InfoHub Logo

Qazaqstannyń joǵary oqý oryndary men ǵylymı-zertteý ınstıtýttary kadrlar daıarlaý, zertteýler júrgizý úshin birlese jumys isteýi tıis.

Bul týraly óziniń Facebook paraqshasynda QR Bilim jáne ǵylym mınıstri Asqat Aımaǵambetov jazdy.

«Qazaqstannyń joǵary oqý oryndary men ǵylymı-zertteý ınstıtýttary kadrlar daıarlaý, zertteýler júrgizý úshin birlese jumys isteýi tıis Osy turǵydan alǵanda ýnıversıtetter men ǵylymı-zertteý ınstıtýttarynyń múmkindikterin biriktirý mańyzdy. Bul jumysty júıeli túrde uıymdastyrý úshin JOO men ǴZI arasynda kelisimderge qol qoıyldy»,-dep jazdy, Asqat Aımaǵambetov.

Osy baǵytta birlesken jumysty atqarǵan uıymdar jaqsy nátıjege qol jetkizip jatqanyn kórip otyrmyz. Keıbir uıymdar osy baǵyt boıynsha jumystaryn uıymdastyrýda. Ál-Farabı atyndaǵy Qazaq ulttyq ýnıversıteti men Bıologıalyq qaýipsizdik problemalarynyń ǵylymı-zertteý ınstıtýtynyń yntymaqtastyǵyna úlgi retinde qaraýǵa bolady. Birlese jumys isteýdiń arqasynda «Vırýsologıa» atty jańa baǵdarlama ázirlenip, birlesken dısertasıalyq Keńes quryldy. Sonymen qatar ýnıversıtet stýdentteri koronavırýsqa qarsy vaksına jasaǵan ǵalymdarmen ózara baılanys ornatty.

Joǵary oqý oryndary men ǴZI ıntegrasıasy ne úshin qajet jáne onyń nátıjesi qandaı bolmaq?

1. ǴZI-larda jumys isteıtin jetekshi ǵalymdar joǵary oqý oryndaryna sabaq berýge tartylatyn bolady. Sondaı-aq olar stýdentterdiń ǵylymı jobalaryna jetekshilik etedi. Qol qoıylǵan kelisimsharttarǵa sáıkes birinshi kezeńde bul jumysqa 300 ǵalym qatysatyn boldy. Osy ýaqytqa deıin ǴZI-larda jumys isteıtin ǵalymdar bilim berý júıesine kóp aralaspady, degenmen olardyń stýdentterge sabaq berýi mańyzdy.

2. Joǵary oqý oryndary men ǴZI bastapqy kezeńde kadrlar daıarlaý úshin 500 bilim berý baǵdarlamasyn ázirleıdi. Ǵylymı zertteýlerdiń nátıjeleri bilim berý prosesinde qoldanylatyn bolady. Sondaı-aq kadrlardy daıarlaý boıynsha birlesken jumys júrgiziledi.

3. Magıstranttar men doktoranttar ǵylymı-zertteý ınstıtýttaryna bara alady jáne olardyń laboratorıalary men bazasy olar úshin ashyq bolady. Kelisimder aıasynda Ulttyq ıadrolyq ortalyqta, Iadrolyq fızıka ınstıtýtynda, Ulttyq bıotehnologıalar ortalyǵynda, Bıologıalyq qaýipsizdik ınstıtýtynda jáne t.b. biregeı ǵylymı zerthanalarda taǵylymdamadan ótý týraly ýaǵdalastyq kózdelgen.

4. Sondaı-aq júzden astam birlesken dısertasıalyq keńester jumysyn júrgizedi, olardyń quramyna joǵary oqý oryndarynyń, ǵylymı-zertteý ınstıtýttarynyń da qyzmetkerleri kiredi. Ókinishke qaraı, osy ýaqytqa deıin ǴZI ǵalymdary dısertasıalyq keńesterdiń jumysyna asa aralaspaǵan.

5. E-lab aqparattyq júıesin qurý týraly sheshim qabyldadyq. Osy júıeniń kómegimen bizdiń ǵylymı qyzmetkerler elimizdiń qaı ýnıversıtetinde nemese ınstıtýtynda qandaı zerthana bar ekenin kóre alady jáne aldyn ala jazylyp, olardyń tehnıkalyq múmkindikterin paıdalana alady. Bul mańyzdy joba, óıtkeni bizdiń ýnıversıtetterde ártúrli zerthanalar bar jáne olardy tolyǵymen paıdalaný qajet.

«Biz qabyldap jatqan sharalar ǵylymı zertteýlerdiń sapasyn jaqsartýǵa, ǵylymı kadrlardy daıarlaýdyń tıimdiligine baǵyttalǵanyn jáne talantty jastardy ǵylymǵa tartýǵa jáne qyzyqtyrýǵa kómektesetinin atap ótkim keledi»,-dedi mınıstr.

---