InfoHub Logo

اجىراسقاننان كەيىن ەكس-جۇبايىنىڭ بانك شوتتارى مەن ونداعى وپەراسيالار تۋرالى اقپارات العىسى كەلگەن ايەلدىڭ ءوتىنىشىن قازاقستاننىڭ كونستيتۋسيالىق سوتى قارادى. بۇل جاعداي بانك قۇپياسى تۋرالى زاڭنىڭ نورماسىن تالقىلاۋعا سەبەپ بولدى.

بۇل تۋرالى Infohub.kz اقپارات اگەنتتىگى حابارلايدى.

بانكتەر اقپارات بەرۋدەن باس تارتتى

ايەل نەكەسى بۇزىلعاننان كەيىن بۇرىنعى كۇيەۋىنىڭ بانكتە ەسەپشوتتارى بار-جوعىن جانە ولارمەن قانداي وپەراسيالار جۇرگىزىلگەنىن بىلگىسى كەلگەن. الايدا، ەكىنشى دەڭگەيلى بانكتەر بانك قۇپياسىنا سىلتەمە جاساپ، مۇنداي مالىمەتتەردى بەرۋدەن باس تارتتى.

كەيىننەن ايەل سوت ارقىلى اقپارات الۋعا تىرىستى. ءبىراق ءبىرىنشى ينستانسيا سوتى دا تالاپ ارىزدى قاناعاتتاندىرۋدان باس تارتتى. سوت، ەگەر شوت يەسىنىڭ كەلىسىمى نەمەسە زاڭدى نەگىزدەر بولماسا، بانكتەر مۇنداي مالىمەتتەردى ءۇشىنشى تۇلعالارعا جاريالاي المايتىنىن اتاپ ءوتتى.

تالاپكەردىڭ پىكىرىنشە، زاڭنىڭ بۇل تارماعى ونىڭ قۇقىقتارىن بۇزادى. ول وسى سەبەپتى ءوزىنىڭ مۇلىكتىك مۇددەلەرىن تولىق قورعاي المايتىنىن جانە بىرلەسىپ جيناعان مۇلىككە قۇقىعىن جۇزەگە اسىرا المايتىنىن ايتتى.

جەكە ءومىر قۇقىعى

كونستيتۋسيالىق سوت ءوتىنىشتى قاراپ، ءاربىر ادامنىڭ جەكە ءومىر قۇپياسىن ساقتاۋ، سونداي-اق جەكە سالىمدارى مەن بانك جيناقتارىن قورعاۋ قۇقىعى بار ەكەنىن اتاپ ءوتتى. سوت بانك قۇپياسىنىڭ دەربەس كونستيتۋسيالىق قۇقىق ەكەنىن جانە وتباسىلىق جاعدايىنا قاراماستان بارلىق ازاماتتارعا قولدانىلاتىنىن باسا ايتتى. ەرلى-زايىپتىلاردىڭ مۇلىكتىك ماسەلەلەردەگى تەڭدىگى، بىرەۋىنىڭ زاڭدى نەگىزدەرسىز ەكىنشىسىنىڭ شوتتارى تۋرالى قۇپيا اقپارات الا الاتىنىن بىلدىرمەيتىنىن ءتۇسىندىردى.

قانداي جاعدايدا اقپارات بەرىلۋى مۇمكىن؟

سونىمەن قاتار، سوت زاڭنامادا جۇبايلاردىڭ مۇلىكتىك قۇقىقتارىن قورعاۋعا مۇمكىندىك بەرەتىن تەتىكتەر قاراستىرىلعانىن كورسەتتى. مىسالى، سوت ءىسىن قاراۋ كەزىندە قاجەت بولسا، سوتتار بانك مالىمەتتەرىن سۇراتا الادى.

قورىتىندىلاي كەلە، كونستيتۋسيالىق سوت زاڭنىڭ اتالعان نورماسى كونستيتۋسياعا سايكەس كەلەتىنىن جانە ازاماتتاردىڭ قۇقىقتارىن بۇزبايتىنىن انىقتادى.