InfoHub Logo

الماتى قالاسى بوستاندىق اۋدانىنىڭ تۇرعىنى الەۋمەتتىك جەلىدە اكىمدىكتىڭ قوقىس ماسەلەسىن شەشۋدە جاساندى ينتەللەكت (جي) قولدانعانىن مالىمدەپ، اكىمدىكتىڭ جاۋابىن جاريالادى. بۇل تۋرالى Tengri Life حابارلايدى.

تۇرعىننىڭ ايتۋىنشا، №125 مەكتەپ ماڭىنداعى قوقىس ماسەلەسى بۇرىننان بار. ول بۇل تۋرالى اۋدان اكىمدىگىن بەلگىلەپ، سۋرەتتەرىن جاريالاعان. الايدا، اكىمدىكتەن كەلگەن جاۋاپ ونى تاڭعالدىرعان.

«بوستاندىق اۋداندىق اكىمدىگى مەنىڭ قوقىسى بار سۋرەتتەرىمدى الىپ، جي ارقىلى قوقىستى جويىپ، ۇيالماي جاۋاپ بەرىپتى. كۇلكىلى!» — دەپ جازدى اۆتور Threads جەلىسىندە.

جاريالانعان پوست بىرنەشە ساعات ىشىندە 100 مىڭعا جۋىق قارالىم جيناپ، جەلى قولدانۋشىلارىنىڭ قىزۋ تالقىلاۋىنا اينالدى. كوپشىلىگى اكىمدىكتىڭ ارەكەتىن سىناپ، «قازىرگى زامانعى ماسەلەلەردى شەشۋدىڭ زاماناۋي جولدارى»، «قوقىستى سۋرەتتە ەمەس، ناقتى جەردە تازالاۋ كەرەكتىگىن ايتپاعان شىعارسىز» دەگەن سياقتى پىكىرلەر قالدىردى.

جەلىدەگىلەر «بۇرىن» جانە «كەيىن» دەگەن سۋرەتتەردەگى راكۋرستىڭ، كولەڭكە مەن جارىقتىڭ بىردەي ەكەنىن بايقاپ، اكىمدىكتىڭ جي قولدانعانىنا سەنىمدى بولدى. كەيبىر قولدانۋشىلاردىڭ ايتۋىنشا، الەۋمەتتىك جەلى سۋرەتتى جي ارقىلى وڭدەلگەنىن نەمەسە جاسالعانىن بەلگىلەپ تە قويعان.

بۇل جاعداي بويىنشا الماتى قالاسى اكىمدىگىنەن تۇسىنىكتەمە الۋعا تىرىستىق، الايدا جاريالانىم ساتىنە دەيىن جاۋاپ الا المادىق.