InfoHub Logo

Qazaqstan Respýblıkasynyń Prezıdenti Qasym-Jomart Toqaev memlekettik qyzmetshilerge qatysty eki mańyzdy zańǵa qol qoıdy. Bul týraly Aqordaǵa silteme jasap Infohub.kz habarlaıdy.

Memleket basshysy «Qazaqstan Respýblıkasynyń memlekettik qyzmeti týraly» jáne memlekettik qyzmet máseleleri boıynsha zańdarǵa ózgerister men tolyqtyrýlar engizý týraly zańdarǵa qol qoıdy.

Memlekettik qyzmet týraly jańa zań ne ózgertedi?

«Qazaqstan Respýblıkasynyń memlekettik qyzmeti týraly» zańy memlekettik qyzmetke kirý jáne ony ótý tártibin jetildirýdi, personaldy basqarýdyń zamanaýı tetikterin engizýdi jáne memlekettik qyzmettiń tartymdylyǵyn arttyrýdy kózdeıdi. Zańda memlekettik qyzmetshilerdiń áleýmettik kepildikterin kúsheıtýge, quqyq buzýshylyqtardyń aldyn alýǵa baǵyttalǵan tártiptik praktıkany jetildirýge, sondaı-aq memlekettik organdarda tıisti qyzmet qurýǵa erekshe nazar aýdarylǵan.

Zań kadrlardy irikteý jáne baǵalaýdyń sıfrlyq quraldaryn engizýdi, tálimgerlik ınstıtýtyn damytýdy, sondaı-aq memlekettik emes sektordy qosa alǵanda, bilikti mamandardy tartýdyń qosymsha tetikterin qalyptastyrýdy qarastyrady.

Ózge zańnamalyq aktilerge engizilgen ózgerister

Memlekettik qyzmet máseleleri boıynsha zańnamalyq aktilerge ózgerister men tolyqtyrýlar engizý týraly zań memlekettik qyzmettiń servıspen jáne klıentke baǵdarlanǵandyq qaǵıdattaryna negizdelgen modeline kóshýge, memlekettik qyzmettiń gıbrıdti modelin qoldana otyryp, memlekettik apparatty kásibılendirýge, sondaı-aq HR-prosesterdi sıfrlandyrýǵa baǵyttalǵan. Onyń negizgi maqsaty – memlekettik qyzmet salasyndaǵy qoǵamdyq qatynastardy, sondaı-aq memlekettiń fýnksıalary men mindetterin iske asyrýǵa járdemdesýge baılanysty qoǵamdyq qatynastardy retteý.

Zańdardyń mátinderi baspasóz betterinde jarıalanady.