InfoHub Logo

ءقازىر الەمدە گەوساياسي تۇراقسىزدىق كۇشەيىپ، كوپتەگەن ەلدەر ىشكى نارىعىنا عانا سۇيەنۋگە ءماجبۇر بولىپ وتىر. ساۋدا سوعىستارى، سانكسيالار، لوگيستيكالىق تىزبەكتەردىڭ ءۇزىلۋى — بۇل جاعدايلار جاھاندىق ەكونوميكاعا ەلەۋلى سوققى بەرىپ، ءبىرقاتار ەلدەردىڭ "جابىق رەجيمگە" كوشۋىنە الىپ كەلدى. الايدا قازاقستان بۇل باعىتتى ەمەس، اشىقتىق پەن سەرىكتەستىككە نەگىزدەلگەن پراگماتيكالىق ساياساتتى تاڭدادى. بۇل — ۋاقىت تالابىنا ساي ءارى دۇرىس شەشىم.

بۇل جايىندا قازپوشتا باسشىسى اسەل جاناسوۆا دا پىكىر ءبىلدىرىپ، ەلىمىزدىڭ تۇراقتىلىعى ءدال وسى اشىق ساياساتقا سۇيەنەتىنىن ايتتى. ونىڭ ايتۋىنشا، قازاقستاننىڭ گەوگرافيالىق ورنالاسۋى — باستى ارتىقشىلىقتاردىڭ ءبىرى. ەۋرازيانىڭ قاق ورتاسىندا ورنالاسقان ەل جۇڭگو مەن ەۋروپا اراسىنداعى "التىن كوپىرگە" اينالۋعا قاۋقارلى. بۇل تەك ترانزيتتىك الەۋەت ەمەس، لوگيستيكالىق حاب رەتىندە جاڭا دەڭگەيگە كوتەرىلۋ مۇمكىندىگى.

كولىك دالىزدەرىن دامىتۋ — جۇك تاسىمالىمەن عانا شەكتەلمەيدى. بۇل جاڭا جۇمىس ورىندارى، ينۆەستيسيا اعىنى، ايماقارالىق جانە حالىقارالىق بايلانىستاردىڭ نىعايۋى دەگەن ءسوز. بۇگىندە ترانسكاسپيي حالىقارالىق كولىك مارشرۋتى ارقىلى ەلىمىز ءىرى جوبالاردى جۇزەگە اسىرۋدا. بۇل قازاقستاننىڭ ستراتەگيالىق بولاشاعىن ايقىندايتىن ماڭىزدى باعىتتاردىڭ ءبىرى.

الەم جابىلىپ جاتقاندا، قازاقستان كەرىسىنشە ديالوگ پەن ارىپتەستىككە جول اشىپ وتىر. بۇل شەتەلدىك ينۆەستورلارعا: «قازاقستانعا سەنۋگە بولادى، مۇندا تۇراقتىلىق پەن اشىقتىق بار» دەگەن ناقتى بەلگى. اسەل جاناسوۆانىڭ وي-پىكىرى ەل پرەزيدەنتىنىڭ باعىتىمەن ۇندەس: قازاقستان ايماقتىق بايلانىستاردى دامىتىپ، حالىقارالىق بيزنەسكە سەنىمدى سەرىكتەس بولۋعا ۇمتىلىپ كەلەدى.

باستى مىندەت — وسى باعىتتان تايماي، اشىقتىقتى ەلدىڭ باستى ارتىقشىلىعىنا اينالدىرۋ.

ايبار ولجايەۆ