InfoHub Logo

الماتىداعى №7 قالالىق كلينيكالىق اۋرۋحانانىڭ ەمحاناسىندا دۇنيەجۇزىلىك اۋىز قۋىسى دەنساۋلىعى كۇنىنە وراي ماڭىزدى شارا ۇيىمداستىرىلدى. بۇل تۋرالى Infohub.kz اقپارات اگەنتتىگى حابارلايدى.

اكسيانى دارىگەر-ستوماتولوگ ارايلىم ابۋسەيىتوۆا وتكىزدى. «بولاشاققا ساۋ تىسپەن» اتتى شارا اياسىندا تىركەلگەن تۇرعىندارعا اۋىز قۋىسىن كۇتۋ ەرەجەلەرى تۋرالى اقپاراتتىق ماتەريالدار تاراتىلدى.

ءتىس تازالاۋدىڭ دۇرىس ادىستەرى مەن پروفيلاكتيكا

شارادا ءتىس تازالاۋدىڭ دۇرىس تەحنيكاسىنا، گيگيەنالىق راسىمدەردىڭ تۇراقتىلىعىنا، سونداي-اق ءتىس جەگى مەن قىزىل يەك اۋرۋلارىنىڭ الدىن الۋعا ەرەكشە نازار اۋدارىلدى.

ماماندار ءتىستى كۇنىنە ەكى رەت – تاڭەرتەڭ اس ىشكەننەن كەيىن جانە كەشكە ۇيىقتار الدىندا، كەم دەگەندە 2-3 مينۋت ۋاقىت ءبولىپ تازالاۋ كەرەكتىگىن ەسكە سالدى. بارلىق ءتىس بەتتەرىن، ءتىلدى تازالاۋ، ءتىس ءجىبىن قولدانۋ جانە ءتىس ششەتكاسىن ءار ءۇش اي سايىن اۋىستىرۋ ماڭىزدى ەكەنى ايتىلدى.

بالالارعا ارنالعان ەرەكشە كەڭەستەر

بالaلار ءۇشىن بۇل ۇسىنىستار ويىن تۇرىندە بەرىلدى. ولارعا ءتىس ششەتكاسىن 45 گرادۋس بۇرىشپەن ۇستاۋ ەرەجەسى دە ۇيرەتىلدى.

دەنى ساۋ ءتىس ءۇشىن ديەتا مەن كۇتىم

سونىمەن قاتار، تۇرعىندارعا ءتاتتىنى شەكتەۋ، راسيونعا كوبىرەك كوكونىس پەن ءسۇت ونىمدەرىن قوسۋ، ءار تاماقتان كەيىن اۋىزدى شايۋ ۇسىنىلدى.

مەديسينا قىزمەتكەرلەرى مۇنداي اكسيالاردىڭ دەنساۋلىق مادەنيەتىن قالىپتاستىرۋعا جانە ستوماتولوگيالىق اۋرۋلاردىڭ الدىن الۋدىڭ ماڭىزدىلىعى تۋرالى حالىقتىڭ حاباردارلىعىن ارتتىرۋعا ىقپال ەتەتىنىن اتاپ ءوتتى.