InfoHub Logo

Атырау облысында жол қауіпсіздігін арттыру мақсатында жаңашыл технологиялар қолданысқа енгізілуде. Енді мұндағы автожолдарда жүргізушілерге бағыт-бағдар көрсететін арнайы лазерлік жүйе жұмыс істей бастады. Бұл туралы Өңірлік коммуникациялар қызметі хабарлады.

Бұл жүйе жарық сызықтарын проекциялап, түнде немесе қолайсыз ауа райы жағдайында жолды анық көруге көмектеседі. Ол жолдың жиегін және қозғалыс бағытын айқындап, жүргізушілердің шоғырлануын арттырып, ұйқышылдықты азайтуға септігін тигізеді. Нәтижесінде, жол-көлік оқиғаларының алдын алуға ықпал етеді.

Қазіргі таңда бұл лазерлік арка Атырау облысы аумағынан өтетін KAZ09 «Ақтөбе – Қандыағаш – Доссор – Атырау – РФ шекарасы» республикалық автожолының 480-ші шақырымына орнатылды.

«QazAvtoJol» компаниясының жол қозғалысы қауіпсіздігі және пайдалану бөлімінің бас маманы Әлішер Нұроллаевтың айтуынша, лазер жасыл немесе қызыл түсті жарық сызықтарын шығарады. Бұл технология әсіресе түнде, сондай-ақ тұман, жаңбыр немесе қар жауған кезде жол белгілері нашар көрінетін жағдайларда өте пайдалы. Сонымен қатар, жарықтандыру жүргізушінің зейінін шоғырландырып, шаршауын азайтады.

Мұндай шешімдерді өңірде енгізу Қазақстанның заманауи және қауіпсіз жол инфрақұрылымын дамыту жолындағы маңызды қадам ретінде қарастырылуда.