InfoHub Logo

الماتىدا اۋا رايى كۇرت جىلىنىپ، +15-20 گرادۋسقا جەتسە دە، پاتەرلەردەگى جىلۋدى وشىرمەگەنىنە قالا تۇرعىندارى نارازىلىق بىلدىرۋدە. الەۋمەتتىك جەلىلەردە ادامدار بۇل ماسەلەگە قاتىستى ءجيى شاعىمدانىپ، جازعىتۇرعىننىڭ ىستىعىندا پاتەردەگى قىزۋ باتارەيالارعا توزۋگە ءماجبۇر ەكەنىن ايتۋدا.

بۇل تۋرالى Infohub.kz اقپارات اگەنتتىگى حابارلايدى.

جىلۋ بەرۋ ماۋسىمىن اياقتاۋ ەرەجەلەرى

قازاقستان رەسپۋبليكاسىنىڭ زاڭناماسىنا سايكەس، جىلىتۋ ماۋسىمىنىڭ اياقتالۋ مەرزىمى ناقتى بەلگىلەنگەن. الماتى وبلىستىق ءماسليحاتىنىڭ 2024 جىلعى 15 قازانداعى № 27-145 شەشىمى بويىنشا، جىلۋ بەرۋدى توقتاتۋ تەك اۋا رايىنىڭ كورسەتكىشتەرىنە نەگىزدەلەدى. ەگەر بەس كۇن قاتارىنان ورتاشا تاۋلىكتىك اۋا تەمپەراتۋراسى +10 گرادۋسقا جەتىپ، سونداي دەڭگەيدە تۇراقتى ساقتالسا، وندا جىلۋ بەرۋ ماۋسىمى اياقتالادى.

اتالعان شارتتار ورىندالعاننان كەيىن عانا جەرگىلىكتى اتقارۋشى ورگان رەسمي تۇردە جىلۋ بەرۋدى توقتاتۋ تۋرالى شەشىم قابىلدايدى. جىلۋدى ءوشىرۋ كەزەڭ-كەزەڭىمەن جۇزەگە اسىرىلادى: الدىمەن اكىمشىلىك عيماراتتار، سودان كەيىن تۇرعىن ۇيلەر، جانە تەك سوڭىندا مەكتەپ، بالاباقشا، اۋرۋحانا سياقتى الەۋمەتتىك نىساندار جىلۋدان اجىراتىلادى.

رەسمي جاۋاپ

الماتى قالاسى اكىمدىگىنىڭ مالىمەتىنشە، جىلۋ بەرۋ ماۋسىمىنىڭ ناقتى اياقتالاتىن كۇنى قوسىمشا حابارلاناتىن بولادى. بۇل شەشىم اۋا رايىنىڭ بولجامى مەن ورتاشا تەمپەراتۋرانىڭ كورسەتكىشتەرىنە بايلانىستى قابىلدانادى.