InfoHub Logo

Májilis depýtaty Erlan Saırov «QazaqGaz» ulttyq kompanıasynyń jumysyna qatysty alańdaýshylyq bildirip, 10 myńǵa jýyq qyzmetkerdi qysqartyp, bosaǵan qarajatty óńirlerdi gazdandyrýǵa baǵyttaýdy usyndy. Bul týraly Infohub.kz aqparat agenttigi habarlaıdy.

Depýtattyń aıtýynsha, kompanıa jylyna shamamen 350 mıllıon tekshe metr gaz óndiredi, biraq ony tıimdi paıdalanýda suraqtar týyndaıdy. Saırov bul kórsetkishtiń tıimsizdigin alǵa tarta otyryp, shtatty qysqartý qajettigin málimdedi.

Gazdandyrý máselesiniń ózektiligi

«XXI ǵasyrda Soltústik Qazaqstan, Pavlodar, Abaı jáne Shyǵys Qazaqstan oblystarynyń turǵyndary áli kúnge deıin úılerin kómirmen, otynmen jylytady. Bul – uıat jaǵdaı», – dedi depýtat.

Ol sondaı-aq, energetıka vıse-mınıstri Qaıyrhan Tutqyshbaevtyń jaýabyna qanaǵattanbaǵanyn jetkizdi. Mınıstrlik resýrstyq bazany keńeıtýge, geologıalyq jumystarǵa jáne zaýyttar salýǵa basymdyq berip otyrǵanymen, aýyldyq jerlerdi gazdandyrý máselesi áli de ózekti bolyp qalýda.

Halyqtyń aqshasy halyqqa jumsalýy tıis

«Bos otyrǵandardy jumystan shyǵaryp, olardyń aqshasyn aýyldarǵa gaz júrgizýge baǵyttaý kerek. Bul – halyqtyń aqshasy, sondyqtan árbir qadam halyqtyń ál-aýqatyn jaqsartýǵa baǵyttalýy tıis», – dep atap ótti Erlan Saırov.

Buǵan deıin Prezıdent Qasym-Jomart Toqaev ta «Samuryq-Qazyna» qoryndaǵy sıaqty ulttyq kompanıalarda «eshnárse istemeıtin» qyzmetkerlerdiń bar ekenin aıtqan bolatyn.