InfoHub Logo

Arystan bab esimi Otyrar, Saıram, Iasy óńirindegi sopylardyń rýhanı ustazy retinde keńinen tanymal. Islam dininen basqa otyz úsh dindi bilgeni jáne áýlıe kisi bolǵany jaıly halyq arasynda ańyz bar.

Arystan bab kesenesiniń eń kóne bóligi — qabirhana shamamen XII ǵasyrda salynǵan. XIV ǵasyrda mazar qaıta qalpyna keltirilgen. Keseneniń salynýy jaıynda mynadaı ańyz taraǵan.

Máýerennahr bıleýshisi Ámir Temir Qoja Ahmet Iasaýıdiń qurmetine kesene turǵyzýǵa jarlyq etedi. Keseneniń qabyrǵalary qalanyp bolǵan túni alyp ógiz kelip, dýaldardy múıizimen soǵyp, qulatyp ketedi. Kesene qabyrǵalary qaıta turǵyzylyp, kúmbezderi qalanǵanda álgi oqıǵa taǵy qaıtalanady. Osyndaı oqıǵalardan keıin Ámir Temirdiń túsine aq kıimdi qarıa kirip: «Aldymen Qoja Ahmettiń alǵashqy ustazy — Arystan babtyń qabiriniń ústine mazar sal», — deıdi de ǵaıyp bolady. Erteńinde Ámir Temir Arystan bab áýlıeniń qabiriniń basyna kesene turǵyzýǵa jarlyq beredi. Ol salynyp bitkende ǵana Túrkistandaǵy Qoja Ahmet Iasaýı kesenesiniń qurylysy oıdaǵydaı aıaqtalady. Sóıtip, Ońtústik Qazaqstan oblysy aımaǵyndaǵy kóne Otyrar jerinde Arystan bab kesenesi boı kóteredi.

Keshen XX ǵasyrlarda jergilikti halyqtyń qarajatymen qaıta óńdelgen. Dáliz — qaqpa mańdaıshasyndaǵy mármár taqtaǵa hıjra boıynsha 1327 jyl dep sońǵy qurylys júrgen ýaqyty kórsetilgen.

Kesene dálizhana, meshit, qujyrahana, azan shaqyratyn munara sıaqty jeke bólmeler men qabirhanaǵa bólingen. Arystan babtyń áýlıeligin halyq moıyndaǵan. Sońdyqtan búgingi kúnge deıin beısenbi saıyn áýlıe basyna túnep, ǵıbadat etýshiler kezdesedi. El arasynda «Arystan babqa túne, Qoja Ahmetten tile» degen ulaǵatty sóz bar.

---