Photo: Orbit Communication (https://www.pexels.com/@orbit-communication-500637227) / Pexels
Venesýela faktory: munaı baǵasy 50$-ǵa túsýi, teńgeniń álsireýi yqtımal
Venesýeladaǵy bılik aýysýyna qatysty geosaıası shıelenis jahandyq munaı usynysyn kóbeıtip, baǵany tómendetýi múmkin. Bul Qazaqstan úshin eksporttyq kiristiń qysqarýy jáne teńge baǵamyna qysymmen ólshenedi, deıdi sarapshylar.
Bul týraly Infohub.kz aqparat agenttigi habarlaıdy.
Naryq qandaı senarıdi baǵalap otyr
Brent markaly munaı shamamen 61 dollar/barel deńgeıinde saýdalanýda. Qazaqstanda dollar aıyrbastaý pýnkterinde 513–516 teńgeden satylyp jatyr. Qysqa merzimde aıqyn ózgeris kútilmese de, uzaq merzimde Venesýela faktoryna baılanysty qubylmalylyq kúsheıýi yqtımal.
«Tikeleı áseri birden sezilmeıdi, yqpaly keminde bir jyldan keıin baıqalýy múmkin. Degenmen uzaq kókjıekte álemdik munaı baǵasy tómendeý traektorıasyna túsýi yqtımal», – dedi «Ulagat Consulting Group» kompanıasynyń dırektory Marat Qaıyrlenov.
Venesýeladaǵy qor jáne óndiris múmkindigi
Sarapshylardyń aıtýynsha, AQSH-taǵy Perm baseıni birtindep sarqylý satysyna jaqyndap keledi. Osy tusta álemdegi eń iri munaı qory bar Venesýelaǵa nazar aýysady. Elde ınfraqurylym tozǵanymen, qalpyna keltirý arqyly óndiris ósiminiń áleýeti bar: ýaqytynda Venesýela táýligine 2,5 mln barelge deıin óndirgen.
«Eger Venesýela munaıy naryqqa kóptep shyǵarylsa, 60 dollar deńgeıi saqtalmaı qalýy múmkin. Bazalyq senarı – barel úshin 50 dollar, al teris senarı – 40 dollarǵa deıin tómendeý», – dep baǵalady qarjy sarapshysy Arman Beısembaev.
Teńge men búdjetke yqpaly
Munaı arzandaýy aldymen eksporttyq túsimge jáne seriktes elderdiń valútasyna áser etedi: rúbldiń álsireýi saýda arnalary arqyly teńgege de qysym túsiredi. Teorıalyq turǵyda OPEK usynysty retteı alar edi, alaıda ótken jyly uıym óndiristi ulǵaıtyp, naryqtaǵy qysymdy kúsheıtti.
Qazaqstan óz múddesin iri jobalarda – Teńiz, Qashaǵan jáne Qarashyǵanaqta – qorǵaı beredi. Alaıda tasymal táýekeli saqtalyp otyr: Kaspıı qubyr konsorsıýmyna (KQK) jasalǵan shabýyldar byltyr aıdaýdaǵy kólemniń tómendeýine ákeldi. Sarapshylar mundaı ınsıdentterdiń, onyń ishinde tankerlerge qatysty da, qaıtalaný qaýpin joqqa shyǵarmaıdy.
Saıası fon: 3 qańtardaǵy operasıa
2026 jylǵy 3 qańtarda AQSH Venesýelada áskerı operasıa júrgizdi. Prezıdent Nıkolas Madýro elden áketilip, oǵan Nú-Iorkte esirtki terorızmi, kokaın jetkizýge sóz baılasý, qarý men jarylǵysh zattardy zańsyz saqtaý boıynsha aıyp taǵyldy. AQSH prezıdenti Donald Tramp Venesýeladaǵy jaǵdaı baqylaýda ekenin málimdedi.
Sarapshylar qysqa merzimde kúrt aýytqýlardy kútpeıdi, biraq uzaq merzim gorızontynda munaı naryǵyndaǵy jańa usynys teńge úshin qosymsha táýekel týǵyzýy múmkin ekenin eskertedi.
-
6 qańtarda QR DSM-niń SEBK qara shaıdyń birneshe úlgisinen ruqsat etilmeıtin boıaǵyshtar (E110, E102, E124) tapty. Birqatar markany ákelýge jáne satýǵa ýaqytsha tyıym salyndy.
-
Analysts say a potential rise in Venezuelan supply could drag Brent toward $50–40, squeezing Kazakhstan’s export revenues and weighing on the tenge over the longer term.
