InfoHub Logo

بۇگىن الماتى قالاسىندا تۇرعىنداردى تاڭ قالدىرعان تابيعات قۇبىلىسى بولدى. كەنەتتەن سوققان قاتتى جەل قالانى قالىڭ بۇلتتارعا وراپ، كەيبىر تۇرعىنداردى الاڭداتتى. بۇل تۋرالى قالا تۇرعىندارى الەۋمەتتىك جەلىلەردە جارىسا جازدى.

بۇل تۋرالى Infohub.kz اقپارات اگەنتتىگى حابارلايدى.

تۇرعىنداردىڭ ايتۋىنشا، جەل كۇرت كۇشەيىپ، قالا اسپانى تەز قاراڭعىلانىپ كەتكەن. كەيبىر كۋاگەرلەر جەلدىڭ ەكپىنى سونشالىقتى قاتتى بولعانىن، ءتىپتى ۇيلەردىڭ شاتىرلارى مەن تەرەزەلەرىنىڭ دىرىلدەگەنىن ايتادى.

جەلدىڭ سەبەبى نە؟

الەۋمەتتىك جەلىدەگى جازبالارعا قاراعاندا، جەلمەن بىرگە تومەندە ورنالاسقان، اسپاندى تۇتاسىمەن جاپقان بۇلتتار پايدا بولعان. ساراپشىلار مۇنى «داۋىلدى جاعا» نەمەسە «ۆال بۇلتى» دەپ اتايدى ەكەن. بۇل – نايزاعايلى فرونتتىڭ الدىڭعى جاعىندا پايدا بولاتىن، اينالمالى سيليندرگە نەمەسە قۇبىرعا ۇقسايتىن، كولدەنەڭ بۇلت تىزبەگى. مۇنداي بۇلتتار ادەتتە قاتتى جەلمەن بىرگە جۇرەدى.

ءبىر تۇرعىن Threads جەلىسىندە بىلاي دەپ جازدى: «تاڭنان بەرى ەرەكشە تابيعات قۇبىلىسىن بايقادىق – داۋىلدى جاعا، نەمەسە ۆال بۇلتى ەكەنىن ChatGPT ايتتى. جىلى اۋانىڭ (سموگتىڭ) وسى بۇلتپەن جوعارى قاراي جينالىپ جاتقانىن كورۋگە بولادى. دەمەك، الماتى تاعى بىرنەشە كۇن تازا اۋامەن دەم الادى».

باسقا قالالارداعى جاعداي

جەل تەك الماتىدا عانا ەمەس، باسقا قالالاردا دا سەزىلگەن. مىسالى، شىمكەنتتە تۇندە قاتتى جەل مەن نايزاعاي بولعانى تۋرالى حابارلاندى. بىشكەكتە دە جەلدىڭ ەكپىنى بايقالعان.

جامبىل وبلىسىندا جەلدىڭ ەكپىنى سەكۋندىنا 30 مەترگە دەيىن جەتكەن. وبلىس اكىمدىگىنىڭ مالىمەتىنشە، 7 ەلدى مەكەندەگى 25 نىساننىڭ شاتىرى زاقىمدالعان. 13 ەلدى مەكەندە ەلەكتر قۋاتىمەن، 3 ەلدى مەكەندە گازبەن جابدىقتاۋدا ۇزىلىستەر بولعان. قازىرگى ۋاقىتتا كوممۋنالدىق قىزمەتتەر كۇشەيتىلگەن رەجيمدە جۇمىس ىستەپ جاتىر. قۇرباندار مەن زارداپ شەككەندەر جوق.

قازگيدرومەت الماتىعا تەك تۇمان بولاتىنىن ەسكەرتكەنىمەن، الماتىداعى جاعداي مۇلدەم باسقاشا بولدى.