InfoHub Logo

زەڭگى بابا سيىر ىشىندەگى بۇزاۋدىڭ ءتۇر-تۇسىن ناقتاپ ايتاتىن، جاڭىلماي تاباتىن كورىپكەل، اۋليە بولىپتى. ونىڭ ومىرلىك قوساعى ءانۋار انانىڭ دا ىشتەگى بۇزاۋدىڭ قاڭداي ەكەنىن اجىراتا الاتىن سىنشىلىق قاسيەتى بار ەكەن. بىردە زايىبى ەرىنەن:

— مەن ءسىزدىڭ اۋليەلىك ىسىڭىزگە ورتاقپىن با؟ ساۋاپقا سەرىكپىن بە؟ — دەپ سۇراپتى. زەڭگى وعان قاراپ؛

— سەن ساۋاپقا سەرىك بولا المايسىڭ. ءوزىم تاقۋامىن، سونداي تازا ىسىممەن اۋليەلىككە يەمىن. بۇل قاسيەت وزىمنەن، وعان سەن ورتاق ەمەسسىڭ، — دەپتى.

ءانۋار انا ەرى زەڭگىنى ەرەكشە ىقىلاسىمەن كۇتىپ، اس-اۋقاتىن تازا دايىنداپ، قىزمەت ەتەدى ەكەن. ول اس دايىنداعاندا، ىدىستاردى توعىز مارتە جۋىپ، شايقاپ، شاياتىن كورىنەدى.

بىردە ءانۋار ءتۇس مەزگىلىندە اس دايىنداپ جاتىپ، اۋقاتتىڭ ىشىندە الدەنە قاراڭ ەتە قالعانىن كوزى شالىپ، بايقاپ قالادى. «ءبىر نوقاتتا قارا داق بار ەكەن عوي-اۋ» دەپ، قانشا اۋىستىرىپ، ىزدەسە دە تابا الماپتى. «وسى ارادا ءجۇر مە ەكەن» دەپ شامالاپ، استىڭ بىر-ەكى ءشومىشىن الىپ، توگىپ تاستايدى. پادا باعىپ، اشىعىپ، ىستىق كۇننىڭ استىندا قاپ-قارا بوپ ءوزىن كۇتكەن ەرىنىڭ جاي-كۇيىن ويلاپ، اۋقاتتى اسىعا زەڭگىگە الىپ بارادى. بابا ونى لەزدە ءىشىپ قويادى.

ارادا ءبىراز ۋاقىت وتەدى. «الگى قاراڭ ەتكەن نارسە اس ىشىنەن الىندى ما، جوق پا؟» — دەگەن كۇمان ءانۋار انانىڭ كوڭىلىنەن كەتپەيدى. ول سونى بايقاۋ نيەتىمەن يىرىلە جاتقان سيىردىڭ شەتكى بىرەۋىن قولىمەن نۇسقاي كورسەتىپ:

— اناۋ سيىر قانداي بۇزاۋ تۋادى؟ — دەپ سۇرايدى. سول كەزدە بابا:

— ءتۇسى قىزىل، ماندايى قاسقا بۇزاۋ، — دەپ جاۋاپ بەرەدى.

سوندا جۇبايى ءسال ەزۋ تارتىپ، جىميىپ:

— قۇيرىعىنىڭ ۇشى اق، قىزىل بۇزاۋ، — دەپتى.

ۋاقىتى جەتىپ، سيىر بوشالاپ، قۇيرىعىنىڭ ۇشى اق، ءتۇسى قىزىل بۇزاۋ تۋادى.

ءانۋاردىڭ ايتقانى تۋرا شىققان سوڭ زەڭگى ودان:

— مەن قالاي جاڭىلدىم؟ — دەپ سۇراپتى.

— ءسىزدىڭ جاڭىلعانىڭىز، سول كۇنى اۋقاتتىڭ ىشىندە ءبىر نوقاتتا كىشكەنتاي قارا داق كەتىپ، قانشا ىزدەسەم دە، تابا الماعان ەدىم. سول كوزىڭىزگە پەردە بوپ تۇتىلىپ، ىشتەگى بۇزاۋدىڭ قۇيرىعى قايرىلىپ، اياعىنىڭ اراسىنان ءوتىپ، ماندايىنا ءتيىپ جاتقانىن بايقاي المادىڭىز، — دەيدى جۇبايى.

سول ۋاقىتتا زەڭگى؛

— مەنىڭ اۋليەلىك قاسيەتىم سەنىڭ جاساعان قىلاۋسىز تازا قىزمەتىڭمەن بايلانىستى بولدى. ەگەر سەن تازالىعىڭنان ءسال عانا ءمۇلت كەتسەڭ، مەن ول قاسيەتىمنەن ايرىلىپ، جارىم-جارتىلاپ، تولىق كۇيدە بولا المايدى ەكەنمىن، — دەپ مويىنداعان ەكەن.

---