InfoHub Logo

جەر شارى دەموگرافيالىق وزگەرىستەر الدىندا تۇر. بىرىككەن ۇلتتار ۇيىمى ساراپشىلارىنىڭ بولجامى بويىنشا، 2050 جىلعا قاراي جەر حالقى 10 ميللياردقا جۋىقتايدى. بۇل جاھاندىق رەسۋرستارعا، ينفراقۇرىلىمعا جانە دەنساۋلىق ساقتاۋ جۇيەسىنە ۇلكەن قىسىم كورسەتىپ، جاھاندىق داعدارىستارعا اكەلۋى ىقتيمال.

بۇل تۋرالى Infohub.kz اقپارات اگەنتتىگى حابارلايدى.

قازىرگى تاڭدا الەم حالقىنىڭ سانى 8 ميللياردتان اسادى. بۇۇ بولجامى بويىنشا، الداعى 25 جىلدا بۇل كورسەتكىش تاعى 2 ميللياردقا ارتادى. مۇنداي قارقىندى وسىمگە ءومىر ءسۇرۋ ۇزاقتىعىنىڭ ارتۋى، ۋربانيزاسيا جانە كوشى-قوننىڭ كوبەيۋى سياقتى فاكتورلار ىقپال ەتەدى. بۇگىندە ورتاشا ءومىر ءسۇرۋ ۇزاقتىعى 73 جاستى قۇراسا، 25 جىلدان كەيىن ول 77 جاسقا جەتۋى مۇمكىن. بۇل ەگدە جاستاعى ادامداردىڭ سانىنىڭ ەكى ميللياردقا جەتۋىنە اكەلۋى ىقتيمال.

افريكا حالقى 2050 جىلعا دەيىن ەكى ەسە ارتادى

ساراپشىلاردىڭ ايتۋىنشا، الەم حالقىنىڭ كارتاسى تەز وزگەرۋدە. قازىرگى تاڭدا دەموگرافيالىق ءوسىمنىڭ نەگىزگى ۇلەسى تابىسى تومەن ايماقتارعا اۋىسىپ وتىر. بولجام بويىنشا، 2050 جىلعا قاراي افريكا حالقى ەكى ەسە ارتادى. ال الەمدەگى ەڭ كوپ حالىق سانى بار ءۇندىستان مەن جۇڭگو ءارتۇرلى باعىتتا دامۋدا. جۇڭگو حالىق رەسپۋبليكاسىنىڭ حالقى ازايا بەرەتىنى بولجانسا، ءۇندىستان بىرنەشە ونجىلدىق بويى ءوسىمدى كورسەتەدى.

ەۋروپادا حالىق سانىنىڭ ازايۋى

ەۋروپادا كەرىسىنشە ءۇردىس بايقالادى. ساراپشىلاردىڭ بولجامى بويىنشا، 2050 جىلعا قاراي 26 ەلدە حالىق سانى ورتا ەسەپپەن 15%-عا ازايادى. ولاردىڭ قاتارىندا بولگاريا، بوسنيا جانە گەرسەگوۆينا، ۆەنگريا، لاتۆيا، حورۆاتيا بار. قازىرگى تاڭدا ەۋروپا ەلدەرىندەگى تۋۋ كورسەتكىشى ايەل باسىنا شاققاندا 2 بالادان تومەن. ساراپشىلاردىڭ ايتۋىنشا، كوپتەگەن وتباسىلار ءۇشىن بالا تۋۋ – ەلەۋلى قارجىلىق قيىندىققا اينالعان.

شۆەيساريادا حالىق سانىنا شەكتەۋ قويۋ تۋرالى رەفەرەندۋم

شۆەيساريادا حالىق سانىنىڭ ءوسۋىن تەجەۋ ماقساتىندا ناقتى شارالار قابىلدانۋدا. 14 ماۋسىمدا ەلدە جالپىۇلتتىق رەفەرەندۋم وتەدى. تۇرعىندار حالىق سانىن 10 ميلليونمەن شەكتەۋ تۋرالى ۇسىنىس بويىنشا داۋىس بەرەدى. ەگەر حالىق سانى 9،5 ميلليونعا جەتسە، بيلىك ميگراسيالىق ساياساتتى قاتايتىپ، ءتىپتى ەۋروپا وداعىمەن ەركىن ءجۇرۋ تۋرالى كەلىسىمدى بۇزۋعا مىندەتتەلەدى. ازاماتتاردىڭ نارازىلىعىنا جولداردىڭ تولىسۋى، مەكتەپتەردە ورىننىڭ جەتىسپەۋشىلىگى جانە تۇرعىن ءۇي تاپشىلىعى سەبەپ بولعان.

ساراپشىلاردىڭ پىكىرىنشە، پلانەتا حالقىنىڭ ودان ءارى ءوسۋى تابيعي رەسۋرستارعا، ينفراقۇرىلىمعا جانە دەنساۋلىق ساقتاۋ جۇيەسىنە اۋىر سالماق ءتۇسىرىپ، جاھاندىق داعدارىستارعا اكەلۋى مۇمكىن.