InfoHub Logo

Qaraǵandy qalasyndaǵy Nazarbaev Zıatkerlik mektebiniń 10-synyp oqýshysy Evgenıa Mejenına bıologıadan ótken Open International Biology Olympiad (OIBO-2026) halyqaralyq olımpıadasynyń qola júldegeri atandy. Bul týraly Infohub.kz aqparat agenttigi habarlaıdy.

Olımpıada Reseıdegi «Sırıýs» federaldy aýmaǵynda ótti. Oǵan Qazaqstan, Túrkıa, Ońtústik Afrıka, Taıland syndy 17 elden 100-den astam úzdik jas bıolog qatysty. OIBO bıologıadan eń kúrdeli halyqaralyq olımpıadalardyń biri sanalady. Onda qatysýshylar teorıalyq bilimin ǵana emes, tájirıbelik zertteý daǵdylaryn da kórsete bilýi tıis.

Olımpıadaǵa daıyndyq

Evgenıanyń ǵylymı jetekshisi, bıologıa páni muǵalimi Qarlyǵash Joldybaevanyń aıtýynsha, olımpıadaǵa daıyndyq birneshe jylǵa sozylǵan. Sabaqtan tys ýaqytta kúrdeli taqyryptardy taldaý, olımpıadalyq esepterdi sheshý jáne qosymsha ádebıetterdi oqýmen aınalysqan. Daıyndyq barysynda zoologıa men botanıkadan bastap, bıoınformatıka men statısıkaǵa deıingi bıologıanyń barlyq baǵyttary qamtylǵan.

«Olımpıada tek mekteptegi bıologıa bilimin ǵana emes, sonymen qatar hımıa, fızıka, matematıka jáne ınformatıka pánderinen de jaqsy daıyndyqty talap etti. Ásirese, logıkalyq oılaý men bilimdi praktıkada qoldana bilý mańyzdy boldy», - deıdi muǵalim.

Kúrdeli tapsyrmalar

OIBO-2026 baǵdarlamasy teorıalyq týrlardy, kúrdeli zerthanalyq jumystardy jáne komandalyq zertteý jobasyn qamtydy. Tájirıbelik kezeńde qatysýshylar naǵyz zertteýshiniń daǵdylaryn kórsetýi kerek boldy. Eń qıyn tapsyrmalardyń biri – úsh mıllımetrden az bolatyn shybyn lıchınkasyn mıkroskop arqyly zertteý boldy.

Jobalyq týrda qatysýshylar halyqaralyq komandalarǵa bólinip jumys istedi. Qazaqstan quramasy Qara teńizdiń zooplankton bıoártúrliligin zerttedi. Oqýshylar jaǵalaýdaǵy sý synamalaryn jınap, sýdyń lastanýyn kórsetetin mıkroorganızmderdiń túrlerin anyqtady.

Bolashaqqa jol

Evgenıa Mejenınanyń aıtýynsha, olımpıada tapsyrmalary naqty ǵylymı jumystarǵa jaqyn jáne zertteý nátıjeleri praktıkalyq mańyzǵa ıe bolýy múmkin. Bul onyń alǵashqy jeńisi emes. Buǵan deıin ol respýblıkalyq olımpıada men Qazaqstan Bilim Olımpıadasynyń (QBO) jeńimpazy atanǵan. OIBO-2026 qola medali – bıologıadan álemdegi eń bedeldi jarys bolyp sanalatyn International Biology Olympiad (IBO) halyqaralyq olımpıadasyna daıyndyqtaǵy mańyzdy qadam boldy.

«Bul medal – IBO jolyndaǵy mańyzdy qadam. Halyqaralyq jeńister úzdik ýnıversıtetterge túsýden bastap, álemdik ǵylymı baǵdarlamalarǵa qatysýǵa deıingi úlken múmkindikter beredi», - dep atap ótti Qarlyǵash Joldybaeva.