Bir jerde kóp otyrsań jalǵyz óziń,
Kórmese kóńil ashar jandy kóziń.
Keıde ashshy, keıde tátti qıal bılep.
Ketetin bar emes pe bir mineziń?
Sende bar ondaı minez mende joq pa?
Sarǵaıǵan dertsiz aýrý elde joq pa?
Qus - torǵa, balyq - aýǵa, batyr - jaýǵa,
Jelikken jeldi aıaqqa kerme joq pa?
Qasynda júırik qıal sonda serik,
Basynda ásirese bolmasa erik.
Qaýlaǵan qalyń úmit kózge elestep,
Birese aýyr qaıǵy qaptar kelip.
Erkimen dýlyǵasyn erler tastap,
Bir jýan báıterekke kelse bastap.
Baı jomart, báıbishe de sarań emes,
Bolypty syı kórsetpek, qoınyn ashpaq.
Teńgege telmiretin erinshekter
Túspegen jelekteri kelinshekter.
Qaıyrmaı qaıyn atasyn, «uıalam» dep,
Bet basyp, syrt aınalyp, sheginshekter.
Keń ólke kelbet ketip munar basqan,
Bir shaqta seri jastar qumarlasqan.
Kóterip ókshelerin momyn jandar,
Qosh aıtqan, qol alysqan qıa almastan.
Taǵy da kóz aldymda bir jıyn-toı,
Úı tikken, oshaq qazǵan, soıylǵan qoı.
At shapqan, palýan túsken, serke tartqan.
Shattanǵan, kúlimdesken, tolqyǵan oı.
Bul topta bilimsiz de, bilgen de kóp,
Jan bolyp jaratylyp júrgen de kóp,
Kózinen jas aǵyzyp jylaǵanmen,
Semirip qara sýǵa kúlgen de kóp.
Mendaǵy jylaǵannyń biri ekenmin,
Qaıǵyryp solardy oılap júr ekenmin..
Aıamaı qany birge qastyq qylyp,
Shyǵa almaı bir tuıyqta tur ekenmin.
Súıisken, sóz berisken zamandastan
Qanshasy hal bilisken, amandasqan?
Syrt bergen, qol siltegen, kóbi umytqan,
Men miskin bulardy oılap qıal basqan.

---