InfoHub Logo

شىلدە ايلارىنىڭ شىجىعان ىستىق ءبىر كۇنىندە يتتەر شابالانىپ قويا بەرەدى. كەدەي ءۇيىنىڭ كيىزىندە جىرتىق تەسىگى از بولسىن با؟ بولات تەسىگىنەن سىعالاپ قاراسا، ءبىر توپ سالت اتتىلار ءۇي سىرتىنا جاقىنداپ قالعان ەكەن. قاسىندا اۋىلدىڭ بي، شورالارى بار ستارشيناسى ەكەنىنىن تانىپ، جالما-جان الدارىنان شىعىپ، امان-ساۋلىق سۇراسقاننان كەيىن:

— قوش كەلدىڭىزدەر، ۇيگە ءتۇسىڭىز، — دەيدى بولات.

بۇلاردىڭ ىشىندە بەيتانىس، جاسى ەلۋلەر شاماسىندا بىرەۋى بولادى. كيىنۋ الپەتىنە قاراعاندا، سۇلتان تۇقىمىنان ەكەنى بايقالىپ تۇر. ول اق جىبەك ورامالمەن جەلپىپ تۇرىپ، قاباعىن تىرجيتا بولاتقا قاراپ:

— ءسىزدىڭ ءۇيدىڭ اۋاسى جاقسى ما، سالقىن با، — دەپ موشقال سۇراي باستاپتى. قاسىندا تۇرعاندار دا بۇعان «بولات نە دەپ جاۋاپ بەرەر ەكەن» دەگەندەي بولاتقا قاراسادى.

بولات:

— جەر مەن كوككە كوز تاستاپ تۇرىپ، مىنا ءبىز تۇرعان جەر مەن سوناۋ كوك اسپاننىڭ ەكى ورتاسى مەنىڭ جىرتىق ءۇيىمنىڭ كەڭدىگىنەن اۋماقتى بولۋ كەرەك. سونشاما كەڭشىلىكتىڭ اۋاسىن سىزگە تاپشىلىق ەتىپ تۇرعاندا، مەنىڭ ۇيىمنەن نە راحات تاپپاقسىز، — دەپ مىرس ەتىپ كۇلىپ جىبەرىپتى.

بەيتانىس اكىم ءوزىنىڭ كەۋدىرەگەن شالدان ءسوز تاپپاي جەڭىلگەندىگىنە قاتتى ساسىپ، ءارى ىزا بولىپ:

— ءبىز سەنىڭ ۇيىڭنەن قوناقاسى جەپ قارق بولامىز دەپ تە كەلگەنىمىز جوق ەدى-اۋ. جول سۇراپ كەلدىك، — دەي سالىپتى جالتارا سويلەپ.

بولات بەتتەرىنە تاڭدانا قاراپ:

— سىزدەر سياقتى ۇلىقتار سۇراعاندا امال قانشا؟ مىنا توككەن كۇلدىڭ ار جاعىندا ەكى سارى قاسقا جول بار، تاڭداۋىن الىڭدار، — دەپتى.

بەيتانىس اكىم تورە رۋىنان، ۋپراۆيتەل ەكەن.

---