InfoHub Logo

Qazaqstan muǵalimderiniń eńbek jaǵdaıy men jalaqysy boıynsha álemdik kóshbasshylar qataryna qosylǵany týraly Oqý-aǵartý mınıstrliginiń málimeti kópshilikti tań qaldyrdy. Mınıstrlik málimetinshe, 2018 jyly muǵalimderdiń 39%-y ǵana jalaqysyna qanaǵattansa, 2024 jyly bul kórsetkish 71%-ǵa jetken. Tipti, pedagogterdiń 95%-y jumysyna kóńili tolyq tolatynyn aıtyp, kásibı qanaǵattanýdyń joǵary deńgeıin kórsetipti. Sońǵy jyldary mektep muǵalimderiniń jalaqysy eki ese ósken delinedi.

Bul týraly Infohub.kz aqparat agenttigi habarlaıdy.

Resmı málimet pen shyndyq

Alaıda, muǵalimderdiń ózderi bul málimetterge kúmánmen qaraıdy. 20 jyldyq ótili bar, "pedagog-sheber" ataǵy bar Gúlnar Esenjolqyzynyń aıtýynsha, onyń jalaqysy 2021 jyly 380 myń teńge (shamamen 909 dollar) bolsa, qazir 520 myń teńgege (shamamen 1,1 myń dollar) deıin ósken. Bul ósim tájirıbesi men biliktiligine baılanysty ekenin aıtady. Al ózge áriptesteriniń jalaqysy 500 dollardan da aspaıtynyn jetkizdi.

Sarapshylardyń taldaýy

«Birinshi kredıttik búro» sarapshylarynyń zertteýi boıynsha, pedagogterdiń naqty jalaqysy 2023 jyldan beri ınflásıaǵa baılanysty tómendep keledi. Ótken jyly bilim berý qyzmetkerleriniń aılyǵy orta eseppen 322 myń teńgeden sál asqanymen, 12,3% ınflásıany eskergende, bul ósim baǵanyń ósýin óteı almaǵan.

Halyqaralyq reıtıńtegi ornymyz

Visasam portalynyń málimetinshe, ómir súrý quny men salyqtardy eskergende, Qazaqstan muǵalimderiniń jalaqysy boıynsha 52 eldiń ishinde sońǵy oryndarǵa jaqyn ornalasqan. Barlyq salyqtar men ınflásıany eseptegende, qazaqstandyq muǵalimder qolyna orta eseppen shamamen 486 dollar alady. Bul kórsetkish boıynsha tek Nıkaragýa, Aljır, Qyrǵyzstan sıaqty elder ǵana artta qalyp otyr.

Salystyrmaly túrde, Shveısarıada muǵalimder aıyna 6240 dollar, Germanıada 4390 dollar, Japonıada 4000 dollar, al AQSH-ta orta eseppen 3900 dollar jalaqy alady.

Zańnama men júkteme

Májilis depýtaty Irına Smırnovanyń aıtýynsha, muǵalimderdiń jalaqysynyń tómendeýine birneshe faktor áser etedi. Sonyń biri – muǵalimderge 1,5 stavkadan artyq sabaq berýge tyıym salynýy. Buryn muǵalimder kóbirek tabys tabý úshin 10-12 saǵatqa deıin sabaq bere alatyn bolsa, endi bul múmkindik shektelgen. Bul keıbir muǵalimderdiń aıyna 100 myń teńgege deıin tabystan qaǵylýyna ákep soqtyrǵan.

Sonymen qatar, keıbir muǵalimderdiń buryn alǵan sanattaryn rastaı almaýy da tabysynyń azaıýyna sebep bolǵan. Attestasıa prosedýrasynyń kúrdeliligi de bul máseleni ýshyqtyra túsken.