ءدىنيسلام راۋشانبەك. پوليسەيلەر ودان تراۆماتيكالىق تاپانشا تاركىلەپ الدى. "زاڭسىز قارۋ-جاراق ساقتاۋ" دەرەگى بويىنشا قىلمىستىق ءىس قوزعالدى. ورىن العان وسى جايتتان كەيىن قالادا جاپپاي الدىن الۋ شارالارىن باستاپ كەتتىك»،- دەيدى تۇركىستان قالالىق ءىىب باسشىسى باھادىر بيتۇرسىنوۆ.
ايتا كەتەيىك، سوڭعى 8 ايدا تۇركىستاندا جاسوسپىرىمدەر قولىمەن جاسالعان 9 قىلمىس تىركەلگەن. پوليسەيلەر ولاردىڭ بارلىعىنىڭ اشىلعانىن ايتىپ وتىر.
اقپارات كوزى: Sn.kz
You Might Also Like
-
ءبىر رەتتىك ايىپپۇل 7 ايلىق ەسەپتىك كورسەتكىش كولەمىندە. بۇل 15 مىڭ تەڭگەگە جۋىق قارجى. ال ساباقتان قاشۋ فاكتىلەرى قايتالانسا، اتا-انالارعا 42 مىڭ تەڭگەدەن استام اقشا تولەۋگە تۋرا كەلەدى.
