InfoHub Logo

«Adam – óz ómiriniń sýretshisi. Ol ómirdi syrlap boıaýǵa, oǵan ajar, túr berýge, ony áshekeılep, órnekteýge eńbek etedi»,-dep B.Bulqyshev dál taýyp aıtqan eken. Rasymen de, ómirimizdiń  sándi de mándi  bolýy tek qana ózimizge baılanysty. Jer basyp júrgen adam balasynyń árqaısysy óz taǵdyrynyń aldynda asa úlken jaýapkershilikke ıe. Bárimizdiń kóksegenimiz bir- buralańy men soqpaǵy kóp osynaý ómir jolynda ańsaǵan armanǵa adaspaı jetip, baqytty bolý. Ókinishke oraı, bul kez kelgenniń qolynan kele beretin ońaı is emes. Naǵyz baqytqa qol jetkizý úshin boıymyzda sarqylmas tózim, qaıtpas qaısarlyq, jasymas jiger tárizdi qasıetterdiń bolýy mańyzdy ekeni  belgili. Alaıda, meniń oıymsha, eń aldymen talap eterlik qasıet - óz ómirine degen jaýapkershilikti sezine bilý. Iá, óz moınyńdaǵy ómirlik maqsat-mindetińdi durys túsinip, isińe jaýapty bolǵanda ǵana túrli kedergilerden  súrinbeı ótesiń. Kórnekti ǵalym Qanysh Sátbaevtyń: «İsińizge, eńbegińizge, oqýyńyzǵa naǵyz adamgershilikpen qarasańyz, sóz joq, jeńiske jetesiz» degen sózi barshamyzǵa úlgi bolarlyq.   
Adam balasy eseıgen saıyn  taǵdyrdyń synaqtary da kóbeıe beredi emes pe?! Men úshin mundaı synaqtardyń alǵashqysy  bilim báıgesi UBT bolatyn.  Ózim qalaǵan  oqý ornyna túsip, ańsaǵan mamandyǵymnyń ıesi ataný úshin bul istiń menen úlken jaýapkershilikti talap etetinin túsindim.Sondyqtan da óz-ózimdi qolǵa alyp, jalqaýlyǵymdy jeńip, kúndiz-túni oqýmen boldym. Aqyry, talpynysym men izdenisim, tynymsyz eńbegim jemisin berip, bul synaqtan súrinbeı óttim. Joǵary nátıjege qol jetkizip, ǵylym- bilimniń qarashańyraǵy QazUÝ-dyń stýdenti atandym. Árıne,  negizgi aıtpaǵym bul emes, synaqtardyń bári áli alda. Tańdaǵan kásibim - jýrnalısıka naǵyz myqtylardyń ǵana aınalysatyn isi bolǵandyqtan, alda talaı «maıdannyń» ortasynda júretinim aıtpasam da belgili.. Túsingenim- ómirdiń talaby- basqa túsken kez kelgen qıyndyqqa moıymaı,  aıanbaı kúresý. Al meniń basty ustanymym-árdaıym maqsatyma myǵym, armanyma adal bolý. Árkim óz ómiriniń qojaıyny, sondyqtan onyń jaqsy ne jaman bolýyna tek qana ózimiz  sebepshimiz. Qandaı iste bolmasyn, ony abyroımen atqaryp,senimdi aqtap shyǵýǵa barynsha tyrysamyn. Sebebi, men óz ómirime JAÝAPTYMYN!
 

---