InfoHub Logo

قىمباتتى ۇستاز!

ەگەر شاكىرتتىك جىلدارىمىزدىڭ بالداۋرەن، بالالىق سەزىمگە تولى پاراقتارىن بۇگىنگى ەسەيگەن، ەس توقتاتقان بولمىس-بىتىمىمىزبەن تاعى دا ءبىر وي ەلەگىنەن وتكىزىپ، ساراپتاپ وتىرساق، سونىڭ ءار بەتىندە كوزگە ىستىق، كوڭىلگە جىلى كورىنىپ ۇشىراسا بەرەتىن اياۋلى ءبىر بەينە بار، ول - ءوزىڭىز. سودان بەرى وتكىزگەن ءاربىر جىلىمىزدىڭ مازمۇن-ماعىناسىندا اقىل-پاراسات، سابىر مەن ءتوزىم، ادالدىق پەن ار دۇنيەسىنە دەگەن ىڭكارلىك، ادىلدىك پەن جاقسىلىققا دەگەن قۇشتارلىق، ماحاببات پەن دوستىققا دەگەن تاباندىلىق تانىلىپ، ىزگىلىك پەن رۋحانياتقا جۇرەك كوزى اشىلىپ، "بويدا قايرات، ويدا كوز" جاتقان ساتتەرىمىز از ۇشىراسپاسا، وسىنىڭ بارلىعىنىڭ تۇپكى توركىنى - ءسىزدىڭ ەنشىڭىزدە. شاكىرتتەرىڭىزبەن ارالاسا ءجۇرىپ قىزمەت ەتكەن ساتتەرىڭىزدە ءبىزدىڭ ءالى قالىپتاسا قويماعان بالاڭ سانا-سەزىمىمىزگە باعا جەتپەس ءبىلىم، بىلىك بايلىعىن ءسىڭىرۋدى، ءسويتىپ عىلىم الەمىنىڭ تاۋسىلمايتىن شەتسىز-شەكسىز كوكجيەگىنە جەتەلەۋدى عانا ماقسات ەتىپ قويعان جوقسىز، ءسىز ەڭ الدىمەن مىنا الەمگە، مىنا قوعامعا، مىنا ومىرگە ادام بەرۋگە تىرىستىڭىز. بۇل ءتىپتى دە ءسىزدىڭ ءماندى دە ماعىناعا تولى ۇستازدىق ساتتەرىڭىزدىڭ باستى ولشەمىنە اينالعانداي ەدى. سىزدەن ءبولىنىپ، قانات قاتايتىپ، ءومىر باسپالداعىنىڭ باسقىشىمەن ءاربىر ساتتە ىلگەرى اياق باسقان كەزدەرىمىزدە ءسىز سىڭىرگەن ونەگە مەن ءتالىمدى ءومىردىڭ وزىنەن ساباق الا وتىرىپ، بۇرىنعىدان دا ايقىن، بۇرىنعىدان دا جارقىراعان كوڭىل كوزىمەن سەزىندىك، بويعا ۇيالاتتىق، جۇرەككە جاقىنداتتىق. ءومىر باسپالداعىمەن نەعۇرلىم ىلگەرى باسقان سايىن - ار، ادالدىق، تازالىق، جاقسىلىق، ادىلەتتىلىك، شىندىق، ىزگىلىك، دوستىق، ماحاببات سياقتى قاسيەتتى ۇعىمدار ءسىزدىڭ ۇستازدىق بەينەڭىزبەن ۇيلەسىم تاۋىپ، الدىمىزدان شىعىپ وتىردى، وسى ۇعىمداردىڭ الدىندا سۇرىنگەن ساتتەرىمىز بولا قالسا، سول ۇستازدىق بەينەڭىزدەن قىسىلدىق. عۇمىر-داريانىڭ وتكەل بەرە قويماس اساۋ تولقىنىنا ۇشىراسىپ، ءيىرىمدى اعىسىنا قارسى ءاربىر قادام جاساعان ساتتەرىمىزدە دە ءسىز ايتقان سوزدەر جاقسىلىق ۇشقىنىنداي بولىپ، باعىت-باعدار بەرەر شامشىراعىمىزعا اينالدى، ءسىز نۇسقاعان بيىگى مەن شىڭىنان ۇنەمى قول بۇلعاپ، مەن مۇندالاپ وتىردى. سوندا بارىپ ۇستاز ۇعىمىنىڭ قاسيەتى مەن ۇلىلىعىن ۇعىندىق، تۇيسىندىك، پايىم-پاراسات بيىگىنەن پاراقتادىق، وي كوزىمەن ساراپقا سالدىق، اسىل دۇنيەسىن قايتا تاپقان جوقشىداي ءوز ۇرپاعىمىزدىڭ بويىنا سىڭىرۋگە تىرىستىق.

ءقادىرلى ۇستاز!

وزىڭىزدەن الىستاپ، ءومىر سوقپاعىمەن ءاربىر قادام العا باسقان سايىن، تۇلعاڭىز سونشالىقتى بيىكتەي ءتۇستى، سول بيىكتەي تۇسكەن بولمىسىڭىز جانعا جىگەر سىيلاعانى ءبىر باسقا، ءاردايىم دا ۋاقىت كەمەسىن بالالىق مىنەزدەرىمىز جازيرا جاعالاۋىندا قالىپ قويعان كەشەگى كۇندەرىمىزدىڭ تۇپ-تۇنىق ايدىنىنا تاعى دا ءبىر ءسات بۇرىپ اكەتىپ وتىرۋشى ەدى.

قۇرمەتتى ۇستاز!

وسىنداي وتكەن شاقتارىمىزدىڭ بالعىن بەينەگە تولى پاراقتارىن تاعى دا ءبىر تاماشالاي قاراپ، وي ەلەگىنەن وتكىزىپ، ۇڭىلە تۇسكەن ساتتەرىمىزدە دە سول قىزىقتى جىلداردىڭ باستى تۇلعاسى بولىپ سانالاتىن وزىڭىزگە مىقتى دەنساۋلىق، قاجىرلى قايرات، تولاعاي تابىستار تىلەي وتىرىپ، وتباسىڭىز بەن بالالارىڭىزدىڭ اماندىعىن، ەڭبەك ەتكەن ۇستازدىق جىلدارىڭىزدىڭ جەمىسىن، ۇل-قىزدارىڭىزدىڭ قىزىقشىلىعىن كورە بەرۋىڭىزگە ءاردايىم دا شىن جۇرەكتەن تىلەكتەستىك ءبىلدىرۋشى:

ءسىزدىڭ شاكىرتتەرىڭىز

---