InfoHub Logo

بولات اقىندىعىمەن قاتار تىلگە جۇيرىك، سوزگە شەشەن، ءازىلقوي، قۋاقى بولعان ادام. ءبىر بايدىڭ مىرزاسى 3-4 جولداس ەرتىپ، قۋلىق سالىستىرماق بولىپ بولاتتىڭ ۇيىنە كەلىپ تۇسەدى. بولات كەدەيلىگىنە قاراماستان قوناقجاي ادام ەكەن. مىرزانى جولداستارىمەن قارسى الىپ، قوناقاسى ازىرلەيدى.

بولاتتى سويلەتكىسى كەلگەن مىرزا ءسوز باستايدى:

— بوكە، — دەيدى ول، — وسى ءبىر دۋاداق دەگەن قۇس وتە سەمىز بولادى عوي. نە جەپ سەمىرەدى دەسەم، تاس جەيدى ەكەن عوي. ءبىر جىلى ءبىر دۋاداق اتىپ اكەلىپ سويىپ قاراسام، ىشىنەن جۇدىرىقتاي-جۇدىرىقتاي كوك تاس شىقتى، — دەپتى.

— ول راس، — دەپتى بولات، — مەنىڭ دە مىلتىق ۇستايتىن ونەرىم بار ەدى. تاۋدان ءبىر دۋاداق اتىپ اكەپ اجەمە سوي دەپ بەرىپ، ءوزىم ۇيگە كىرىپ كەتتىم. ازدان كەيىن اجەم:

— بولات، اۋ، بولاتجان، — دەپ داۋىستاعانسىن شىقسام، دۋاداقتىڭ بوتەكەسىنىڭ ىشىنەن قۇلاعى جوق قىزىل شىنى اياقتىڭ ۇستىڭگى قۇلاعى شىققان ەكەن. سول ءبىر اي بۇرىن بىزدىكىنەن جوعالىپ ەدى، — دەپتى.

مىرزا بولاتتىڭ شەشىلە سويلەگەنىنە قىزىعا ءتۇسىپ:

— بوكە، وسى قازاقتىڭ ءبىر ماقالى بار، «سەمىزدىكتى قوي كوتەرەدى» دەيدى عوي. مەنىمشە، سەمىزدىكتى قوي ەمەس، جىلقى كوپ كوتەرەتىن سياقتى. ءبىر جىلقى سوعىمعا سويدىم. ءسىز كورگەن جوقسىز، ساعان وتىرىك، ماعان شىن. سول بيەنىكى مىناداي شىقتى، — دەپ قارىسىن كەرىپتى.

— ول راس، — دەپتى، — بولات، — قازاق بىر-ەكى قوناققا دا سويىپ الۋعا ىڭعايلى بولعانسىن «سەمىزدىكتى قوي كوتەرەدى» دەپ ماقتاي سالعان. سەمىزدىكتى قوي ەمەس، جىلقى كوتەرەتىنى راس. ءبىر جىلى مىناۋ حاحولداردا ءبىر سارىالا ايعىر ساتىپ اكەلىپ قويىپ ەدى، سەن كورگەن جوقسىڭ، ساعان وتىرىك، ماعان شىن عوي. الگى ايعىردىكى مىناداي شىقتى، — دەپ قارىن جازىپ كورسەتىپ، جۇدىرىعىمەن مىرزانىڭ مۇرنىنا سالىپ قالىپتى.

مىرزا تۇرا كيىنىپتى.

— اسىقپاڭدار، اس جەپ كەتىڭدەر، — دەپتى بولات.

— راحمەت، اسىعىس ەدىك. سىزگە سالەم بەرە كەلىپ ەدىم، — دەپ مىرزا جولداستارىمەن ءجۇرىپ كەتىپتى. جولداستارى مىرزاعا:

— قۋلىق سالىستىرامىن دەپ كەلىپ ەدىڭ عوي، اسىنا قاراماي كەتكەنىڭ نە؟ — دەپ سۇراسىپتى.

— سەندەر تۇسىنبەگەن ەكەنسىڭدەر عوي. بولاتتىڭ قۋلىعى، مەنىڭ قۋلىعىمنان قۇلاش جارىم ارتىق شىعىپ، ءبىر شەتى مۇرنىما ءتيىپ، مۇرنىمدى بۇزىپ كەتتى، — دەپتى مىرزا.

---