InfoHub Logo

الماتىدا ەسىرتكى بيزنەسىنە جاستاردى تارتۋدىڭ جاڭا ادىستەرى انىقتالدى. پوليسيا مالىمەتىنشە، ەسىرتكىنى «قولدان-قولعا» ساتۋ ءادىسى ازايىپ، ونىڭ ورنىنا «زاكلادكا» جانە جاسىرىن ينتەرنەت ارقىلى ساتۋ ادىستەرى كوبەيگەن.

بۇل تۋرالى Infohub.kz اقپارات اگەنتتىگى حابارلايدى.

الماتىدا قانشا كامەلەتكە تولماعان «زاكلادچيكتەر» ۇستالدى

بيىل الماتىدا ەسىرتكى بيزنەسىنە جاستاردىڭ تارتىلۋى ايتارلىقتاي ارتقان. قىلمىستىق كودەكستىڭ 297-بابى («ەسىرتكى زاتتارىن ساتۋ») بويىنشا جىل باسىنان بەرى 158 فاكتى تىركەلگەن. وتكەن جىلدىڭ وسى كەزەڭىندە بۇل كورسەتكىش 132 بولعان.

2026 جىلى ەسىرتكى «سالۋشى» رەتىندە التى ءجاسوسپىرىم ۇستالدى، ال وتكەن جىلى ولاردىڭ سانى تورتەۋ ەدى.

ەسىرتكى بيزنەسىمەن اينالىسقان التى ءجاسوسپىرىمنىڭ ۇشەۋى الماتىدا وقيدى. قالعاندارى الماتى وبلىسىنان كەلگەن ەكى مەكتەپ وقۋشىسى مەن ءبىر كوللەدج ستۋدەنتى. ولار قالا سىرتىندا ءبىلىم العانىمەن، قىلمىس جاساۋ ءۇشىن الماتىعا كەلگەن.

ۇستالعانداردىڭ ەڭ كىشىسى – 16 جاستاعى 10-سىنىپ وقۋشىسى. اتالعان التى قىلمىستىق ءىس بويىنشا تەرگەۋ جالعاسۋدا. كۇدىكتىلەرگە 10 جىلعا دەيىن باس بوستاندىعىنان ايىرۋ جازاسى كەسىلۋى مۇمكىن.

Instagram ارقىلى «زاكلادچيكتەردى» ۆەربوۆكالاۋ

پوليسيا مالىمەتىنشە، ەسىرتكى ساتۋشىلار جاستاردى ەسىرتكى بيزنەسىنە تارتۋ ءۇشىن Telegram-بوتتار مەن QR-كودتاردان بولەك، Instagram-داعى تارگەتتەلگەن جارنامانى دا قولدانا باستاعان. بۇل جارنامالار الەۋمەتتىك جەلىدە جەڭىل اقشا تاپقىسى كەلەتىن جاستارعا باعىتتالادى.

قازىرگى ۋاقىتتا قازاقستان بويىنشا «كيبەرنادزور» جۇيەسى ارقىلى 500-گە جۋىق ەسىرتكىگە قاتىستى سايت پەن پاراقشا بۇعاتتالدى.

الماتىنىڭ ءقاۋىپتى ايماقتارى

ەسىرتكىنى جارنامالاۋعا قاتىستى 299-باپ بويىنشا الماتىدا 4 قىلمىستىق ءىس قوزعالعان. ەسىرتكى جارنامالارى كوبىنەسە بەينەباقىلاۋ كامەرالارى از ورنالاسقان، تىنىش اۋدانداردا كەزدەسەدى. پوليسيانىڭ ايتۋىنشا، ەڭ كوپ تارالعان ايماقتار – اۋەزوۆ، تۇركسىب جانە بوستاندىق اۋداندارىنىڭ كەيبىر بولىكتەرى.

قازىرگى تاڭدا جاستار اراسىندا سينتەتيكالىق ەسىرتكى مەن پسيحواكتيۆتى زاتتار كەڭ تارالعان. ولاردىڭ ەڭ ءقاۋىپتىسى – ءبىرىنشى قولدانىستان-اق تاۋەلدىلىك تۋدىراتىن سينتەتيكالىق ەسىرتكىلەر.

بالاڭىزدىڭ «زاكلادچيك» ەكەنىن قالاي انىقتاۋعا بولادى؟

اتا-انالار ءۇشىن بالانىڭ مىنەز-قۇلقىنداعى كۇرت وزگەرىستەر – اگرەسسيا، مازاسىزدىق، اپاتيا، قىمبات زاتتاردىڭ پايدا بولۋى جانە ءجيى تۇندە سەرۋەندەۋى – نازار اۋدارۋعا تۇرارلىق بەلگىلەر. ەگەر بالا تۇندە ءجيى جوعالىپ كەتىپ، قايدا باراتىنىن ناقتى تۇسىندىرە الماسا، بۇل اتا-انالارعا ەسكەرتۋ بولۋى ءتيىس.