InfoHub Logo

بۇگىن قازاق كينوسىنداعى ەرەكشە تۇلعالاردىڭ ءبىرى، ءارى پروديۋسەر بايان الاگوزوۆا «قىز جىبەك» فيلمىندەگى باستى ءرولدى سومداعان مەرۋەرت وتەكەشوۆاعا قاتىستى تاعى ءبىر جاڭالىعىمەن ءبولىستى. الاگوزوۆانىڭ ايتۋىنشا، كوپشىلىكتىڭ تالقىسىنا تۇسكەن، اتى اڭىزعا اينالعان قامزول وعان سىيلىق رەتىندە بەرىلگەن.

بۇل تۋرالى Infohub.kz اقپارات اگەنتتىگى حابارلايدى.

قامزولدى مۋزەيگە تاپسىرۋ جوسپارى

پروديۋسەر قامزولدىڭ ءقازىر وزىندە ەكەنىن، ءبىراق الداعى ۋاقىتتا ونى مۋزەيگە تاپسىرۋدى جوسپارلاپ وتىرعانىن ايتتى. الايدا، ازىرگە ونى ساقتاپ، قاجەت كەزدە قولداناتىنىن جەتكىزدى. الاگوزوۆا ءوزىن وسى تۋىندىمەن جانە مەرۋەرت وتەكەشوۆا سومداعان بەينەمەن رۋحاني بايلانىستى سەزىنەتىنىن اتاپ ءوتتى.

مەرۋەرت وتەكەشوۆا – قازاق قىزىنىڭ سيمۆولى

بايان الاگوزوۆا بەلگىلى اكتريساعا العىسىن ءبىلدىرىپ، ونى قازاق ونەرىندەگى ەرەكشە تۇلعا رەتىندە باعالادى. ونىڭ پىكىرىنشە، مەرۋەرت وتەكەشوۆا – قازاق قىزىنىڭ ماڭگىلىك سيمۆولى.

كەلەسى جىلى وتەتىن «قازاق ارۋى» جوباسىنا اكتريسانى ارنايى شاقىرۋ جوسپارى بار ەكەنىن دە ايتتى. سونىمەن قاتار، پروديۋسەر مەرۋەرت وتەكەشوۆاعا ءومىر بويى اي سايىن 1 ميلليون تەڭگە كولەمىندە قارجىلاي قولداۋ كورسەتۋگە دايىن ەكەنىن جەتكىزدى.

مەسەناتتارعا ۇندەۋ

بايان الاگوزوۆا مۇنداي باستامانى جاريا ەتۋ سەبەبىن دە ءتۇسىندىردى. ونىڭ سوزىنشە، كوپتەگەن دارىندى ارتىستەر ۋاقىت وتە كەلە ۇمىت قالىپ جاتادى. وسىعان بايلانىستى ول مەسەناتتاردى ۇلتتىق مادەنيەتكە ۇلەس قوسقان تۇلعالاردى قولداۋعا شاقىردى.

ايتا كەتەيىك، بۇعان دەيىن بايان الاگوزوۆا Instagram جەلىسىندە اتى اڭىزعا اينالعان قامزولدى كورسەتىپ، ونىڭ وزىنە سىي رەتىندە بەرىلگەنىن حابارلاعان ەدى. اتالعان قىزعىلت قامزولدى «قىز جىبەك» فيلمىندە باستى ءرولدى سومداعان مەرۋەرت وتەكەشوۆا كيگەن بولاتىن.