InfoHub Logo

1994 jyly el tarıhyndaǵy eleýli kezeńderdiń birinde, qazan aıynda Joǵary Keńes Ákejan Qajygeldınniń premer-mınıstrligin bekitti. Alaıda, onyń orynbasary bolýǵa usynylǵan Altynbek Sársenbaıulynyń kandıdatýrasy talqylaýǵa túsip, depýtattar arasynda qyzý pikirtalas týdyrdy. Prezıdenttiń ózi qoldap otyrǵan tulǵaǵa qarsy shyqqan depýtat kim boldy jáne nege?

Bul týraly Infohub.kz aqparat agenttigi habarlaıdy.

Depýtattyń narazylyǵy

Altynbek Sársenbaıuly Joǵary Keńes minberine shyǵa bergende, «Bul joly prezıdent qatelesti» degen sózder jınalǵandardy eleń etkizdi. Bul sózderdi aıtqan – depýtat Altynshash Jaǵanova edi. Ol kezdegi jaǵdaıdy eske alǵanda, Jaǵanova bylaı deıdi: «Nursultan Ábishuly sizdiń kandıdatýrańyzdy qoldady jáne áli de qoldap keledi. Bul joly ol qatelesti».

Altynbek Sársenbaıuly buǵan jaýap retinde bolashaqta sóz bostandyǵyna kepildik beretin Konstıtýsıanyń ózi jetkilikti bolatynyn, baspasóz týraly zańnyń qajeti bolmaı qalýy múmkin ekenin aıtqan edi. Alaıda, ýaqyt óte kele bul boljam oryndalmady.

Ne sebepti qarsy boldy?

Keıinnen Ábish Kekilbaevtyń usynysymen daýysqa salynǵanda, Altynbek Sársenbaıulynyń kandıdatýrasyna 58 depýtat qoldap, 61 depýtat qarsy daýys berdi. Bul jaıttyń mán-jaıyn anyqtaý úshin Altynshash Jaǵanovamen tildeskende, ol bylaı dep túsindirdi: «Prezıdent qatty renjidi. «Alteke, munyńyz ne, ol jaqsy jigit» dedi. «Jaqsy emes, Nureke! Kóresiz áli» dedim. Mine, aıtqanym keldi. Óıtkeni biz depýtat bolar aldynda men bir jyl Almaty qalalyq keńesiniń depýtaty boldym. Sosyn bir jyldan keıin Joǵary Keńestiń depýtaty bolǵasyn, men ol jaqtaǵy jumysymnan bas tarttym. Sol ýaqytta qalada bul da (Altynbek Sársenbaıuly) depýtat boldy. Jurtty mensinbeı, aıtqan adamdardy qatty toıtaryp otyrdy. Tártibi sondaı boldy. Prınsıpteri basqasha bolatyn. Maǵan unamaıtyn áıteýir».

Sársenbaıulynyń pikiri

Altynbek Sársenbaıuly bul jaıtty keıinnen bylaısha eske aldy: «Meni bekitpegenine áli kúnge rızamyn, raqmet! Meniń ornyma bolǵan vıse-premerdiń kezinde búkil áleýmettik salanyń tas-talqany shyqty. Mektepter qysqardy, aýrýhanalar jabyldy, kitaphanalar ǵaıyp boldy. Ol kezde men jastaý edim. Solaqaı sheshimderdiń bárine tabandap qarsy turar edim dep aıta almaımyn. Eger sol kezde vıse-premer bolsam, tas-talqan bolǵan dúnıeniń obaly áli kúnge deıin moınymda turar edi. Meni sol joly Qudaı qaqty. Áli kúnge sol apaıymyzdy kórsem, raqmet aıtqym kep turady».