InfoHub Logo

Avtory: Ǵabıden QOJAHMET, Qyzylorda qalasy

Soǵys jylǵy Analar
Soǵys jyldaryndaǵy Analarymyzǵa taǵzym!
Jeńistiń 70 jyldyǵyna arnalady.

Ótse de kún, esimiń eskeriler,
Urpaǵyńnyń jadynan óshpedińder.
Soǵys jylǵy Analar, óıtkeni ras,
Bolmysy asqaq, ózgeshe, basqa edińder!

Jan edińder qashannan eldikti uǵar,
Sol beıneńde óshpeıtin erlik turar.
Ulylyǵyńa ornatsa bir eskertkish,
Altynnyń da baǵasy kemdik qylar.

Soǵys úzdi shattyqty án - jyrlaryńdy,
Bes qarýyn boıyna ul da ildi.
Biledi urpaq olardy qan maıdanǵa
Shyǵaryp sap úmitpen turǵanyńdy.

Tynyshtyqtyń silkintip soǵys tańyn,
Kórdi uldardyń dushpanmen alysqanyn.
Berdi olarǵa kúsh - qýat aq tilegiń,
Túsirmedi erge tán namystaryn.

Uıalatar Ana ǵoı sanaǵa arman,
Jeteleıtin sol úmit balany aldan.
Namysty ul da týatyn shyǵar, bálkim,
Ózderińdeı namysty Analardan.

Almaq bop jaý beıbit el qalalaryn,
Oq daýsy úzdi bóbektiń balań ánin.
Sonda uldaryń maıdanda sábıler men
Qorǵap qalǵan olardyń Analaryn.

Joǵaltpady sol synda bozdaq aryn,
Soǵys keıde qaıǵynyń qozǵady ánin.
Ózderiń de baýyrǵa basqansyńdar
Pana izdegen ul - qyzyn ózge ananyń.

Ana sezim ortaq qoı balaǵa da,
Perzent te ortaq kóriner bar anaǵa.
Bólinbeıdi bul júrek ultqa múlde,
Syımaıdy eken bul sezim shekaraǵa.

Namysy bop tileýiń joryqtardyń,
Alańdaýmen júregiń toryqqan myń.
Sol jyldardyń Anasy, máńgi ózderiń
Analary soldattyń bolyp qaldyń!

Keler degen berilip senimge eren,
Meıirimderiń ortaq bop, bólinbegen.
Ana bolý sarbazǵa qashanda da
Otanyna Ana ol bolý degen.

Ótti ýaqyt..
Ana - úmit, Ana - arman
Qulyndaryn tosýmen jaralanǵan.
Soǵys búgin keshirim suraı qalsa,
Suraý kerek aldymen Analardan.

Peıili de, bir bolǵan tilegi elmen,
Sol aq tilek Jeńis bop kúle kelgen.
Myń dastanǵa laıyq jansyńdar - aý,
Jetpeıdi eken bolmysyń bir
óleńmen!

Jeńis

Sáýlesin shashyp túnekke,
Ysyryp jaýdy jer - kókten.
Qasiret tunǵan júrekke
Jeńis bop keldi sol kóktem.

Bar edi onyń salmaǵy,
Shattyqtyń ásem gúli atty.
Mıllıonnyń edi ol armany,
Mıllıondy qosa jylatty.

Erlikti jurty baǵalar,
İz qalǵan ótken jyldarda.
"Jeńis!" dep turdy qalalar,
"Jeńis!" dep turdy qyrlar da.

San ret el bop egildiń
Ýaqyttyń salǵan tezine.
Qymbat qoı quny ómirdiń,
Qymbatqa tústi ózi de.

Úmit bop elde jaǵyldy,
Qundy edi sosyn bul jeńis.
Ar júgi boldy arýdyń
Tyndyrǵan tylda irgeli is.

Keýdege tolyp armandy án,
Qasiret shegip soldy baq.
Jeńiske baryp jalǵanǵan
Soldattan kelgen sońǵy hat.

"Deýshi ediń, apa - aqyldym,
Qymbat dep quny ardyń da.
Bul hatty jazyp otyrmyn
Shabýylǵa shyǵar aldynda".

Eske alar sony oılanǵan,
Derek bop tústi búgin iz.
Bir habar jetken maıdannan:
"Boldy dep qaza ulyńyz..."

Jas urpaq úshin bar máni,
Kemitpes ol da baǵańdy.
Sonan soń soldat armany
Jelbirep kókke qadaldy.

Erlikti sodan taba aldyń,
Jigerge bólep óskindi.
Soǵystan soń da medaldiń
Syńǵyry bolyp estildi.

Tynyshtyq kúnnen nur tamdy,
Samǵady appaq qanatta.
Án bolyp sosyn shyrqaldy,
Óleń bop tústi paraqqa.

Zamanyń alǵa basar da,
Tarıhtan taǵlym tyńdatty oı.
Adamdar úshin qashanda
Jeńistiń quny qymbat qoı!

Soǵysty kórgen
taǵdyrlar

Qıyndyq kezeń syndary
Erliktiń otyn mazdattyń.
Soǵystyń surapyl jyldary -
Taǵdyry talaı bozdaqtyń.

Attanyp erdiń dúrmegi,
Otan dep keldi sóz basy.
Soǵystyń kúńgirt kúnderi -
Jesirdiń ashshy kóz jasy.

Alystap jyldar barady,
Bilinip ýaqyt baǵasy.
Soǵystyń zarly zamany -
Jetimniń qaıǵy, nalasy.

Erlikke tolyp ótkeni,
Umytylmaı turdy er isi.
Soǵystyń sońǵy kóktemi -
Soldattyń asqaq Jeńisi.

Jaqyny qamyǵyp oılanǵan,
Taǵdyry solaı bolsa bir.
Oralmaı qalyp maıdannan,
Habarsyz ketti qanshama ul.

Ósse de urpaq terbele,
Demeıik ótken solǵyndar.
Umytylmaı jatsyn keýdede
Soǵysty kórgen taǵdyrlar.

Salmaǵyn sodan uǵasyń,
Jeńistiń bilseń bul kúnin.
Osynaý kúnniń kýásin
Qurmetteı, urpaq, júr búgin!