InfoHub Logo

اتىراۋدا ءبىر وتباسىنىڭ ولىمىنە قاتىستى سوت پروسەسىندە ايىپتالۋشى سۇلتان سارسەمالييەۆ 32 جاستاعى قاينىسى ناۋرىز مۇقانعالييەۆ پەن 35 جاستاعى مەيرامگۇلدى قالاي ولتىرگەنىن جان-جاقتى بايانداپ بەردى.

بۇل تۋرالى Infohub.kz اقپارات اگەنتتىگى حابارلايدى.

ناۋرىزدىڭ ءولىمى: قاينىسىنىڭ ايتقاندارى

سارسەمالييەۆتىڭ ايتۋىنشا، ناۋرىز مۇقانعالييەۆ وقيعا كەزىندە بىردەن كوز جۇمباعان. «ومىرىمدە ءبىرىنشى رەت وسىنداي جاعداي بولدى. مەن بۇرىن مال دا سويىپ كورمەگەنمىن»، – دەپ مويىندادى ايىپتالۋشى.

وقيعادان كەيىن شامامەن 15 مينۋت اۋلادا كۇتىپ تۇرعان سارسەمالييەۆ ۇيگە قايتا كىرگەندە، ناۋرىزدىڭ ەدەندە جاتقانىن كورگەن. «مەن ونى ءالى ءتىرى شىعار دەپ ويلادىم. ەگەر امان قالسا، بۇكىل وتباسىما كۇيەۋ بالاسىنىڭ ءوزىن ولتىرمەك بولعانىن ايتىپ بەرەدى دەپ قورىقتىم»، – دەدى ول.

بەس بالانىڭ تاعدىرى

ايىپتالۋشىنىڭ ايتۋىنشا، بولعان وقيعادان كەيىن پوليسيا شاقىرۋدى ويلاعانىمەن، بەس بالاسىنىڭ تاعدىرىن ويلاپ، نە ىستەرىن بىلمەي دال بولعان. «شىنىمدى ايتسام، پوليسيا شاقىرعىم كەلدى. ءبىراق مەنىڭ بەس بالام بار ەدى. ەڭ كىشىسى ول كەزدە ءتورت ايلىق بولاتىن. ايەلىم ولاردى جالعىز قاراي المايدى. سول سەبەپتى نە ىستەرىمدى بىلمەي ۇزاق ويلاندىم»، – دەپ اعىنان جارىلدى سارسەمالييەۆ.

مەيرامگۇلدىڭ ءولىمى: نامىسقا تيگەن سوزدەر

سوتتا ايىپتالۋشى مەيرامگۇلدىڭ ولىمىنە قاتىستى دا ءمان-جايدى باياندادى. ونىڭ سوزىنشە، قىلمىس جاسالعان كەزدە ۇيدە بالالار مەن جۇبايى اقبايان بولعان. قىزىنىڭ اتا-اناسى ولتىرىلگەننەن كەيىن مەيرامگۇلدى جاڭگەلدين اۋىلىنان الىپ كەلىپ، اقبايانعا كومەكتەسىپ، جانىندا بولسىن دەپ ۇيىنە ورنالاستىرعان.

الايدا كەيىن ولاردىڭ اراسىندا جانجال تۋىنداعان. «ول مەنىڭ نامىسىما تيەتىن سوزدەر ايتتى. اناسىنىڭ سوزدەرىن قايتالادى. پسيحولوگيالىق جاعدايىنا بايلانىستى اناسىنىڭ ايتقاندارىن بويىنا ءسىڭىرىپ العان ەدى»، – دەدى ول.

سارسەمالييەۆتىڭ ايتۋىنشا، وسى جانجالدان كەيىن ءوزىن ۇستاي الماي قالعان. «الدىمەن قولتىق تۇسىنان ۇردىم، كەيىن بەتىنەن سوقتىم. اۋزىن جاپقىم كەلدى، سوندىقتان پىشاقپەن بەتىنە ۇرا بەردىم. ول ءتىپتى ايقايلاعان جوق. ول كەزدە ەش وكىنىش بولعان جوق. ءۇش ادامدى ولتىرگەننەن كەيىن ءبارىبىر بولىپ كەتەدى ەكەن»، – دەپ قورقىنىشتى جايتتى اشىق ايتتى ايىپتالۋشى.

ءىس ماتەريالدارىنا سايكەس، مەيرامگۇل ماۇسوت قارابالين مەن ءناسىپ مۇقانعالييەۆانى ولتىرۋگە قولدانىلعان سول پىشاقپەن ولتىرىلگەن.

ءمايىتتى جاسىرۋ ارەكەتى

سارسەمالييەۆتىڭ ايتۋىنشا، قىلمىستان كەيىن مەيرامگۇلدىڭ ءمايىتىن ناۋرىز مۇقانعالييەۆتىڭ دەنەسى جاسىرىلعان جەرگە اپارىپ، سول شۇڭقىرعا ەتپەتىنەن كومىپ تاستاعان.

بۇعان دەيىن سوتتا ايىپتالۋشىنىڭ جۇبايى اقبايان مۇقانعالييەۆانىڭ العاشقى جاۋابىنىڭ بەينەجازباسى كورسەتىلگەن بولاتىن. وندا ايەل بولعان وقيعانى تۇسىنبەيتىنىن ايتقان ەدى.