InfoHub Logo

Qazaqstannyń ekinshi atom elektr stansıasy (AES) Balqash mańynda salynatyny belgili boldy. Bul týraly Atom energıasy agenttiginiń tóraǵasy Almasadam Sátqalıev málimdedi. Onyń aıtýynsha, jobanyń jumys ataýy – AES «Moıynqum».

Bul týraly Infohub.kz aqparat agenttigi habarlaıdy.

Jobanyń egjeı-tegjeıi

Almasadam Sátqalıevtiń sózinshe, qazirgi tańda Balqash óńirinde úsh perspektıvaly alań qarastyrylýda. «Ekinshi stansıa boıynsha sheshim qabyldandy. Ol da Balqash mańynda ornalasady. Qazir úsh alań zerttelip jatyr. Qarastyrý nátıjesinde naqty ornalasatyn jeri týraly habarlaımyz», - dedi agenttik basshysy.

Jobanyń jumys ataýy – AES «Moıynqum». Jańa AES árqaısysynyń qýattylyǵy 1200 megavatt bolatyn eki energobloktan turady dep kútilýde.

Tehnologıa jetkizýshisi anyqtalýda

Agenttik basshysynyń aıtýynsha, tehnologıa jetkizýshini tańdaý boıynsha áleýetti seriktestermen kelissózder júrgizilýde. Ol Qytaıdyń China National Nuclear Corporation kompanıasy basym seriktes retinde qarastyrylatynyn eske saldy.

Esterińizge sala keteıik, ótken jyldyń kúzinde Qazaqstanda birinshi AES-tiń ataýy anyqtalǵan bolatyn. Azamattardan túsken usynystardyń basym kópshiligin alǵan «Balqash» atom elektr stansıasy» ataýy baıqaý komısıasynyń qorytyndy otyrysynan keıin jeńimpaz dep tanyldy.

Buǵan deıin 2050 jylǵa deıin Qazaqstanda keminde úsh AES paıdalanýǵa berý josparlanǵany habarlanǵan bolatyn. Sonymen qatar, tórtinshi stansıanyń qurylysy boıynsha jobany iske asyrý kózdelgen.

Memleket basshysynyń bastamasy

2025 jyldyń naýryz aıynda Memleket basshysy Qasym-Jomart Toqaev Ulttyq quryltaı otyrysynda Qazaqstanǵa bir emes, úsh AES salý strategıalyq mańyzdy ekenin málimdegen edi. Prezıdent aldaǵy ondaǵan jyldar boıy ekonomıkalyq damýdyń berik negizin qamtamasyz etetin jańa energetıka salasyn qurý Qazaqstan úshin strategıalyq mańyzdy ekenin atap ótti.

2025 jyldyń shildesinde birinshi vıse-premer Roman Sklár Qazaqstandaǵy ekinshi jáne úshinshi AES-ti qytaılyq tarap salatynyn habarlaǵan bolatyn.