InfoHub Logo

ستەپنوگورسك قالاسىنداعى ق. ساتپايەۆ اتىنداعى №9 ورتا مەكتەپ جاڭا جىل قارساڭىندا ەلەكتروندى دۇكەن ارقىلى 8 ملن تەڭگەگە 32 مىڭ شىرشا ويىنشىعىن، ارتىنشا قىمبات قاعاز بەن تەحنيكا العان. بۇل بيۋدجەت قارجىسىنىڭ ءتيىمدى جۇمسالۋى مەن مەملەكەتتىك ساتىپ الۋ ءتارتىبىنىڭ ساقتالۋىنا قاتىستى سۇراق تۋعىزادى.

بۇل تۋرالى Infohub.kz اقپارات اگەنتتىگى حابارلايدى.

32 مىڭ ويىنشىق قالاي «جيناقتالدى»

2025 جىلدىڭ 8 جەلتوقسانىندا مەكتەپ يپ «يمران ي كو» ارقىلى 8 000 000 تەڭگەگە شارۋاشىلىق تاۋار رەتىندە Kaemingk KA140732 ماركالى شىرشا ويىنشىقتارىنىڭ 2 000 جيىنتىعىن راسىمدەگەن. ءار جيىنتىقتا 16 شاردان — بارلىعى 32 000 دانا.

مەكتەپ باسشىلىعى بۇل كولەمدى «قاتەلىك» دەپ ءتۇسىندىردى. ديرەكتور انار ايتجانوۆانىڭ ايتۋىنشا، بۋحگالتەر وتىنىمدەگى 200 جيىنتىقتىڭ ورنىنا «ءنولدى ارتىق ەنگىزىپ»، 2 000 دەپ جىبەرگەن. بۋحگالتەر اسەمگۇل قاماروۆا جۇمىس جۇكتەمەسىنىڭ تىم جوعارى بولعانىن العا تارتتى.

سالىستىرۋ ءۇشىن: 2025 جاڭا جىلىندا «استانا ارەنا» ماڭىنداعى 25 مەترلىك باس شىرشاعا 3 مىڭنان اسا ويىنشىق تاعىلعان ەدى. №9 مەكتەپتىڭ قورى بۇدان ون ەسە كوپ. ويىنشىقتاردىڭ ءبىر بولىگى قويمادا قوراپپەن تۇرسا دا، كورسەتىلگەن ماركا مەن ساپاعا سايكەستىك تۋرالى سۇراق كوپ.

قاعاز بەن پرينتەر: كولەم مەن باعا

سول كۇنى مەكتەپ سول جەتكىزۋشىدەن ProMEGA Jet A4 80 گ/م² «ينتەنسيۆ جاسىل» ءتۇستى گليانس قاعازىنىڭ 2 000 بۋماسىن (ءار بۋماسى 50 پاراق) 5 400 000 تەڭگەگە العان. بۇل — 110 مىڭ پاراق. بۇعان قوسا، 2025 جىلدىڭ قاراشاسىندا 1 500 بۋمa فوتقاعازعا 4 800 000 تەڭگە جۇمسالعان. مەكتەپ اكىمشىلىگى اق قاعازدىڭ دا جەتكىزىلگەنىن ايتادى، الايدا جىلدىق قاجەتتىلىككە شاققاندا كولەم بىرنەشە ەسە ارتىق.

تەحنيكادا دا الشاقتىق بار. 2024 جىلدىڭ جەلتوقسانىندا 20 پرينتەرگە 5 180 000 تەڭگە ءبولىنىپ، كەلىسىمدە KYOCERA ECOSYS P3150dn كورسەتىلگەن. الايدا كابينەتتەردە HP پرينتەرلەرى تۇرعان. ءبىر قۇرىلعىعا شاققاندا 259 مىڭ تەڭگە شىعادى، بۇل بازالىق HP مودەلدەرىنىڭ نارىقتىق باعاسىنان جوعارى، ءارى تەحنيكالىق سيپاتتاماعا سايكەسسىزدىكتى مەڭزەيدى.

داتا-ورتالىققا لايىق پروسەسسورلار نەگە مەكتەپكە كەرەك؟

2025 جىلى مەكتەپ 10 دانا AMD EPYC 7313 پروسەسسورىن 3 980 000 تەڭگەگە العان (398 مىڭنان). EPYC سەرياسى سەرۆەرلەر مەن داتا-ورتالىقتارعا ارنالعان، قىمبات ينفراقۇرىلىمدى قاجەت ەتەدى. مۇنداي كومپونەنتتەردىڭ وقۋ ورنىنىڭ كۇندەلىكتى مىندەتتەرىنە قانشالىقتى ساي ەكەنى كۇماندى.

قۇرىلىس ماتەريالدارى: جوسپارسىز قور جيناۋ

2024–2025 جىلدارى مەكتەپ 5 000 م² لينولەۋم ساتىپ الىپ، بارلىعى 24،9 ملن تەڭگە جۇمساعان. كەي كەلىسىمدەردە قوسىمشا كەلىسىم ارقىلى 1 000 م²ء-دىڭ قۇنى 900 مىڭ تەڭگەگە قىمباتتاعان. ءبىر مەتردىڭ باعاسى 7 500–8 400 تەڭگە بولىپ شىققان، ال نارىقتا وسى سانات شامامەن 3 700–4 000 تەڭگە.

سونىمەن بىرگە 86 ىشكى ەسىككە (شامامەن 9،5 ملن تگ) جانە 40 پلاستيك تەرەزەگە (شامامەن 10 ملن تگ) كەلىسىم جاسالعان. بۇعان دەيىن 2024 جىلدىڭ قىركۇيەگىندە 110 تەرەزە بلوگى 128 مىڭ تەڭگەدەن الىنعان بولسا، جاڭا كەلىسىمدە ءبىر تەرەزە 249 مىڭعا باعالانعان.

2025 جىلدىڭ قازانىندا 800 دانا (250×120 سم) بيريۋزا ءتۇستى گيپسوكارتونعا 5 900 000 تەڭگە جۇمسالعان. سونىمەن قاتار 3 000 كەلى گرۋنتوۆكا (3 ملن تگ)، شپاتليەۆكا (4،1 ملن تگ) جانە مونتاج كوبىگى (5،5 ملن تگ) الىنعان. اكىمشىلىك مۇنى «اعىمداعى جوندەۋ» دەپ سيپاتتاسا دا، ناقتى جۇمىس جوسپارى مەن كولەمىنىڭ ەسەپ-قيسابى ۇسىنىلمادى.

كابەلگە كەلگەندە دە شامادان تىس ساتىپ الۋ بايقالادى: 50 شاقىرىمنان استام سىمعا جۋىقتاپ 10 ملن تەڭگە جۇمسالعان. مەكتەپ مۇنى بەيناباقىلاۋ جەلىسىمەن تۇسىندىرەدى، الايدا ءۇش قاباتتى عيمارات ءۇشىن بۇل دا ارتىق بولۋى مۇمكىن.

ساندار سويلەيدى: تاۋەكەلدەر مەن سالىستىرۋ

اشىق دەرەكتەرگە سۇيەنسەك، №9 مەكتەپتە 2025 جىلى تاۋار تۇرىندەگى مەملەكەتتىك ساتىپ الۋ سوماسى شامامەن 130،5 ملن تەڭگەنى قۇراعان. بۇل №8 مەكتەپتەگى 29،7 ملن جانە №7 مەكتەپتەگى 27،6 ملن تەڭگەدەن بىرنەشە ەسە كوپ. 2024 جىلى بۇل كورسەتكىش 231،2 ملن تەڭگەگە جەتكەن.

كەلىسىمدەردىڭ نەگىزگى بولىگى Omarket ەلەكتروندى دۇكەنى ارقىلى، ياعني تىكەلەي جەتكىزۋشىمەن جاسالعان: 2025 جىلى 130،5 ملن تەڭگەنىڭ 128،4 ملن تەڭگەسى وسى ارنامەن وتكەن.

مەملەكەتتىك ساتىپ الۋ ساراپشىسى ساميرا تايتەنوۆا: «قاعاز، ورگتەحنيكا سەكىلدى تاۋارلار، ادەتتە، باعا ۇسىنىمىن سۇراتۋ ارقىلى باسەكەلى جولمەن الىنۋى ءتيىس. ەرەكشە جاعدايدا عانا ءبىر كوزدەن رۇقسات. ەلەكتروندى دۇكەندى كەڭ قولدانۋ كونكۋرستىق راسىمدەردى اينالىپ ءوتۋ تاۋەكەلىن ارتتىرادى»، — دەپ باعالادى.

جاڭا جەتكىزۋشى — بىردەن 8 كەلىسىم

يپ «يمران ي كو» 2025 جىلدىڭ 13 قاراشاسىندا تىركەلىپ، 24 قاراشادا مەملەكەتتىك ساتىپ الۋ پورتالىنا قوسىلعان. 8–11 جەلتوقسان ارالىعىندا ءدال وسى مەكتەپپەن ەلەكتروندى دۇكەندە بىردەن 8 كەلىسىم جاساسىپ، جيىنتىعى 41 ملن تەڭگەدەن استام سومانى قۇراعان. كەي اكتىلەر كەلىسىممەن ءبىر كۇندە، ءتىپتى جۇمىس ۋاقىتى اياقتالعاننان كەيىن راسىمدەلگەنى كورىنەدى — بۇل قۇجات اينالىمىنىڭ فورمالدى جۇرگەنىن مەڭزەيدى.

مەكتەپ نە دەيدى، باقىلاۋ قاشان بولادى؟

ديرەكتور انار ايتجانوۆا قاعاز تۇتىنۋى كوپ ەكەنىن ايتىپ، «ءار كابينەتتە مۇعالىمدەرگە ارنالعان پرينتەر بار، سۇرالعانىن بەرەمىز» دەدى. سونىمەن بىرگە ول «مەملەكەتتىك ساتىپ الۋ — ءالسىز تۇسىم» ەكەنىن مويىنداپ، بۋحگالتەرلىك قاتەلەر بولعانىن جەتكىزدى.

ستەپنوگورسك قالالىق ءبىلىم ءبولىمى باسشىسى التىن وسپانوۆا اقپاراتقا وراي ديرەكتور مەن بۋحگالتەرگە تارتىپتىك شارا قولدانىلعانىن، 5 قاڭتاردان قىزمەتتىك تەكسەرىس باستالاتىنىن حابارلادى. ناتيجەسىندە كورسەتىلگەن كولەمدەر مەن ساپانىڭ شىن سايكەستىگى، سونداي-اق راسىمدەردىڭ زاڭعا سايكەستىگى انىقتالۋى ءتيىس.

ماسەلەنىڭ وزەگى — بيۋدجەت قارجىسىنىڭ اشىق ءارى ءتيىمدى جۇمسالۋى. ۇكىمەتتىك اۋديت پەن ازاماتتىق باقىلاۋ ناقتى دەرەكتەرمەن كۇشەيگەندە عانا كۇماندى تاجىريبەلەرگە توسقاۋىل قويىلادى.