InfoHub Logo

ۋقورعاسىن (اكونيت دجۋنگارسكيي) — بيىكتىگى 1 مەتردەن اساتىن، كوپ جىلدىق، ءشوپ تەكتەس وسىمدىك. تامىر ساباعى بىر-بىرىمەن تىزبەكتەلە بايلانىسقان كوپتەگەن تۇينەكتەردەن تۇرادى. ساباعىن كەيدە تۇك باسقان، كەيدە تۇكسىز جىلتىر بولىپ كەلەدى جانە ءتۇزۋ وسەدى. تامىر جاپىراقتارى وسىمدىك گۇلدەي باستاعاندا قۇراپ قالادى. ساباق جاپىراقتارىنىڭ ساعاقتارى بار. وسىمدىكتىڭ جوعارعى ۇشىنداعى جاپىراقتارى وتىرمالى، سىنا ءتارىزدى 5 بولىكتەن تۇرادى. ءار بولىكتىڭ ءوزى جىڭىشكە 2-3 جاپىراقشا قۇرايدى. گۇلدەرى كوكشىل ءتۇستى، ءىرى، وسىمدىكتىڭ ۇش جاعىندا شوعىرلانعان. گۇل توستاعانشاسى دا گۇل ءتاجى سياقتى 5 جاپىراقشادان كۇرالادى. ونىڭ ەڭ جوعارعى جاپىراقشاسى باسقالارىنىڭ ءۇستىن جاۋىپ تومەن قاراي سالبىراپ تۇرادى. ۋقورعاسىن ماۋسىم-شىلدە ايلارىندا گۇلدەيدى، شىلدە-تامىز ايلارىندا جەمىس بەرەدى.

قازاقستاندا بىرىنە-بىرى وتە ۇقساس جوڭعار ۋقورعاسىنى مەن قاراقول ۋقورعاسىنى وسەدى. ەكەۋىنىڭ دە دارىلىك قاسيەتتەرى بىردەي. قاراقول ۋقورعاسىنىنىڭ بيىكتىگى 2 مەترگە جەتەدى. وسىمدىك تاۋ باسىنداعى شابىندىقتاردا، بۇتالاردىڭ اراسىندا، ورماندى جەرلەردە وسەدى. ءدارى جاساۋعا وسىمدىكتىڭ تامىرىن پايدالانادى. قۇرامىندا اكونيتين، اكونين، مەزاكونين، تيپاكونيتين، زونگورين دەگەن الكالويدتەر بار.

ۋقورعاسىن حالىققا وتە ەرتەدەن-اق بەلگىلى بولعان. وسىمدىكتى ساداق وقتارىن ۋلاۋعا، قاسقىردى، جولبارىستى ولتىرۋگە پايدالانعان. ۋقورعاسىننىڭ قۇرامىنداعى اكونيتين الكالويدى اسا ۋلى. ونىڭ 0،003-0،004 گرامىنىڭ ءوزى-اق ادامدى ۋلاندىرىپ ءولتىرىپ جىبەرۋى مۇمكىن. وسىمدىكتىڭ تامىرى دا اسا ۋلى.

ۋقورعاسىننىڭ ءسپيرتتى تۇنباسىن دەنە سىرتىنا جاعۋ ارقىلى باستىڭ ساقيناسىن، ءتىس، ريەۆماتيزم، پوداگرا اۋرۋلارىن جانە نيەۆرالگيانى ەمدەيدى. وسىمدىكتىڭ تامىرىن جيناعان كەزدە ساق بولعان ءجون. ويتكەنى تامىر تۇينەگىنىڭ ۋى قولدىڭ تەرىسى ارقىلى دەنەگە ءسىڭۋى مۇمكىن. ودان ادام ۋلانسا، دەنەسىنىڭ ءار جەرى قىشيدى. اۋىزدىڭ، وڭەشتىڭ، جۇتقىنشاقتىڭ، قارىننىڭ قابىرعالارىنان جان كەتىپ قالعان سياقتى سەزىلەدى. ادامنىڭ اۋزىنان سىلەكەي اعادى، باسى اينالادى، توڭىپ قالتىرايدى. ءقوزىنىڭ قاراشىعى ۇلكەيەدى. مۇنداي جاعدايلاردا تەزىرەك دارىگەرگە كورىنگەن ءجون.