instagram.com/theaacademybcn
15 جاستاعى قازاقستاندىق تالانت "بارسەلونامەن" كەلىسىمشارتقا وتىردى
15 جاستاعى قازاقستاندىق فۋتبولشى كاريم مەنديكانوۆ يسپانيانىڭ اتاقتى "بارسەلونا" كلۋبىمەن كەلىسىمشارتقا وتىردى. ول كەلەسى ماۋسىمدا كومانداعا قوسىلادى. بۇل تۋرالى العاشقى بولىپ يسپاندىق Mundo Deportivo باسىلىمى حابارلادى.
بۇل تۋرالى Infohub.kz اقپارات اگەنتتىگى حابارلايدى.
مەنديكانوۆ "بارسەلونا" تاريحىنداعى العاشقى قازاقستاندىق ويىنشى اتانادى. قازىرگى تاڭدا جاس فۋتبولشى كاتالونيادا ونەر كورسەتىپ، كومانداعا اۋىسۋعا دايىندالۋدا. يسپانيالىق باسپا ءسوز ونى "قازاقستاندىق بريلليانت" دەپ اتاپ ۇلگەردى.
كاتالون فۋتبولىنا جول
كاريم يسپانياعا 2022 جىلى كوشىپ كەلگەن. سول ۋاقىتتان باستاپ ول كاتالوندىق جاسوسپىرىمدەر فۋتبولى جۇيەسىندە دامىپ كەلەدى. وتكەن ماۋسىمدا ول Cerdanyola كلۋبىندا ونەر كورسەتىپ، ءوز الەۋەتىن تانىتتى. بيىلعى ماۋسىمدا مەنديكانوۆ Sant Cugat FC كلۋبىمەن كەلىسىمشارتقا وتىرىپ، ليگاداعى ەڭ ءقاۋىپتى وڭ قانات شابۋىلشىلارىنىڭ ءبىرى رەتىندە تانىلدى. ونى دريبلينگ شەبەرى جانە چەمپيوناتتىڭ ۇزدىك اسسيستەنتتەرىنىڭ ءبىرى دەپ اتايدى.
ساراپشىلار نەگە نازار اۋداردى؟
كاريم وڭ قانات شابۋىلشىسى پوزيسياسىندا وينايدى. يسپانيالىق باسىلىم ونىڭ ويىن ەرەكشەلىكتەرىن، اتاپ ايتقاندا، جىلدامدىعىن، قارسىلاستارىن بىر-بىردەن الداي ءبىلۋ قابىلەتىن جانە ساتتەر جاساي الۋىن ەرەكشە اتاپ ءوتتى. "يسپانيانىڭ جاستار فۋتبولى حالىقارالىق تالانتتاردى وزىنە تارتا بەرەدى، ال كاريم مەنديكانوۆ ەسىمدەرىنىڭ ءبىرى بولىپ وتىر... بۇل شىنايى گاۋھار، وعان ءاربىر ساتتە قامقورلىق جاسالۋدا"، - دەلىنگەن ماقالادا.
"بارسەلونا" تاڭداۋى
جاس ويىنشىعا يسپانيانىڭ بىرنەشە لا ليگا كلۋبتارى قىزىعۋشىلىق تانىتقانىمەن، فۋتبولشى "بارسەلونانىڭ" ۇسىنىسىن قابىلدادى. باسىلىمنىڭ مالىمەتىنشە، كەلىسىمشارتقا قول قويىلعان، ال مەنديكانوۆ جاڭا جۇيەگە تەزىرەك بەيىمدەلۋ ءۇشىن كوماندامەن بىرگە جاتتىعۋلارعا قاتىسىپ ۇلگەرگەن. بۇل جاتتىعۋلاردىڭ بارلىعى ونىڭ قازىرگى كلۋبى Sant Cugat FC-نىڭ رۇقساتىمەن وتكەن.
ەندىگى جوسپار
مەنديكانوۆتىڭ جازعى كەزەڭدە "بارسەلونا" جۇيەسىنە رەسمي تۇردە قوسىلۋى ونى كلۋب تاريحىنداعى العاشقى قازاقستاندىق ويىنشى ەتەدى. كەلىسىمشارتقا وتىرعانعا دەيىن كاريم ويىن تاجىريبەسىن جيناۋدى جالعاستىرادى. Mundo Deportivo-نىڭ حابارلاۋىنشا، جاقىن ارادا ول ەۋروپاداعى ەڭ بەدەلدى جاستار تۋرنيرلەرىنىڭ ءبىرى بولىپ سانالاتىن MIC (Mediterranean International Cup) تۋرنيرىندە ونەر كورسەتۋى مۇمكىن. باسىلىم سونداي-اق، ويىنشىعا دەگەن جوعارى قىزىعۋشىلىققا جانە ونىڭ قارقىندى دامۋىنا قاراماستان، مەنديكانوۆ ءالى كۇنگە دەيىن قازاقستاننىڭ جاستار نەمەسە ۇلتتىق قۇرامالارىنا شاقىرىلماعانىن اتاپ ءوتتى. ساراپشىلار "بارسەلوناعا" اۋىسۋى ويىنشىعا قوسىمشا نازار اۋداراتىنىن ايتتى.
-
Forecasters predict a significant drop in temperatures across Kazakhstan، with some regions expecting heavy rain and thunderstorms.
-
15-year-old Kazakhstani footballer Karim Mendikanov has signed a contract with the renowned Spanish club FC Barcelona، marking a significant milestone for Kazakhstani football.
