InfoHub Logo

الماتىداعى «Jan Production» كينوستۋدياسىنىڭ كەزەكتى سوت وتىرىسىندا جابىرلەنۋشىلەردىڭ وكىلدەرى تانىمال اكتەرلەردى قاماۋعا الۋدى تالاپ ەتتى. اتا-انالار بالالارىنىڭ كينوعا ءتۇسىپ، جۇلدىز اتانادى دەگەن ۇمىتىمەن ستۋدياعا ميلليونداعان تەڭگە بەرىپ، الدانىپ قالعان.

بۇل تۋرالى Infohub.kz اقپارات اگەنتتىگى حابارلايدى.

اكتەرلەردى جاۋاپقا تارتۋ تالابى

جابىرلەنۋشى تاراپتىڭ ۇندەۋىندە جان بايجانبايەۆ، داۋرەن ايدارقۇلوۆ، بەرىك ايتجانوۆ، جاننا قۋانىشيەۆا جانە قۋاندىق شاكىرجانوۆ سىندى تانىمال تۇلعالاردىڭ اتى اتالدى. ولاردىڭ «Jan Production» كينوستۋدياسىنىڭ جارناماسىنا قاتىسىپ، حالىقتى الداۋعا سەبەپكەر بولعانى ايتىلادى.

جابىرلەنۋشىلەردىڭ ادۆوكاتى راۋشان وماروۆانىڭ ايتۋىنشا، ولار بارلىق قاتىسۋشى تۇلعالاردىڭ ىس-ارەكەتتەرىنە قۇقىقتىق باعا بەرىپ، قاماۋدا ۇستاۋ تۇرىندەگى بۇلتارتپاۋ شاراسىن قاراۋدى تالاپ ەتەدى. «بارلىق قاتىسۋشى تۇلعالاردىڭ ىس-ارەكەتتەرىنە قۇقىقتىق باعا بەرۋدى، سونداي-اق ءىستىڭ قاتىسۋشىلارىنا، ونىڭ ىشىندە «Jan Production» قىزمەتىمەن كوپشىلىك الدىندا بايلانىستى تۇلعالارعا قاتىستى قاماۋدا ۇستاۋ تۇرىندەگى بۇلتارتپاۋ شاراسىنا سانكسيا بەرۋ تۋرالى ماسەلەنى قاراۋدى تالاپ ەتەمىز»، - دەدى ادۆوكات.

6 ميلليارد تەڭگە شىعىن

شاعىمدانۋشىلاردىڭ ايتۋىنشا، كەلتىرىلگەن شىعىن 6 ميلليارد تەڭگەدەن اسىپ تۇسكەن. اتا-انالار ستۋديانى جارنامالاپ، جۇرتتى الداعان اكتەرلەر دە جاۋاپسىز قالماۋى كەرەك دەپ سانايدى. ولار ءالى كۇنگە دەيىن قاراجاتتارىن قايتارا الماي ءجۇر.

«Jan Production» باسشىلارىنا قاتىستى قىلمىستىق ءىس قوزعالعان. كومپانيا ىستەرىنە سەندىرۋ ءۇشىن اتا-انالاردان 1،5-2 ميلليون تەڭگە ارالىعىندا اقشا الىپ، كەلىسىمشارت جاسالعان. الايدا، ۋادەلەر ورىندالماعان. جابىرلەنۋشى رەتىندە 130 ادام ارىز جازعان.