InfoHub Logo

الماتى اۋەجايىنداعى تۇراق اقىسى ءۇشىن 130 مىڭ تەڭگەگە جۋىق سوما تولەۋگە ءماجبۇر بولعان قازاقستاندىق ايەلدىڭ وقيعاسى الەۋمەتتىك جەلىدە تالقىعا ءتۇستى. كەيىننەن اۋەجاي اكىمشىلىگى بۇل سومانى جويدى.

بۇل تۋرالى Infohub.kz اقپارات اگەنتتىگى حابارلايدى.

تۇراق جۇيەسىندەگى قاتەلىك

وقيعا 5 اقپاندا بولعان. ايەل الەۋمەتتىك جەلىدەگى پاراقشاسىندا اپكەسىن استاناعا ۇشاققا شىعارىپ سالىپ كەلگەنىن ايتقان. اۋەجاي اۋماعىنان شىعار كەزدە شلاگباۋم اشىق تۇرعاندىقتان، ول تۇراق اقىسىن تولەۋدىڭ قاجەتى جوق دەپ ويلاعان.

«كەيىننەن تولەۋ تۋرالى ويلامادىق تا، اشىق تۇردى عوي. ال ەندى مىنە، 130 مىڭ تەڭگەگە جۋىق ايىپپۇل. ونى داۋلاۋعا نەمەسە ازايتۋعا بولا ما؟» دەپ جازدى ول جازباسىندا.

اۋەجاي اكىمشىلىگىنىڭ جاۋابى

الماتى حالىقارالىق اۋەجايىنىڭ باسپا ءسوز قىزمەتى حابارلاعانداي، تەكسەرۋ قورىتىندىسى بويىنشا، ەسەپتەلگەن سوما جويىلىپ، تۇراق سەسسياسى جابىلدى.

اۋەجاي اكىمشىلىگى بۇل سومانىڭ ايىپپۇل ەمەس، تەك تۇراق كەڭىستىگىن پايدالانعانى ءۇشىن تولەنەتىن اقى ەكەنىن ناقتىلادى. بۇل سوما اۆتوكولىكتىڭ تۇراق اۋماعىندا بولعان بارلىق ۋاقىتى ءۇشىن جۇيە ارقىلى اۆتوماتتى تۇردە ەسەپتەلەدى.

سونىمەن قاتار، اۋەجاي اۋماعىندا قازىرگى ۋاقىتتا رەكونسترۋكسيالىق جۇمىستار ءجۇرىپ جاتقانىن، بۇل تۇراق جۇيەسىنىڭ دۇرىس جۇمىس ىستەۋىنە ۋاقىتشا اسەر ەتۋى مۇمكىن ەكەنىن اتاپ ءوتتى.

مۇنداي وتىنىشتەر جەدەل قاراستىرىلادى. تەحنيكالىق قاتەلىك راستالعان جاعدايدا، ەسەپتەۋلەر جويىلادى.

تۇراققا قاتىستى سۇراقتار بويىنشا كەلۋشىلەر پوستتارداعى كەزەكشى وپەراتورلارعا حابارلاسا الادى نەمەسە تۇراق وپەراتورىنا +7 777 009 9068 تەلەفونى ارقىلى حابارلاسۋعا بولادى. بايلانىس اقپاراتى تۇراق اۋماعىنداعى اقپاراتتىق باننەرلەردە دە ورنالاستىرىلعان.

قازاقستانداعى تۇراق ەرەجەلەرى

ەستەرىڭىزگە سالا كەتەيىك، قازاقستاندا تۇراق ەرەجەلەرىن بۇزعانى ءۇشىن ايىپپۇلدار قاراستىرىلعان. 2026 جىلدان باستاپ ايلىق ەسەپتىك كورسەتكىشتىڭ (اەك) 4 325 تەڭگەگە دەيىن وسۋىنە بايلانىستى ولاردىڭ مولشەرى ارتتى. ستاندارتتى ەرەجە بۇزۋشىلىق ءۇشىن 5 اەك – 21 625 تەڭگە، ال اۋىر بۇزۋشىلىقتار ءۇشىن 10 اەك – 43 250 تەڭگە ايىپپۇل سالىنادى. اقىلى تۇراق ءۇشىن تولەماقىدان جالتارعانى ءۇشىن 1 اەك – 4 325 تەڭگە، ال ءبىر جىل ىشىندە قايتالانعان بۇزۋشىلىق ءۇشىن 2 اەك – 8 650 تەڭگە ايىپپۇل قاراستىرىلعان.