InfoHub Logo

بەلگىلى ءانشى ساكەن قالىموۆ ءوزىنىڭ جەكە ءومىرى مەن وتباسىلىق قارىم-قاتىناستارى تۋرالى بۇرىن ەستىلمەگەن مالىمەتتەردى ءبولىستى. ونەر يەسى جاستىق شاقتاعى قاتەلىكتەرى مەن وتباسىنىڭ ءقادىرىن كەش تۇسىنگەنىن مويىنداپ، بۇگىنگى ومىرىنە شۇكىرشىلىك ەتەتىنىن جەتكىزدى.

بۇل تۋرالى Infohub.kz اقپارات اگەنتتىگى حابارلايدى.

وكىنىشتى ءومىر جولدارى

«1001» باعدارلاماسىنا بەرگەن سۇحباتىندا ساكەن قالىموۆ ءوزىنىڭ جاستىق شاقتاعى ءومىر سالتى تۋرالى اشىق ايتتى. ول كەزدەگى ورتاسى مەن سەرىلىككە ۇلاسقان ءومىردىڭ وتباسى قۇندىلىقتارىن باعالاۋعا مۇمكىندىك بەرمەگەنىن مويىندادى. ءانشىنىڭ ايتۋىنشا، ەڭ وكىنىشتىسى – جارى مەن بالاسىنىڭ ءقادىرىن بىلمەي، اجىراسۋى.

«قازىرگى تاڭدا مەن ناماز وقىپ، ءدىن جولىندا ءجۇرمىن. بۇرىنعى قاتەلىكتەرىمدى اللانىڭ سىناعى دەپ بىلەمىن. ءوزىمدى كىنالىمىن دەپ ەسەپتەيمىن، ەشكىمگە سىلتاۋ ايتپايمىن. ورتامىز سولاي بولدى، ازاننان كەشكە دەيىن قولىمىزدا ستاكان بولدى. سول كەزدە وتباسىما كوڭىل بولە المادىم»، – دەدى ءانشى.

ۇلىمەن قارىم-قاتىناس ۇزىلگەن

ساكەن قالىموۆ قازىرگى ۋاقىتتا ۇلىمەن ارادا بايلانىس جوق ەكەنىن دە جاسىرمادى. دەگەنمەن، ول ۇلىنىڭ رەنىشىن تۇسىنەتىنىن جانە كەلەشەكتە كەشىرىم سۇراپ، جاقىنداسۋعا ۇمىتتەنەتىنىن ءبىلدىردى.

«ازىرگە ۇلىممەن مۇلدەم بايلانىس جوق. ولاردىڭ وكپەسىن تۇسىنەمىن، رەنجىمەيمىن. ءبىر كۇنى كەزدەسىپ، كەشىرىم سۇراپ، كوڭىلدەرىن اۋلاپ قالارمىن دەگەن سەنىمدەمىن. ءبىرىنشى ايەلىمنەن ۇلىم، ەكىنشى ايەلىمنەن قىزىم بار. قىزىممەن ارالاسىپ تۇرامىز»، – دەپ قوستى ءانشى.

بۇعان دەيىن ءانشىنىڭ وتكەن ومىرىندەگى قاتەلىكتەرى مەن بۇرىنعى جۇبايى مەن بالاسىنىڭ الدىنداعى وكىنىشىن جاسىرماعانى تۋرالى دا جازىلعان بولاتىن.