InfoHub Logo

Talǵar aýdanynda 20 jastaǵy jigittiń toptasqan adamdardyń shabýylynan qaza tapqany týraly áleýmettik jelide taraǵan aqparatqa Almaty oblysy polısıa departamenti túsinikteme berdi.

Bul týraly Infohub.kz aqparat agenttigi habarlaıdy.

Oqıǵa 12 sáýirde Talǵar aýdanynda bolǵan. Áleýmettik jelidegi jazba avtorynyń aıtýynsha, 10-nan astam adam jigitke tutqıyldan shabýyldap, oǵan qorǵanýǵa múmkindik bermegen. Alǵan pyshaq jaraqatynan ol oqıǵa ornynda kóz jumǵan.

Jazba ıesiniń sózinshe, oqıǵa kýágerleri men vıdeojazbalar bar, biraq tek bir adam ǵana qamaýda otyr.

Polısıa jaýaby

Almaty oblysy polısıa departamentiniń málimetinshe, oqıǵa boıynsha eki qylmystyq is qozǵaldy: kisi óltirý jáne buzaqylyq.

Jedel-izdestirý sharalary barysynda 20 jastaǵy bir kúdikti ustalyp, qamaýǵa alyndy. Buzaqylyq faktisi boıynsha taǵy úsh kúdikti ustalyp, ýaqytsha ustaý ızolátoryna qamaldy. Ekeýine qatysty sot úı qamaǵyna alý týraly bultartpaý sharasyn tańdady. Al kámeletke tolmaǵan kúdiktige qatysty qoǵamnan oqshaýlamaıtyn bultartpaý sharasy qoldanyldy.

Polısıanyń habarlaýynsha, oqıǵa kýágerleri anyqtalyp, olar qylmystyq is aıasynda jaýap alynǵan. Qazirgi ýaqytta istiń barlyq mán-jaıyn jan-jaqty jáne obektıvti zertteýge baǵyttalǵan tergeý áreketteri júrgizilip jatyr. Barlyq taraptardyń ýájderi muqıat tekserilýde.

Tergeý barysy oblystyq polısıa departamenti basshylyǵynyń erekshe baqylaýynda.