اجە، كەلدىڭ بە؟
اسەمنىڭ وكپەسى قارا قازانداي. اۋىلدا تۇراتىن اجەسىنە كوكەسى «انە اپارام، مىنە اپارام» دەگەلى تالاي بولدى. نەگە ايتقانىن ورىندامايدى؟ ۋادە بەرمەگەندە، ءبۇيتىپ مازاسىزدانباس ەدى. الگىندە دالاعا شاقىرعان قۇربىلارى ديانا مەن ديناعا دا ەرگەن جوق. جايشىلىقتا ويناۋدان استە جالىقپايتىن قىزىنىڭ بۇل توسىن قىلىعىنا شەشەسى دە اڭ-تاڭ.
ول تورگى بولمەدەگى تەرەزەدەن كوشەگە كوز جىبەردى. ءۇشىنشى قاباتتاعى بۇلاردىڭ پاتەرىنەن اۋلا ءىشى تەگىس كورىنەدى. اۋلادا ءقازىر قايناعان تىرشىلىك. بالالار اتكەنشەككە وتىرىپ، جۇگىرىپ، سەكىرىپ، ءبىرىن-بىرى قۋىپ ءماز. بەلەسەبەت ۇيرەنىپ ءجۇر-اۋ شاماسى، اناۋ ءبىر قىز قالت-قۇلت ەتىپ تەۋىپ باردى دا، قۇلاپ كالدى.
اسەمگە بۇل كورىنىس تە اسەر ەتپەدى. اجەسىن قاتتى ساعىنعانى سونشالىق، ءقازىر اۋىلعا ءجۇرىپ كەتكىسى بار. ءبىراق قالاي؟ ءتاتتى قيالىن اياق تىقىرى ءبولىپ جىبەردى. شەشەسى ەكەن.
— قىزىم-اۋ، ءبىر جەرىڭ اۋىرىپ تۇرعان جوق پا؟ دالاعا شىقپادىڭ با؟
— شىققىم كەلمەيدى.
— ءىشىڭ پىسپاي ما؟
— جوق...
— قاباعىڭ كەلىسپەي تۇر.
— جاي...
— مەن دۇكەنگە بارىپ كەلە قويايىن. الدا-جالدا دالاعا شىققىڭ كەلسە، بىلەسىڭ عوي ەسىكتى قالاي جابۋدى؟.. كوپ اينالماسپىن.
اسەم ۇيدە قالدى. كوكەسى جۇمىستا. قاس قارايىپ، قاراڭعىلىق تۇسكەندە ءبىر-اق كەلەدى. ال وزىنەن ۇلكەن اعاسى ەركىن لاگەردە دەمالۋدا. شەشەسىنڭ «دۇكەنگە بارىپ كەلە قويايىن» دەگەنى جاي ءسوز.
بىلەدى عوي ماماسىن. كورشى مايرا تاتەنىڭ سوزىمەن ايتقاندا، شەشەسى «قىدىرىمپاز». ەندەشە ەكى-ۇش ساعاتسىز ورالا قويماس ۇيگە.
اسەم ەسىكتى جاۋىپ، تىسقا شىقتى. ەشقايدا مويىن بۇرماستان تۇپ-تۋرا ءۇي ىرگەسىندەگى ايالداماعا كەلدى. ماندايشاسىندا «5» دەگەن جازۋى بار تروللەيبۋس تە كەلە قالعانى. وتىرىپ اۆتوۆوكزالعا جەتتى.
اۆتوۆوكزال. ارى-بەرى قايشىلاسقان جۇرت. سابىلعان جولاۋشىلار. سومكە كوتەرىپ، قولاربا سۇيرەگەن ادامدار. اراسىندا بىرەن-ساران بالالار دا بار. اسەم ەس بىلگەلى اكە-شەشەسىنە ەرىپ تالاي رەت اۋىلعا ساپار شەككەن.
سوندا قاراعاشقا جۇرەتىن اۆتوبۋستىڭ اناۋ شەتكى پلاتفورمادان اتتاناتىنىن كورگەن. دىتتەگەن جەردى جاڭىلماي تاپتى. ۇلكەن قىزىل «يكارۋس» اۆتوبۋس جۇرگەلى تۇر. جولاۋشىلار تۇگەلىمەن وتىرىپ بولعان سىڭايلى.
قولىندا قاعاز-قالامى بار الدىڭعى ەسىكتەن تۇسكەن ءبىر تاتە:
— قايدا باراسىڭ، بالاقاي؟ — دەدى جىلى ۇشىراپ.
— اۋىلعا، اجەمە...
— اجەڭ قايدا تۇرادى؟
— الىستا.
— الىستا بولعاندا، اۋىلدىڭ اتى بار ما؟
— قاراعاش.
— ءا! جۇرە عوي، قىزىم... ول جاققا ءبىر ساعاتتان كەيىن اۆتوبۋس قاتىنايدى.
بەيتانىس تاتە اسەمدى اۆتوۆوكزالداعى بولمەسىنە الىپ كەلدى. ءاتى-جونىن، نەشە جاستا ەكەندىگىن سۇرادى. اسەم قايدا، قاي قاباتتا، ءتىپتى قاي پودەزدە تۇراتىنىن دا تاقىلداپ ايتىپ بەردى. سودان سوڭ بەيتانىس تاتە ءبىر جەرگە تەلەفون شالىپ سويلەستى. كوپ ۇزاماي بولمەگە ەكى ميليسيونەر كىردى. اسەم تىكسىنىپ قالدى. سەبەبى، تۋرا وسى فورماداعى قىزىل جاعالى كىسىلەر، ىلعي اراق ءىشىپ، ماس بولىپ جۇرەتىن، كورشى پودەزدەگى ءبىر اعايدىڭ قولىن ارتىنا قايىرىپ، ماشيناعا وتىرعىزىپ اكەتكەنىن كورگەن بولاتىن.
— كىشكەنتاي جولاۋشى قايدا؟ — دەدى ميليسيونەردىڭ بىرەۋى.
اسەمنىڭ قۇلاعى ەلەڭ ەتتى.
— ە، مىندا وتىر ەكەن عوي...
— مەن سىزدەردى تانىمايمىن، — دەدى اسەم قورقىڭقىراپ. — اجەمە بارا جاتىرمىن.
— اسەم، اقىلدى بالاسىڭ عوي. بارا عوي اعالارىڭمەن. سەنى اجەڭە جەتكىزىپ سالادى، — دەدى بەيتانىس تاتە. سەنبەيىن دەسە، ءوتىنىپ تۇر. «الداي قويماس».
بۇل كەزدە اۋىلدان كەلگەن اسەمنىڭ اجەسى نەمەرەسىن ۇي-ىشىنە تۇگەلىمەن ىزدەتتىرىپ، جان بىتكەندى قۋىرىپ جاتقان. ەكى ميليسيونەرگە ەرىپ كەلگەن اسەم اڭىرىپ تۇر. ۇرەي مەن ساعىنىش قاباتتاسقان بالانىڭ كوزىنەن ءمولدىر مونشاقتار ءۇزىلىپ-ۇزىلىپ ءتۇستى.
You Might Also Like
-
جاس كەلىنشەك ءبىر اۋىلعا قىدىرىپ بارعاندا، نە ەسىك كورۋگە شاقىرعاندا ايەلدەر نە ۇلكەن اجەلەر وعان «يتاياعىنا سال» دەپ ساقينا، كۇمىس، جۇزىك سياقتى زات بەرەدى. «يتاياعىنا سالۋ» د...
-
كۇرەڭ كۇز. كۇن جەلكەم. ىمىرت قويۋلانىپ، قاراڭعىلىق تۇسكەن. سەكپىل بەت سارى ۇل سەلك ەتتى. الدا قاراڭداپ الدەكىم كورىندى. بۇل كوشەنىڭ بالالارى باسقا جاقتىڭ ۇلدارىن جولىقتىرسا، الىمجەتتىك جاساپ، سەبەپس...
