InfoHub Logo

Алматыдағы тарихи маңызы бар «Жас Отау» неке сарайының жаңғырту жұмыстары тағы да тоқтап қалды. Бұл жолы нысанды сенімгерлік басқаруға алған компаниямен келісімшарт бұзылды. Аталған ғимарат 1971 жылы ашылған және архитектуралық ескерткіш ретінде қорғалады.

Бұл туралы Infohub.kz ақпарат агенттігі хабарлайды.

«Жас Отау» неке сарайының жағдайы

Оншақты жылдан бері бос тұрған ғимараттың сыртқы көрінісі қала тұрғындарын алаңдатуда. Бұған дейін, 2026 жылдың ақпанында жүргізілген тексеріс кезінде ғимаратты күрделі жөндеуден өткізіп, жыл соңына дейін ашу жоспарланған болатын. Алайда, жағдай онша өзгермеген.

Қазіргі таңда ғимарат әлі де қаңырап тұр. Терезелері сынған, плиткалары құлап, қабырғаларына граффити жазылған. Құрылыс материалдары ақпан айынан бері сол күйі сақталып, құрылысшылар әлі көрінбеген. Ішке кіру мүмкін болмағандықтан, ғимараттың ішкі жағдайын толық бағалау мүмкін болмады.

Әкімдіктің жауабы

Алматы қаласының мемлекеттік активтер басқармасының мәліметінше, сенімгерлік басқарушы компания міндеттемелерін орындамағандықтан, келісімшарт бұзылуда.

«2024 жылғы 6 наурыздағы сенімгерлік басқару туралы шартқа сәйкес, «Jar Jar Almaty» ЖШС-на берілген болатын. Алайда, аталған серіктестік шартта көрсетілген міндеттемелерді орындамағандықтан, қазіргі уақытта келісімшартты бұзу рәсімдері жүргізілуде», - деп хабарлады басқарма.

Басқарманың айтуынша, 2024 жылы нысанды берген кезде әкімдік бірқатар талап қойған. Оның ішінде ғимараттың архитектуралық келбетін сақтау және реконструкцияға кемінде 1 миллиард теңге инвестициялау міндеттелген. Алайда, бұл жұмыстардың атқарылғаны туралы белгі байқалмайды.

Бұрынғы жағдайлар

Бұл – «Жас Отау» сарайының жаңғырту жұмыстарының алғашқы сәтсіздігі емес. 2023 жылға дейін де басқа компания сенімгерлік басқаруда болған, бірақ міндеттемелерді орындамағаны үшін сот арқылы келісімшарт бұзылған. 2023 жылдың қазан айында нысан қала балансына қайтарылып, 2024 жылы «Jar Jar Almaty» ЖШС-на берілген еді. Сол кезде компания ғимараттың толыққанды той сарайы ретінде жұмыс істейтінін хабарлаған болатын.

Енді әкімдік жаңа басқарушы іздеуге мәжбүр. Оқиғаның дамуын редакция бақылауда болады.