InfoHub Logo

تۇندە ۇرى مولدانىڭ قورادا تۇرعان ەسەگىن ۇرلاپ كەتەدى. مۇنى ەستىگەن كورشىلەرى كەلىپ، مولدانىڭ ءوزىن كىنالاي باستايدى.

— ەسەكتى ۇرلاعانى دۇرىس بولعان. سەن ءوزىڭ كىنالىسىڭ. نەگە مال قوراڭدى دۇرىستاپ بەكىتپەيسىڭ؟ — دەيدى بىرەۋى.

ەكىنشىسى تۇرىپ:

— مىناداي تاپال قورانى كىم سوققان؟ ارينە، بۇعان ۇرىلار ءۇيىر بولادى، ءالى تاعى نە بولارى بەلگىسىز! ءوزىڭ كىنالىسىڭ بارىنە. دۋالىن بيىگىرەك سوقساڭ بولماي ما؟ — دەيدى.

ءۇشىنشىسى تۇرىپ:

— سەنىڭ قوراڭدا نەگە يت جوق؟ ءوزىڭ كىنالىسىڭ، ءيتى جوق اۋلا بولا ما ەكەن؟ — دەيدى.

ءتورتىنشىسى تۇرىپ:

— جارايدى، سەن قالايشا بەيقام ۇيىقتاي بەرگەنسىڭ؟ سونشاما ءداۋ ەسەگىڭدى جىمقىراپ كەتەدى، ال سەن تۇكتى سەزبەي جاتا بەرىپسىڭ. ءوزىڭ كىنالىسىڭ، ادام سياقتى ۇيىقتامايسىڭ با؟ — دەيدى.

مولدا بارلىق ايىپتاۋلاردى تىڭداپ بولىپتى دا:

— ال جاقسى، ءبارىڭنىڭ سوزدەرىڭ دۇرىس، ءبىراق-اۋ، ۇيات بار ما سەندەردە، بارىنە دە مەنىڭ كىنالى بولعانىم قالاي؟ سوندا، نەمەنە، ۇرى سۇتتەن اق، سۋدان تازا ما؟ — دەگەن ەكەن كۇيىنىپ.

---