InfoHub Logo

Qut bolsyn baqytyńnyń oramaly
(Sińlilerdiń ápkelerge tilekteri)

Demeımiz kún kúńgirt bop, tań adasty,
Sonda da, ápke, shattyq, muń aralasty.
Bizdiń úıden bastalǵan bir soqpaq jol
Seni bizden baqytqa ala qashty.

Ala qashty, qaıteıik, shattyǵyńa,
Uzatyp saldy ózińdi baq qyryna.
Qaramaıdy eken - aý qyz baqyty
Bosaǵanyń bógdelik, jattyǵyna.

Buıyrtqan sodan qyzdyń nesibesin,
Elemeseń, ómirden keshigesiń.
İlestiń sen de, ápke, búgin, mine,
Sol baqyttyń máńgilik kóshine shyn.

İles, ápke, sońyńa qaramaǵyn,
Sonda yrǵaqty, baqytty bolady ániń.
Tútini túzý ushqan óz úıińde
Jelbirep júredi endi oramalyń.

***

Toı bastaldy, ala kelip izgi únin,
Tergendeı - aq shattyq - jyrdyń biz gúlin.
Tolqynyspen, qýanyshty ánmenen
Uzatylyp bara jatsyz siz búgin.

Baqyt joly soqpaq emes belgisiz,
Mahabbat ta qıal emes sengisiz.
Sondyqtan da sol qasterli jolmenen
Uzatylyp bara jatsyz endi Siz.

Degendeı - aq osy jolda elengin,
Alys bolsyn degendeı - aq senen muń.
Aıtylady appaq qardaı tilekter,
Sizge tilep jaqsylyǵyn Álemniń.

Siz terýge bara jatsyz baq gúlin,
Araı bolyp aldyńyzdan atty Kún.
Osy jolda bosaǵasyn attaıtyn
Sezinińiz shańyraqtyń shattyǵyn.

Aralańyz adaldyqtyń qut - baǵyn,
Kılikpesin baqytty osy jupqa muń.
Bosaǵasyn kıeli etip otaýdyń,
Berik etsin shańyraǵyńyzdyń ýyqtaryn.

Tursyn shattyq janyńyzda jańǵyryp,
Aldyńyzdan atsyn ár kez tań kúlip.
Jezdemizben qadamyńyz qol ustasqan
Baqyt jolǵa aınalsynshy máńgilik!

***

Qaldyryp qımas sátin qyz kúnińniń,
Tolqytyp, artqa tastap bizdi búgin.
Barasyń, ápke, asyǵyp baqytyńa,
Jar bolý degendeı - aq izgi uǵym.

Barasyń ishtegi bir qozǵap úndi,
Toıyńda tilekshiden sóz de aǵyldy.
Saǵynyp júresiń - aý endi, ápke,
Kýási qyz kúnińniń - óz baǵyńdy.

Belgili bosaǵańdy baǵalaryń,
Jaryńmen tatý bolsyn aralaryń.
Sol baǵyń - súıgen jardyń shańyraǵy,
Taqqan soń kelindiktiń oramalyn.

Jubaılyq joldyń solaı izgi órnegi,
Oılattyń baqyt jaıly bizge árneni.
Sol baqqa soqpaq salar árbir qyzdyń
Tutamdaı eken, ápke, qyz - dáýreni.

***

Asyǵyp olar baqyt kóktemine,
Tilekshi boldyq shattyq sátterine.
Baqyttyń bıigine umtyldyńyz
Aq kóılek kıip siz de, ápke, mine.

Darytyp sizderge endi bata - nurdy,
Sezimniń tańy baq bop ata bildi.
Jazsyn dep toıyńyzda biz tileıik
Bir sizge syıly kelin atanýdy.

Nıet qyp tek jaqsylyq jolyǵaryn,
Árbir kún qossyn baqtyń baǵyna ánin.
Berik qyp ómir baqyt bosaǵasyn,
Nur shalsyn jas otaýdyń shańyraǵyn!

***

Bilemin, ápke, óziń de baǵalandyń,
Baq jolyn júregińmen qalap aldyń.
Attaısyń endi ózge bosaǵany,
Sezesiń qasıetin oramaldyń.

Baǵyńa ómir deıtin qosady aǵyn,
Minsiz bop tursyn árbir jasaǵanyń.
Senemin, ápke, saǵan, óziń attar
Uǵasyń qasıetin bosaǵanyń.

Tilekshi saǵan, ápke, bári búgin,
Qarsy alar baqytpenen tańy gúlin.
Shaqyrdy sol tańyńa qyz soqpaǵyń,
Endigi túsiner dep jar uǵymyn.

Siń, ápke, sol jurtyńa baǵalan da,
Ómirdiń jaman jaǵyn qalap alma.
Syılaı bil kelindiktiń qasıetin,
Qasterlep túıgen baqyt - oramalǵa.

***

Toı shattyǵy sezilip kúıden búgin,
Ǵashyq júrek aıalar súıgen gúlin.
Seniń toıyń, ápketaı, baqyt toıy,
Sen qalyńdyq kóılegin kıgen kúniń.

Oıanǵanda baqyt bop aldan kúni,
Sol úmittiń, minekı, jalǵandy úni.
Búgingi toı, shattyq toı - seniń toıyń,
Ata - ananyń osy edi arman - kúni.

Qashanda qýanyshqa kende me elim,
Úmit artty saǵan da sengen eliń.
Aqtadyń da ómirde sol senimdi,
Atandyń, mine, ardaqty sen de kelin.

Saldy, mine, jas otaý bastapqy ánin,
Qalar em sol áýenniń asqaqtaýyn.
Sen ádemi kórindiń sol bir sazben,
Senimińdi ómirde qostap jaryń.

Shyrqańdar baqyt - sazdyń myń túrli ánin,
Qalarmyn ómir - baqtyń qulpyrǵanyn.
Saǵan baqyt tiler em úzilmeıtin,
Tiler em kirpigińde muń turmaýyn.

Sen ediń shańyraqtyń bir shynary,
Atandyń búgin jardyń gúl - syńary.
Jubaılar qalap tikken aq otaýdan
Baqyttyń endi úzilmeı tursyn áni.

Degende shattyq kúniń atypty nyq,
Tursynshy ár bir kezde ýaqyt kúlip.
Tórinen jas otaýdyń qashanda da
Uzamaı júrsinshi endi baqyttylyq.

Bas ıgen danalyqtyń sózderine,
Nur jaınar jas otaý da kózge, mine.
Aıdynnan ushyp shyqqan aqqýymyz
Qonyp tur baqyt izdep óz kóline.

Daq túspeı áýlet artqan senimge min,
Bolsynshy óziń qonǵan kóliń kerim.
Jubaılar jarastyqpen qol ustasqan
Baqyttan tursyn máńgi ómirleriń!

***

Dese de jyldy synaq, ýaqytty - syn,
Shyn sezim óz baqytyn tatypty shyn.
Ómirde qol ustasqan súıgen jarmen
Ápke, sen, shynynda da, baqyttysyń!

Qaramaı pende - ǵumyr kúıbeńine,
Barasyń óziń qalap súıgenińe.
Baq qonsyn, baqyt qonsyn árdaıym da
Senderdiń shattyq toly úılerińe.

Boıjettiń, aqyl - serik, adaspadyń,
Unaıdy súıgenińmen jarasqanyń.
Sińliń tileıdi endi ózderińe
Osynaý soqpaq - joldyń baq ashqanyn.

Sender jaq bolsyn baqyt, baq alańy,
Juldyzyń joǵarylap barady áli.
Qut bolsyn ómir boıy, ápke, saǵan
Sen taqqan baqytyńnyń oramaly,
Ápke!

Avtory:
Ǵabıden QOJAHMET,
Qyzylorda qalasy