InfoHub Logo

Baqytty balalyq shaq degen ne? Eń jaqsy oıynshyqtar men tátti taǵamdar, sońǵy toptamadan shyqqan sý ótpeıtin kıim be? Eki tilde tárbıelep oınatatyn tańdaýly balalar baqshasy ma eken? Nemese toqtap qalǵan kurylys oryndarynda órmelep, garajdan garajǵa sekirý men ózenderde shomylý sıaqty sheksiz erkindik shyǵar? Sońǵy kezderi jasalǵan zertteýler bul nusqalardyń barlyǵy da baqytty balalyq shaq bolýy múmkin deıdi, biraq bir shart oryndalýy kerek: búldirshin barlyq balalarmen bir áleýmettik topta bolatyn jaǵdaıda ósýi qajet. Baqytty bolý úshin kishkentaılar jumaǵynda ne bolyp jatqany mańyzdy emes: bastysy — bárinde kerektiniń barlyǵy bar nemese eshqaısysynda eshteńe joq, ıaǵnı teń bolýy kerek. 

Alaıda, balalyq shaqtyń baqytty bolýy eresek ómirde seni úlken jetistikter kútip turǵandyqtyń kepili emes. Kishkentaı kezińde eshkimge qyzyǵa qyzǵanbasań, eshteńege qumartpasań, bolashaqta mansap qýýǵa yntań bolýy ekitalaı.  

Djekı Channyń tarıhy — únemi ash júrgen kishkentaı balanyń taýdaı talaby arqyly tańǵajaıyp jaǵdaıdy shyndyqqa aınaldyrýy týraly. 

Kórshi qytaı balaqaı

Sábı kúninde A-Pao («bala — zeńbirek ıadrosy») dep atanǵan Djekı 1954 jyldyń sáýir aıynda dúnıe esigin ashpastan jatyp-aq bárin tań tamasha qaldyrdy. Ol kez úshin Djekı óte iri bolyp týdy. Ata-anasynyń aıtýynsha ony sheshesi qalypty toǵyz aı ornyna on eki aı qursaǵynda kóterip júrgendeı bolǵan edi. Salmaǵy bes kılogrammnan asatyn jańa týǵan náreste týraly jergilikti gazet jazdy! Bul óte quıtyrqy áreket edi. Djekıdiń ata-anasynyń turmysy jupyny boldy, sondyqtan olar balany syıaqy tólese, asyrap alatyndarǵa bere salýdy da oılady. Alaıda, bundaı salmaqty erekshe bala ózderine kerek bolady dep uıǵardy. Osylaısha Djekıge óziniń týǵan otbasynda qalatyn múmkindik týdy.  

Bul ózi birtúrli balalyq shaq boldy. Djekıdiń ákesi aspaz bolyp jumys istedi, al sheshesi bolsa — fransýz konsýlynyń úıinde qyzmetshi boldy. Bul tútin Gonkongta, Vıktorıa shyńyndaǵy elshiler qalashyǵynda turdy. Biraq, olardyń úıi dıplomatıalyq muǵdarydaǵy eń kedeı úı edi. Djekı ýaqytynyń kóbin basqalardan esh kem emes ekenin dáleldeý úshin jáne «óziniń qyzyn» — konsýldyń qyzyn basqalardyń ozbyrlyǵynan qorǵaý úshin kórshi balalarmen tóbelesýmen ótkizetin. Oǵan ákesi kishkentaı kezinen-aq ýshý amal-aılalaryn úırete bastady da, «kórshi qytaı balaqaı» alty jasynda judyryǵy arqyly ata-anasynyń áleýmettik mártebesiniń ornyn toltyrýǵa bolatynyna kóz jetkizdi.  

Ókinishtisi sol, mektepke barǵan birinshi jyly-aq asqan sheberlikpen tóbelese alýdan oqýda esh paıda joq ekeni belgili boldy. Asa belsendi sotanaq bala úı kitap-dápteri salynǵan portfelin eki kúnniń birinde joǵaltyp, sabaqtardan qashyp júrdi, ata-anasy tanystyq arqyly áreń kirgizgen elshilik mektebindegi tártibiniń nashar bolǵany sondaı, onyń bolashaǵy týraly qıyn másele kún tártibine shyqty. Otbasylyq keńeste A-Pao balaqaıdy áıteýir «satyp jiberý», naqtyraq aıtsaq Qytaı drama akademıasyna oqýǵa berý týraly búkil ómirin ózgertken sheshim qabyldandy. Shyndyǵynda bul balalar ýaqytynyń kóbin yjdahattylyqpen jasalatyn akrobatıkalyq jattyǵýlarǵa jumsaıtyn ınternat edi. Bul rette, bala onda qabyldanǵanda onyń ata-anasy balanyń «ustazdyń menshigi» («eti - seniki, súıegi - meniki») bolatyn kelisimge qol qoıatyn. Osylaısha muǵalim óz qaramaǵyndaǵy balaǵa kez kelgen fızıkalyq jazany qoldana alatyn.

Sol eki arada, 1960 jyly Djekıdiń ákesi jańa qyzmetke ıe boldy. Ol kisini Amerıkanyń Avstralıadaǵy konsýldyǵyna aspaz bolýǵa shaqyrdy da, kishkentaı sotanaqtyń otbasy ony ınternat muǵalimderiniń qaraýyna qaldyryp, elden ketip qaldy. Djekı keıin esine alǵandaı, onyń, bir jaǵynan, mereke kezderi de úıine baryp qaıta almaıtyn bolǵandyǵy, kóńiline qaıaý túsirdi, ekinshi jaǵynan, sheshesi, ony synyptastarynyń kúlkisine qaldyryp, apta saıyn ony jýyndyrý úshin bir shelek ystyq sý alyp kelmeıtini kóńiline jaqty. Ol jyldary Gonkongta sýmen qamtý jaǵy qıyn boldy da, akademıadaǵy gıgıenany saqtaý qarabaıyr deńgeıde turdy.

Alǵashqy mahabbat

Edenge jatyp uıyqtaý, tańǵy asqa, túski asqa, keshki asqa kúrish jeý, adamdy qaljyratyp jiberetin jattyǵýlar, sonymen qatar kez kelgen syltaý bolsa boldy muǵalimderden taıaq jeý kimniń bolsa da taýyn shaǵyp tastar edi, tek Djekı Channyń taýyn shaǵa almady. Eptiligi men artısızmi úshin ol, kóp ýaqyt ótpeı-aq, teatr trýppasynyń negizgi quramyna alynyp, sahnaǵa shyǵyp óner kórsetip, kıno túsirý alańdarynda statıs bolyp isteı bastady.    

Dáldegendeı, ol shaqta Gonkongta ekshn-atys-shabys janrynyń dáýiri júrip turǵan. Sondyqtan kýng-fýdy jetik ıgergen akademıanyń oqýshylaryn statıs retinde attaı qalap alyp jatty. Qosymsha jumystan kóp aqsha taba qoıý qıyn edi (60 dollardyń 55-in muǵalip alyp alatyn, óıtkeni oqýshylar, áli de bolsa, muǵalimniń menshigi bolyp sanalatyn), alaıda, bul Djekı úshin sábılik shaǵynan beri kózden bulbul ushqan erkindigine qol jetkizýdiń taptyrmas múmkindigi edi: kıno túsiriliminen qashyp ketýge bolady ǵoı! Tek kadrǵa túsken statıserge ǵana aqy tólenetin jáne akademıada búgin joly bolmaǵanyn aıtyp, jeke basynyń sharýalaryn tyndyrýǵa ketip qalýǵa bolatyn. Ondaı sharýalar jas tóbelesqorda dál osy kezde paıda bola bastady.   

Djekı on tórt jasqa tolyp, keleshektegi «qytaı kınemotografynyń eń syrbaz akteri» birinshi mahabbat azabyn tartty — jaqsy otbasynan shyqqan qyzben júre bastady. «Ol kezde biz áli jas bala edik, ıyǵymyz taqalyp oryndyqta birge otyratynbyz, — dep Djekı eske alady. — Men ony qaıta-qaıta qushaqtaıtynmyn, biz osylaı bes-alty saǵat boıy otyra berýshi edik. Meniń qolym talyp, uıyp qalatyn, biraq men qolymdy alýǵa uıalatynmyn». Ǵashyqtyq kóńil kúıimen oryndyqta otyra berý nekelesip tynýǵa sál jetpeı qaldy — qalaı desek te, bozbala men boıjetken buǵan daıyn bolatyn. Alaıda, boıjetkenniń ata-anasy «qaıyrshy statıske» qyzyna úılenýine úzildi-kesildi qarsy boldy.   

Bul Djekıdiń namysyna qatty tıgen soqqy boldy. Bundaı soqqylarǵa ol kishkentaı kúninen bastap jankeshti tóbelespen jaýap qatýǵa daǵdylanǵan soqqy boldy. «Qaıyrshy statıs» óziniń Gonkongtaǵy eń myqty kaskader ekenin dáleldep, «Aıdahar-Jolbarys» sheberi ataǵyn alýǵa — kıno túsirilimderindegi aıqas-tóbelesterdi qoıýshynyń asıstenti bolýǵa bel býdy. Ata-anasy balanyń talabyn demep jiberýge kelisip, ol akademıadan kóship ketip, óziniń derbes ómirin bastaýyna bolatyn qurqyltaıdyń uıasyndaı ǵana páter satyp alyp berdi.   

«Kasalyq jınaq qarǵysy atqan» myrza

Djekı Chan óziniń armanyn akıqatqa aınaldyrýǵa birneshe tustan biraq kiristi, jáne aıta ketý kerek, onyń bul ádisin úlken qalada turý jóninde oılanyp júrgen kez kelgen jigit paıdalanǵany durys. Eń áýeli ol «Gonkongtyń eń kózsiz batyrlyqqa áýes kaskaderi» retinde jurtshylyqqa máshhúr bolýǵa asyqty. Ol isteýge eshkim kelispeıtin trúkterdi oryndaı beretin. Keıindep Djekı bul óziniń aq joly ári ózine buıyrǵan jazasy bolǵanyn aıtqan edi: osylaısha úıdiń shatyrynan dýblersiz jáne esh saqtanbaı-aq op-ońaı sekire salatyn Djekı Channyń áıgili «fırmalyq stıli» dúnıege keldi. Degenmen, pýblıka odan árdaıym osyny qalap, endi mejeni tómendetý múmkin bolmaı qaldy.  

Sonymen birge ol kıno túsirý tehnologıasynyń qyr-syryna qanyǵa bastady. Mysaly, ekshn-fılmderdegi statısterge qoıylatyn negizgi talaptardyń biri «jaqsy ólý», ıaǵnı olardy basty keıipker «óltirip tastaǵan» soń qozǵalmaı jatý boldy. Bundaı kezde tynystamaý mańyzdy boldy, ásirese katanamen qylyshtasý kezinde keýdege qadalǵan qylyshtyń yrǵalyp turýy sol sátte-aq «óliktiń» sapasyzdyǵyn bildirip qoıady. Djekı túsirilim «Motor!» sózi aıtylǵan soń bastalatynyn sanasyna toqyp aldy. Osy sebepti rejıser «Daıyndalyńdar! Kamera!» dep aıqaılap, al basqa statıserdiń bári tynysy joq ólik bolyp jatqan kezde, bizdiń aılaker kerisinshe tynystap alýǵa baryn salyp jatatyn. Ol tek úshinshi komandadan soń ǵana qatyp qalatyn da, bul oǵan basqalardan uzaǵyraq minsiz ólik bolyp jatýyna sep bolatyn. Osy trúgi onyń Gonkongtaǵy eń suranysqa ıe statıs bolýyna jáne tipti sózi bar birneshe róldi alýyna paıdasyn tıgizdi. Onyń ústine óte ıkemdi jigit aınalasymen tez ári ońaı aralasyp ketetin bolyp shyqty. Qytaıda endi-endi paıda bola bastaǵan jáne kıno salasynyń eń bir beldi-bedeldi adamdary minetin qymbat kólikterge qyzyǵatyn. 

«Aıdahar-Jolbarys» sheberi bolsam degen armany endi sonshalyqty oryndalmas tilek emes edi. Az ǵana ýaqyttan soń ol armany aqıqatqa aınaldy! Alaıda, Djekıdiń bastapqy maqsaty — súıikti qyzymen otaý qurý — bul ýaqytta kýng-fý-fılmderiniń jańa týyp kele jatqan juldyzy úshin óziniń tartymdylyǵynan aıyrylyp qalǵan bolatyn. Súıiktisi onymen bir shańyraqta turyp jatty: ol qyz ata-anasynyń erkine kónbedi. Biraq Djekı úıde bolatyn ýaqytyn kúnnen kúnge azaıtyp, dostarymen kóńil kóterýge ketip qala beretin boldy. Bıshi jáne aktrısa qyz-kelinshekterdiń ishinde onyń ashynalary paıda bolyp, aqyr sońynda alǵashqy mahabbaty Djekıden ketip qaldy. Sol sátte bul jaǵdaı oǵan óte jaqsy boldy. Degenmen, ol keıin osy úshin ózin ómir boıy kináli sanap júrdi. Ol ataqty bolyp ketken kezde óziniń birinshi qyzymen qaıta bas qosýǵa tyrysty, oǵan qymbat syılyqtar jiberip turdy. Biraq ol qyz aralasqysy kelmeı, keıin Djekıge belgili bolǵanyndaı, provınsıaǵa ketip qalyp, onda jalǵyz turypty.  

Osy kezde «Gonkongtyń uly kaskaderiniń» mansabynda esh boljap bilmegen kúrt burylys aldynan shyqty: Brús Lı qaıtys bolyp ketti de, ekshn-atys-shabys fılmderi oılamaǵan jerde sánnen shyǵyp qaldy. Kıno túsirilimderi azaıa berdi, aqsha bolmaı qaldy. Kýng-fýdan basqa eshteńe bilmeıtin Djekı ómirindegi joqshylyq pen toryǵýshylyq týdyrǵan qatań kezeńderdiń birin basynan ótkerdi. Aqyr aıaǵynda, aqshasy jeıtin tamaǵyna da jetpeı qalatynyn bilip, ol Avstralıadaǵy ata-anasyna ketip qalýdy uıǵardy. Sheshesi ony jylap qarsy aldy, al ákesi, árıne, balasynyń bul qylyǵyna qarny ashty. Desek te, balalary ata-anasyna masyl bolmaýǵa barynsha tyrysyp baqty (ony ata-anasy eki ret «satyp jiberýge» tyrysqanyn umyta qoıǵan joq). Djekı qurylysqa jáne meıramhanaǵa aspazdyń kómekshisi bolyp kirdi. Alaıda, sheshesi avstralıalyq typ-tynysh ómir oǵan qıyn soǵyp, ishin pystyryp júrgenin baıqap júrdi. Bir jyldan keıin, Gonkongtan fılm túsirilimine qatysý, onyń ústine akter retinde qatysý týraly usynys kelgende, Djekı oılanbastan keri qaıtyp ketti.

Bul Lo Veıdiń — kezinde Brús Lıdi juldyz qylyp shyǵarǵan rejıserdiń jobasy bolatyn. Patrıarh kórermenniń kýng-fý-fılmderine degen yqylasyn oıatýǵa qabyleti jetetin daryndy jańa keıipker izdep júrgen edi. Djekı Chan taǵdyr oǵan qandaı múmkindik bergenin uǵynǵan kezde baqyttan basy aınaldy. Alaıda… bul jerde qaýipti tuzaq qurýly tur edi. Lo Veı bolsa Brús Lıdi — qabaǵy qatýly, esh mini joq sýperqaharmandy qaıta tiriltip alǵysy keldi. Biraq, ebedeısiz muryny men qýlanǵan fızıonomıasy bar Djekı úshin seri jigittiń ıdealdy beınesiniń aýyly alys edi. Qap-attegen-aıy sol, Djekı Chan oınaǵan «Qahardyń jańa judyryǵy» fılmi prokatta qurdymǵa ketti. Kelesi kartınasy da jetistirgen joq, osylaısha «kýng-fýdyń jańa juldyzy» prodúserler arasynda «Kasalyq jınaq qarǵysy atqan» myrza degen ataqty ıemdendi.  

Teńdesi joq Djekı

Bul ýaqytqa deıin kóbiniń saly sýǵa ketip qalar edi, biraq Djekı Chan óıtken joq! Ol alǵan betinen qaıtpaı, kınoǵa túsip, adam nanǵysyz trúkterdi jasaı berdi. Óstip júrgende juldyzy ońynan týa qaldy: ony basqa kınostýdıanyń prodúserleri baıqap, jańa kınojanrdyń — komedıalyq kýng-fýdyń tusaýyn kesken «Búrkit kóleńkesindegi jylan» fılminde oınaýdy usyndy. Bul Djekıdiń oń jambasyna kelip, tamasha hıt bolǵan fılmder birinen soń biri shyǵyp jatty. Sóıtip, birneshe jylda burynǵy qaıyrshy statıs múltımıllıoner, sýperjuldyz bolyp shyǵa keldi.  

Bul onyń adýyndy minezi barynsha ashylǵan ýaqyt bolatyn. Djekı óziniń jeke kaskaderler komandasyn quryp, olarǵa birkelki sport avtokólikterin alyp berdi. Osylaı olardyń korteji búkil Gonkong kóshelerin shýlatyp ótken kezde jurt eriksiz olarǵa moıyn buryp qarap qalatyn. Ol shveısarıalyq saǵattar men sándi jeıdeler satylatyn býtıkterdi kóshirip áketetin de, sosyn olardy dostaryna taratyp beretin. Kún saıyn búkil túsirý tobyna arnap toı-dýman jasaıtyn. Antıkvarıatty saýdalaspaı-aq satyp ala berdi jáne ekzotıkalyq ań-qustardan quralǵan haıýanattar parkin kurdy. Alaıda, bunyń bári onyń basty áýestigi — túsirý alańyndaǵy adrenalın atqylaıtyn alańǵasarlyǵynyń bir pushpaǵyna da tatymaıtyn.

Djekı ózi adam sengisiz qaterli trúkterdi oılap taýyp, olardy oryndap júre berdi. Mine, mysaly, «Men baqyttymyn» avtoómirbaıanynda sıpattalǵan trúkterdiń biri: «Oqıǵa jelisi boıynsha meniń keıipkerim qylmyskerdi qýyp kele jatyp, galereıadan tómen qaraı saýda ortalyǵynyń holyna sekirip túsýi tıis. Altynshy qabat bıiktiginde jumyr ári taıǵanaq súıenishte turyp, men aldymen eki metr bolatyn uzyndyqqa sekirip, sosyn metal sym, elektr shamdary, qanttan jasalǵan áınek jáne pırotehnıka shyrmaǵan temir baǵanǵa jarmasýym, sodan keıin baǵandy boılaı tómen qaraı syrǵı jónelýim kerek edi. Batylym baryp bul kadrdy túsirýdi bastaýdan qatty qoryqtym.     

Aqyr sońynda men súıenishke shyqtym da, eriksiz túrde ıyǵymdy silkip qaldym — osy kezde tómen jaqta onnan asa kameranyń birkelki iske qosylǵanyn kórdim. Men bunyń túsirýdi bastaý týraly belgi emes ekenin aıtqym keldi, biraq bul tym kesh edi. Kóz aldyńyzǵa keltirip kórińiz: túsirý alańynda júrgen áldeneshe júz adam — jáne qulaqqa urǵan tanadaı tynyshtyq. Bir sarynmen ǵyjyldap turǵan mehanızmderdiń dybysynan basqa eshqandaı ún joq. «Ólsem óleıin», — dep oıladym da alǵa qaraı sekire saldym.  

Bir sekýnd ótken soń men metal baǵandy qolymmen de aıaǵymmen de qushaqtap aldym, tómen qaraı syrǵyp bara jatqanymda elektr shamdary jarq-jurq etip, atylyp jatty, áınek pen ushqyndar jan-jaqqa shashyrap jatty. Áýeli eki alaqanyma kelip turǵan ystyqty sezdim, sosyn qolym qatty aýyra bastady, odan keıin múldem semip qaldy. Bul úderiske meniń «A-a-a-a-a…» dep sozylyp shyqqan aıqaıym qosylyp, men qant áınegine gúmp etip quladym da, onyń kúl-talqanyn shyǵardym, sodan keıin baryp kámpıt toltyryp qoıǵan úıshiktiń ústine qulap tústim. Oıdaǵydaı shyqty. Biraq dúbl áli tamam bolmaǵan edi. Kadrdy aıaǵyna jetkizý úshin men ońbaǵandy ustap alyp uryp tastaýym kerek. Sonymen, men jerge túse salysymen atyp turdym da, ózimniń tobymdaǵy kaskaderlerdiń birin uryp-soǵa bastadym: sart-surt! zyńq-zyńq! Ol jalynyp «Djekı, boldy, meni uryp óltiretin boldyń!» degenshe ony toqpashtaı berdim. Men ony jibere salǵanymda ol jerge sulap tústi. Osy kezde baryp esimnen adasyp, jyndysúreıdiń qylyǵyn istegenimdi túsindim. Sol trúkti oryndaǵan soń men ekinshi deńgeıli kúıikke shaldyqtym, búkil bet-júzim qanǵa boıalyp ketti, al qant áıneginiń synyqtary denemniń saý tamtyǵyn qaldyrmapty».   

Djekıdiń tabynýshylary ol úshin ózderine qol salyp jatty, al baspasózde onyń aldyńǵy qatarly azıalyq aktrısalarmen kóńil jarastyrǵany týrasynda qańqý sóz kóptep júrdi, olardyń biri ras bolyp shyqty. 1983 jyly Djekı Chan onyń ekinshi adal qurbysy jáne balasynyń anasy bolǵan Djoan Lınge úılendi.  

Amerıkany ashý

Kelesi qısyndy qadamy halyqaralyq naryqty baǵyndyrý bolmaq edi. Sóıtip, 1980-jyldary Djekı «Zeńbirek ıadrosy» jarysy» fılminiń túsirilimine qatysý úshin Gollıvýdqa jol tartty. Bul jerde Chandy taǵdyrdyń taǵy bir shapalaǵy kútip tur edi: ol Amerıkada juldyz bolǵan joq, biraq tildi bilmegeni úshin jáne varvarlyq ádetteri úshin jurttyń mazaǵyna qalatyn kúlkili sırk maımylyna uqsas bireý bolyp sanaldy. Tilge kelgende shynymen-aq úlken qıyndyqtar boldy: Djekı alǵashqy jarty jyl boıy tek gambýrgerler men koka-kolany azyq etti, óıtkeni basqa taǵamdarǵa qalaı tapsyrys berýdi bilmedi. Osynyń nátıjesinde qanyndadaǵy holesterın kólemi anaǵurlym artyp ketip, aýrýhanadan biraq shyqty. Amerıkada oǵan bolysar eshteńe bolmady jáne ol túsken fılm de sátsizdikke ushyrady. Saly sýǵa ketken Djekı Chan otanyna qaıtýǵa asyqty. Degenmen, Gollıvýd onyń kózin ashyp berdi: kaskader batystyq ádis-tásilderdiń bári adamı resýrstarǵa negizdeletin qytaılyq ádis-tásilderden qanshalyqty aıyrmashylyǵy baryn túsindi. Djekı Chan endi onyń kaskaderlik komandasy Qytaıdaǵy eń janynan bezgen emes, batystyq eń joǵary standarttarǵa saı bolady dep uıǵardy.

1995 jyly Gollıvýdtyń resýrstary arqyly isteı almaǵan nárse oılamaǵan jerden óz kúshterimen-aq júzege asyp ketti: AQSH ekrandaryna «Bronkstaǵy myqtyny anyqtaý» gonkongtyq qyrǵyn-tóbeles fılmi shyǵyp, múmkin bolǵan rekordttardyń bárin shań qaptyrdy. 1998 jyly «Alashapqyn» fılmi túsirildi de, osydan soń Djekı Chanǵa álemdik deńgeıdegi juldyz mártebesi túbegeıli ornyqty. Ol óziniń fılmderiniń rejıseri bolatyn boldy. Endi Djeıms Kemeron, Ýıll Smıt, Sılvestr Stallone — onyń ónerine tabynýshylar jáne dostary! 2002 jyly «Dańq aleıasynda» onyń jeke óziniń juldyzy paıda boldy. Komıkalyq kýng-fý álemdi jaýlady!   

Máńgi baqı onynshy qabattan baspen tómen sekire berý múmkin emes. 2003 jyldan beri Djekı akterlik sheberlikke den qoıyp, alańǵasar trúkterdi qajet etpeıtin rólderdi somdap júr. 2011 jyly onyń akterlik mansabyndaǵy júzinshi fılm — «Sońǵy ımperıanyń toqyraýy» tarıhı dramasy shyqty. Al 2012 jyly Kannda Chan qartaıyp ketkenin, sany joq jaraqattarynyń bilinip júrgenin, sondyqtan ol endi túsirý alańdarynda trúkterdi oryndamaıtynyn jarıalady. Jer-jahandaǵy eń essiz akterdiń dáýiri aqyryna taıady. Biraq, bul Channyń jumysty múldem doǵaratynyn bildirmese kerek. Ol fılmderin túsirip, bıznespen jáne saıasatpen aınalysyp júr. Djekı qyzyǵy men shyjyǵy toly ómir súrip jatqany sondaı, 2016 jyly onyń aty-jóni Panamalyq qujattardan kórinip qaldy.

---