InfoHub Logo

1961 jyldyń 12 sáýirinde Iýrıı Gagarın ǵaryshqa ushyp, adamzat tarıhynda jańa paraq ashty. Alaıda, bul tarıhı sátte birneshe qupıa jaǵdaılar oryn alǵan. Eger Gagarın jerge aman-esen oralmaǵanda nemese basqa elge qonyp qalǵanda qandaı sharalar qoldanylýy kerektigi týraly josparlar daıyndalǵan.

Bul týraly Infohub.kz aqparat agenttigi habarlaıdy.

Ushý kezindegi qıyndyqtar

Gagarınniń «Vostok» kemesimen ushýy bastalǵanda bári jospar boıynsha júrdi. Alaıda, 67-mınýtta tejeý júıesi iske qosylǵanda, kútpegen aqaýlar baıqaldy. Júıe álsiz ımpúls berip, kemeniń jyldamdyǵyn jetkilikti dárejede baıaýlata almady. Bul traektorıanyń ózgerýine ákelip, keme atmosferaǵa kirer aldynda baqylaýdan shyǵyp, aınala bastady. Gagarınniń ózi «Men janyp jatyrmyn, qosh bolyńdar, joldastar» dep habarlaǵan. Keıin bul qubylystyń atmosferaǵa kirý kezindegi qalypty jaǵdaı ekeni anyqtaldy.

11 tótenshe jaǵdaı jáne AQSH qaýpi

Ǵaryshker katapýlt arqyly aman-esen jerge qonǵanymen, onyń oralýy kezinde basqarý ortalyǵy 11 túrli tótenshe jaǵdaıdy tirkegen. Eń basty másele – Gagarınniń Keńes Odaǵynan tys, tipti AQSH aýmaǵyna qonyp qalý qaýpi boldy. Bul jaǵdaıdy eskerip, KSRO bıligi arnaıy áreket josparyn daıyndady. Gagarınge arnaıy kýálik berilip, eger ol AQSH-qa qonsa, shpıon retinde tutqyndalmaýy úshin qoldanylýy tıis boldy. Máskeý BUU rezolúsıasyna súıenip, halyqaralyq qoldaý suraýdy josparlaǵan.

Úsh qupıa konvert

Sol kúni keńestik BAQ-qa arnalǵan úsh jabyq konvert daıyndaldy. Birinshisi – Gagarınniń sátti oralýyna baılanysty ǵarysh salasyndaǵy jetistikti jarıalaý úshin. Ekinshisi – ǵaryshker qaza tapsa, onyń erligin atap ótip, ulttyq aza jarıalaý týraly. Úshinshisi – Gagarın elinen alys jerge qonǵan jaǵdaıda, izdeýge kómek suraýǵa arnalǵan úndeý. Baqytymyzǵa oraı, tek birinshi konvert qana qoldanyldy. Iýrıı Gagarın aman-esen oralyp, tarıhqa alǵashqy ǵaryshker retinde endi.