InfoHub Logo

Mamandyq... Osy bir 8 áripti sózdi estigende tula boıymdy úreı derti bıleıdi. Bolashaq ómirim osy sózge tikeleı baılanysty sekildi. Ony durys tańdasam, aıym ońynan týyp, jolym bolady. Al tańdaýym qate bolsa, ómir boıy ókinip ótetindeımin. Mamandyqty bıyl tańdadym. Naqty sheshim qabyldap, bir mamandyqty tańdaý ózim oılaǵandaı ońaı bolmady. Óz qabiletterim men qyzyǵýshylyqtaryma, ańsaǵan armandarym men materıaldyq jaǵdaıyma baılanysty mamandyq tańdaý mısıasyn da oryndadym. Men jýrnalıs bolamyn dep sheshim qabyldadym. Bylaısha aıtqanda, „Óner” atty bıik shyńnyń alǵashqy baspaldaǵyna mingeli turmyn. Óner joly – aýyr jol. Aýyr bolsa da shydaımyn dep ýáde berdim ózime. „Dál osy mamandyqty nege tańdadyń?” – dep suraıtyndar da joq emes. Alys-jaqynnyń bári sony bilýge qushtar. Rasynda da meniń nege jýrnalıs bolǵym keledi?

Men bala kúnimnen túrli jarystarǵa qatysyp, sahna áleminde baǵymdy talaı ret synadym. Bir kezderi jeńis týyn jelbiretsem, keıde óz jolymdy qarsylastaryma beretinmin. Sahnaǵa shyqqan alǵashqy kúnderden sahnada óner kórsetýdiń ózime jarasatynyn, bul ónerdi ári qaraı shyńdaý qolymnan keletinin túsindim. Bala kúnnen óner adamy bolýdy, sonyń ishinde jýrnalıs bolýdy armandaýshy edim. „Bireýdiń arman-maqsatyna kúlmeńiz. Aldymen óz armanyńyz týraly oılanyńyz” degen naqyl sóz bar eken. Alaıda meniń armanyma kúlgender kóp boldy. „Saǵan jýrnalıs bolý qaıda?”, „Jýrnalıs bolý erikkenniń ermegi deımisiń?” degen pikirlerdi jıi estýshi edim. Osy sózderdi janyma jaqyn adamdardan estigende ózimdi qoıarǵa jer tappaı, kóńil-kúıim túsetin. Ýaqyt óte olardyń sózderiniń ózime paıdasy tıip jatqanyn túsindim. Men ózge adamdar aıtqan sózderden keıin ǵana áreket etýdi bastaǵan ekenmin. Olardyń sózderi meni jigerlendirýshi sózder bolǵan sekildi. Sol sózderdiń arqasynda baǵyndyrǵan belesterim men asqan asýlarym aıtarlyqtaı kóp boldy. Biraq pikir aıtýshy adamdar óz oılarynda qaldy, ózgertpedi. Solarǵa ózimniń jeter jetistikterimniń alda ekenin, jýrnalıs bolý maǵan arnalǵan mamandyq ekenin dáleldeý úshin óner jolyna tústim.

Men ózimdi shyǵarmashyl adammyn dep esepteımin. Maqtanǵanym emes, bir boıymda birneshe ónerdiń bar ekenin janymda júrgender jaqsy biledi. Men sýret salamyn, mánerlep óleń oqımyn, esse-shyǵarmalar jazamyn, keıde óleń qurastyratynym jáne bar. Ýaqytymdy bosqa ótkizip jatqan joqpyn. Bos ýaqytymda jańalyq tyńdaǵandy, ataqty adamdardyń ómirbaıandaryn oqyǵandy janym súıedi. İshindegi maqsatymyz bir, uqsas minez-qulyqtarymyz bar adamdardy kýmırlerim dep esepteımin. Olarǵa qarap shabyt alyp, ózimniń kemshilikterimdi túzeýdemin. Meni qýantatyny – olardyń sanynyń kúnnen-kúnge ósýi. Osy kúnge deıin kýmırim dep sanaıtyn birneshe adamdy kózbe-kóz kórdim. Olarmen suhbattasý bylaı tursyn, shama-sharqym amandasý jáne sýretke túsýmen shekteldi. Buǵan da rızamyn. Sol kisilerdi kózbe-kóz kórgende ishimde birtúrli sezimder paıda bolyp, tilim baılandy da qaldy. Endigi maqsat – kýmırlerimmen tildesý. Olardyń oıynda ózim týraly jaqsy pikir qalyptastyrý. Meniń úlgi tutatyn adamdarymnyń qatarynda tek qana qazaqtar emes, álem juldyzdary da bar. Olarmen suhbattasý úshin qosymsha aǵylshyn tilin de úırenýdemin. Álem juldyzdarymen tildesýdegi negizgi maqsat – Qazaqstandy álemge basqa qyrynan tanytý, ózimniń basqa da múmkindikterimdi jaqsy jaǵynan paıdalaný. Demek kýmırlerimmen tildesý úshin kásibı maman, jýrnalıs bolýdyń paıdaly ekeni belgili boldy.

Men úıdegi jalǵyz qyzbyn. Aǵam jáne inim bar. Eki jigittiń arasynda óskendikten be er bala sekildimin. Kıim-kıisim, júris-turysym bári-bári er balanykindeı. Aǵam ylǵı izdeniste júretin, jańalyq oılap tabatyn. Naqyl sózder jazylǵan kitaptan „Arbanyń aldyńǵy aıaǵy qaıda dóńgelese, artqy aıaǵy da sonda dóńgeleıdi” degen joldardy oqyǵanmyn. Bul ras eken. Men de aǵamnyń jolyna tústim. Meni de jańa dúnıeler oılap tabý qyzyqtyrdy. Soǵan baılanysty mamandyq ta izdedim. Sonda jýrnalısıkanyń ylǵı izdeniste júretin adamdy tárbıeleıtin mamandyq ekenin bir jerden oqydym. Ári qaraı izdenisimdi jalǵastyra tústim. Jýrnalıs mamandyǵynyń jaqsy jáne jaman qyrlaryn ózimshe salystyrdym. Árıne, jaqsy jaǵy basym boldy. Sondyqtan da tańdaýym jýrnalısıka bolyp otqan joq pa?! Jýrnalıs bolý ońaı emes. Olardyń basy ylǵı qaýip-qaterde júredi. Olar halyqqa jaǵymdy bolý úshin árqashan shyndyqty aıtýy qajet. Shyndyq aıtylǵan jerde ǵana halyq pen jýrnalısiń arasynda berik baılanys bolady. Al men ózimniń árdaıym shyndyqty aıtyp, halyqtyń muń-muqtajyn bılik basyndaǵylarǵa jetkizemin dep ýáde beremin. 

Qazirgi tańda armanym men alǵa qoıǵan maqsatym bar. Baqyt qushaǵynda tek alǵa jeteleıtin sebep jáne sebepker jandar bar. Maqsatymdy jelken, armanymdy eskek etip, ómir atty teńizdi júzip ótýge daıynmyn. „Bismillá, E, Alla, óziń jar bol” – dep, armanǵa jetý jolyna da tústim. Sáttilik serigim bolsyn!

---