InfoHub Logo

قىتايداعى 76 جاستاعى شەن حايلين ەسىمدى ايەلدىڭ تاعدىرى الەمدى تاڭ قالدىردى. ول 60 جاسىندا ەگىز قىزىن ومىرگە اكەلىپ، ەلدەگى ەڭ جاسى ۇلكەن انا اتانعاننان كەيىن، ءومىرىن الەۋمەتتىك جەلىدە ءبولىسىپ، كوپشىلىكتىڭ ىقىلاسىنا بولەندى.

بۇل تۋرالى Infohub.kz اقپارات اگەنتتىگى حابارلايدى.

بالالارىنان ايىرىلۋدان كەيىنگى جاڭا ءومىر

شەن ءحايليننىڭ ءومىرى 2009 جىلى اۋىر قايعىمەن باستالدى. بىردەن-بىر تىرەگى بولعان جالعىز قىزى مەن كۇيەۋ بالاسى كومىرقىشقىل گازىنان ۋلانىپ قايتىس بولدى. بۇل وقيعادان كەيىن ايەل ۇلكەن كۇيزەلىسكە ۇشىرادى. الايدا، ول بەرىلمەدى. قايعىدان ارىلۋ ءۇشىن ەكستراكورپورالدى ۇرىقتاندىرۋ (ەكو) ءادىسىن قولدانىپ، 60 جاسىندا ەگىز قىزدارى چجيچجي مەن حۋەيحۋەيدى دۇنيەگە اكەلدى. بۇل وقيعا ونى قىتايداعى ەڭ جاسى ۇلكەن ەگىزدەردى تۋعان انا رەتىندە تانىتتى.

قيىندىقتارعا تولى جول

جۇكتىلىك كەزىندە شەن حايلين كوپ قيىندىق كوردى. ءىسىنۋ مەن قان كەتۋ سياقتى ماسەلەلەرگە تاپ بولدى. دەگەنمەن، 2010 جىلى ەگىزدەرى امان-ەسەن دۇنيەگە كەلدى. بالالارى ومىرگە كەلگەن سوڭ، وتباسى قارجىلىق قيىندىقتارعا تاپ بولدى. قىزدارىنىڭ ءبىلىمى مەن تاربيەسى ءۇشىن شەن حايلين ەل ءىشىن ارالاپ، دەنساۋلىق پەن دۇرىس تاماقتانۋ تۋرالى دارىستەر وقىپ، تابىس تابا باستادى.

جاڭا ماقسات، جاڭا ءومىر

2016 جىلى كۇيەۋى ينسۋلتكە شالدىعىپ، 2022 جىلى قايتىس بولدى. كەيىننەن ايەل ينۆەستيسيالىق الاياقتىققا ۇشىراپ، كوپ اقشاسىنان ايىرىلدى. وسىنداي اۋىر سىناقتارعا قاراماستان، شەن حايلين ومىرگە دەگەن قۇشتارلىعىن جوعالتپادى. 73 جاسىندا الەۋمەتتىك جەلىدە تىكەلەي ەفيرلەر جۇرگىزە باستادى. وندا ول بالا تاربيەسى، تاماق دايىنداۋ جانە سالاۋاتتى ءومىر سالتى تۋرالى كەڭەستەرىمەن ءبولىسىپ، ۇيگە ارنالعان تاۋارلاردى ساتادى. قازىرگى تاڭدا ونىڭ الەۋمەتتىك جەلىدە شامامەن ءبىر ميلليونعا جۋىق جازىلۋشىسى بار. ول ءوزىنىڭ تاعدىرىمەن كوپتەگەن اتا-انالارعا ۇلگى بولىپ، تاباندىلىقتىڭ سيمۆولىنا اينالدى.