InfoHub Logo

كەڭەس وداعى باتىرىنىڭ ۇلى اناتوليي بيريۋكوۆ ءبىر كەزدەرى ماسكەۋ مەن چەحوۆ قالالارىنىڭ تۇرعىندارىن ۇرەيدە ۇستاعان قىلمىسكەر رەتىندە تاريحتا قالدى. كەيىن "بالالار اڭشىسى" دەگەن لاقاپ اتقا يە بولعان ول قىسقا ۋاقىت ىشىندە بىرنەشە ءسابيدىڭ ءومىرىن قيدى. قىلمىسكەردى ىزدەۋگە ماسكەۋ پوليسياسىنىڭ ۇلكەن كۇشى جۇمىلدىرىلدى.

بۇل تۋرالى Infohub.kz اقپارات اگەنتتىگى حابارلايدى.

بالالىق شاقتاعى جاراقات تاعدىرىن وزگەرتتى

اناتوليي بيريۋكوۆ 1939 جىلى ماسكەۋ وبلىسىنداعى چەحوۆ قالاسىندا دۇنيەگە كەلگەن. ونىڭ اكەسى نيكولاي بيريۋكوۆ ۇلى وتان سوعىسىنىڭ ارداگەرى، گەنەرال-لەيتەنانت ءارى كەڭەس وداعىنىڭ باتىرى بولعان. اكەسى ۇلىنا قاتال تارتىپپەن تاربيە بەرىپ، بولاشاعىنان ۇلكەن ءۇمىت كۇتكەن ەدى.

الايدا، سەگىز جاسىندا اكەسىنىڭ پاتروندارىن بولشەكتەمەك بولعان كەزدە بولعان جارىلىس ءاناتولييدىڭ تاعدىرىن تۇبەگەيلى وزگەرتتى. ول اۋىر جاراقات الىپ، بەتىندە ءومىر بويى كەتپەيتىن تىرتىق قالدى. كەيىن بۇل تىرتىقتى ول ادامدارعا قايناعان سۋدان كۇيىپ قالعانىنان دەپ ءتۇسىندىرىپ ءجۇردى.

تۇيىقتىق پەن قىلمىسقا اپارار جول

وسى وقيعادان كەيىن اينالاسىنداعىلاردىڭ مازاعى كوبەيىپ، اناتوليي تۇيىق بولىپ، ادامدارمەن ارالاسۋدان قاشقاقتاپ، ءوز الەمىنە جابىلىپ قالدى. دەگەنمەن، مەكتەپتە جاقسى وقىپ، مۇعالىمدەرىنىڭ ماقتاۋىنا يە بولدى. اكەسىنىڭ اسكەري جولىن جالعاستىرماي، سلەسار ماماندىعىن تاڭداپ، قۇرىلىس سالاسىندا ەڭبەك ەتتى، وتباسىن قۇرىپ، ەكى قىزدىڭ اكەسى اتاندى.

ءقاۋىپتى ارەكەتتەردىڭ باستالۋى

بيريۋكوۆتىڭ بالالارعا قاتىستى العاشقى ءقاۋىپتى ارەكەتتەرى 1971 جىلى بايقالا باستادى. سول كەزدە ول بالالار ەمحاناسىنىڭ جانىندا تۇرعان اربامەن بىرگە ءسابيدى الىپ كەتۋگە ارەكەتتەندى. اناسى دەر كەزىندە بايقاپ، كومەك سۇراعاننان كەيىن ەر ادام ۇستالدى. الايدا، ول بۇل ارەكەتىن "قاراۋسىز قالعان بالاعا ساباق بولسىن دەپ جاسادىم" دەپ ءتۇسىندىرىپ، پوليسەيلەردى سەندىرىپ، بوساپ كەتتى.

ءبىر جىلدان كەيىن ول تاعى دا بالانى ۇرلاماق بولعان كەزدە قولعا تۇسكەن. كەي دەرەكتەردە ءۇش جىلعا سوتتالعانى ايتىلسا، باسقا مالىمەتتەردە جازادان قۇتىلىپ كەتكەنى كورسەتىلەدى. وسى وقيعادان كەيىن ايەلى ونىمەن اجىراسىپ كەتتى.

ماسكەۋدى دۇرلىكتىرگەن قىلمىستار

1977 جىلدىڭ كۇزىندە ماسكەۋدە جانتۇرشىگەرلىك قىلمىستار تىزبەگى باستالدى. العاشقى قۇربانداردىڭ ءبىرى ءۇش ايلىق ءسابي بولدى. قىلمىسكەر بالانى قاراۋسىز تۇرعان اربادان الىپ كەتىپ، كەيىن ونى ءولتىرىپ تاستادى. اراعا بىرنەشە كۇن سالىپ تاعى ءبىر ءسابي جوعالدى، ءبىر ايدان كەيىن ونىڭ دەنەسى تابىلدى. تەرگەۋشىلەر ەكى وقيعانىڭ دا ءبىر ادامنىڭ قولىمەن جاسالعانىن تۇسىنگەنىمەن، ناقتى كۇدىكتىنى بىردەن انىقتاي المادى.

كەيىن تاعى ءبىر بالا ۇرلانىپ، كوپ ۇزاماي ءولى كۇيىندە تابىلدى. وسىدان كەيىن ماسكەۋدە اتا-انالار بالالارىن قاراۋسىز قالدىرۋدان قورقىپ، قالا تۇرعىندارى اراسىندا ۇرەي كۇشەيدى.

ىزدەۋ مەن تۇتقىنداۋ

پوليسيا كۇدىكتىنىڭ فوتوروبوتىن جاساپ، ىزدەۋ جۇمىستارىن كۇشەيتتى. مۇنى سەزگەن بيريۋكوۆ قىلمىستارىن تۋعان جەرى چەحوۆتا جالعاستىرۋعا تىرىستى. وندا دا ەكى ءسابي جوعالىپ، كەيىن ءولى كۇيىندە تابىلعان.

1977 جىلدىڭ 21 قازانىندا ول تاعى ءبىر بالانى الىپ قاشپاق بولعان كەزدە اناسى بايقاپ قالىپ، ايعاي كوتەردى. قۋعىننان قۇتىلۋ ءۇشىن بيريۋكوۆ ءسابيدى جەرگە تاستاپ، قاشىپ كەتتى. ابىروي بولعاندا، بالا امان قالدى. ال كۋاگەرلەر قىلمىسكەردىڭ ءتۇرىن انىق كورىپ ۇلگەرگەن.

وسى وقيعادان كەيىن جاسالعان فوتوروبوت تەرگەۋشىلەردى ناقتى كۇدىكتىگە الىپ كەلدى. كوپ ۇزاماي پوليسيا بيريۋكوۆ جۇمىس ىستەيتىن قۇرىلىس مەكەمەسىنە بارىپ، ونىڭ جەكە باسىن انىقتادى. قىلمىسكەر سول كۇنى ءوز ۇيىندە ۇستالدى.

سوت جانە جازا

تەرگەۋ كەزىندە اناتوليي بيريۋكوۆ بەس ءسابيدى ولتىرگەنىن مويىنداپ، جاساعان قىلمىستارىن ەگجەي-تەگجەيلى ايتىپ بەردى. العاشىندا بيريۋكوۆ اكەسى ءوزىن قۇتقارىپ قالادى دەپ سەنگەن. گەنەرال نيكولاي بيريۋكوۆ تا باستاپقىدا ۇلىنىڭ مۇنداي اۋىر قىلمىسقا بارعانىنا سەنگىسى كەلمەي، وعان تاجىريبەلى ادۆوكات جالداعان. ءبىراق سوت بارىسىندا دالەلدەر تولىق راستالعاننان كەيىن گەنەرال كوپشىلىك الدىندا ۇلىنان باس تارتتى.

سوت-پسيحياتريالىق ساراپتاما اناتوليي بيريۋكوۆتى ەسى دۇرىس دەپ تانىدى. سوت ونى ءولىم جازاسىنا كەستى. قىلمىسكەر بىرنەشە رەت وز-وزىنە قول جۇمساماق بولعانىمەن، ارەكەتتەرى ءساتسىز اياقتالدى. كەيىن ءتۇرلى ورگاندارعا كەشىرىم سۇراپ ءوتىنىش جازعان، ءبىراق ءبارى قاناعاتتاندىرىلمادى.

اناتوليي بيريۋكوۆ 1979 جىلدىڭ 24 اقپانىندا اتىلدى. ول 40 جاسقا تولعاننان كەيىن كوپ ۇزاماي ءولىم جازاسىنا كەسىلگەن.