InfoHub Logo

Ulttyq biryńǵaı testileý. Osy úsh aýyz sóz árbir 11-synyp oqýshysynyń boıyna qorqynysh, sanasyna úreı uıalatady. 11 jyl boıy oqyǵan eńbegim aqtalady ma, testileýden ózim qalaǵan upaıdy jınaı alamyn ba degen sansyz oılar oqýshy sanasyn jaýlaıdy. Testileýden keıin biri ózi oılaǵan upaıdy jınap masattansa, endi biri daıyndalmaı-aq joǵary nátıje kórsetedi. Keıbir túlekter jyl boıy daıyndalyp, osy testileýde joly bolmaı, tómen kórsetkishke ıe bolady. Sondaı túlekterge aıtarym: bul ÓMİRdiń sońy emes!

Ózim UBT-ny bıyl tapsyrdym. Jyl boıy 5 pánge daıyndalyp, sońǵy 2 aıda 2 pánge ǵana zeıin qoıyp, testileýdi oıdaǵydaı tapsyrdym. Qorytyndysy da kóńil qýantty. Mejeli 40 upaıdyń 38-in jınadym. Grantqa túsýime de múmkindik jetkilikti. Báz bireýler osy upaıdy uıaly telefon, shpargalkanyń kómegimen alǵan shyǵar. Al meniń nátıjem taza ózimniń eńbegim bolatyn. Sizderge keńes keler jylǵy túlekter, 11-synyp oqýshylary:

– Jaratqanǵa senińizder. Ol sizdiń nátıjeńizdi oń nemese teris qylatyn kúshke ıe. UBT úshin oraza tutý qate pikir sekildi. Uıyqtar aldynda jýynyp, tazaryp jatyp, tilek tileseńiz, ol qabyl bolady. Mańyzdysy Allaǵa degen senimińizdi joǵaltpańyz. Tómen nátıje kórsetseńiz nalymańyz, qýanyńyz. Sizdi alda jaqsy jańalyq kútip tur;

– Ózińizdi kez kelgen jaǵdaıǵa moralno daıyndańyz. Siz aldyńyzda ne bolatynyn bilmeısiz. Biraq UBT jaıly eń aldymen oılaıtynyńyz jaǵymsyz pikirler (óte almasam ne bolady, ata-anamnyń aldynda uıatqa qalam ba t.s.s.) Osy oılardy jaǵymdyǵa ózgertińiz. Árdaıym oılaıtynyńyz jaqsylyq bolsa, ol mindetti túrde oryndalady;

– Barlyq nátıjege óz kúshińizben jetińiz. Aıanbaı eńbektenińiz. Túnderińiz uıqysyz ótse de, daıyndyqtan bas tartpańyz. Qazir qınalyp oqısyz, alaıda nátıjesin bolashaq kórsetedi;

– Jas túlek uıaly telefon, shpargalkaǵa múldem senbeńiz. Ózińizge, ózińizdiń túısik, sana-sezimińizge senińiz. UBT sizge mektepte ótetin testileý emes. Ol jerde bári basqasha. Shpargalkadan izdegen suraǵyńyz shyqpaýy, glýshıteldiń kesirinen telefonda baılanys bolmaýy múmkin. Al siz barlyq jaǵdaıǵa daıyn bolý kereksiz;

– Janyńyzdaǵy dostaryńyz testileýge daıyndyq júrgizbese, olarǵa ermeńiz. Ózińiz jeke daıyndalyńyz. Siz jeke tulǵasyz, jeke tulǵa bireýge erýge mindetti emes. Kerisinshe, olardy sońyńyzdan erte bilińiz. Daıyndyqqa qyzyqtyryńyz. Daıyndyq ýaqytynda bir bastan eki bas jaqsy;

– Mektep oqýlyqtaryn oqyńyz, sodan soń ǵana test jasańyz, bilmeıtin suraqtaryńyzdy izdep, taýyp, bir jerge túrtip qoıyńyz. Oqýlyqty túgel oqýǵa shamam jetpeıdi, ýaqytym joq deseńiz, logıkaǵa salatyndaı etip oqyńyz;

– Kez kelgen oqıǵa esińizde jaqsy saqtalý úshin oqýlyqtyń janyna qaǵaz ben qalam alyp, túsingenińizdi qaǵazǵa túsirińiz. Jazbańyz, sýretin salyńyz. Bul – este saqtaýdyń eń tıimdi tásili.

Osy keńester sizge oń paıdasyn tıgizedi dep senemin. Sáttilik oqyrman, sáttilik jas túlek!

---