InfoHub Logo

الماتىدا ال-فارابي داڭعىلىندا ءۇش ادامنىڭ ءومىرىن قيعان جول اپاتىنا كىنالى Zeekr كولىگىنىڭ جۇرگىزۋشىسى تەرگەۋ يزولياتورىنا جىبەرىلدى. بۇعان دەيىن ول اۋرۋحانادا جاتقان بولاتىن.

بۇل تۋرالى Infohub.kz اقپارات اگەنتتىگى حابارلايدى.

وقيعانىڭ ءمان-جايى

جول اپاتىنا سەبەپكەر بولعان Zeekr اۆتوكولىگىنىڭ جۇرگىزۋشىسى ءقازىر تەرگەۋ يزولياتورىندا. ول بۇعان دەيىن پوليسيانىڭ باقىلاۋىمەن مەديسينالىق مەكەمەدە ەم قابىلداپ جاتقان. سوت سانكسياسىمەن وعان قاتىستى قاماۋعا الۋ بۇلتارتپاۋ شاراسى تاڭدالعان.

پوليسيانىڭ حابارلاۋىنشا، كۇدىكتى تەرگەۋ اياقتالعانشا قاماۋدا بولادى.

اپاتتىڭ حرونولوگياسى

ناۋرىزدىڭ 21-ىنە قاراعان ءتۇنى ال-فارابي داڭعىلى مەن مەندىقۇلوۆ كوشەسىنىڭ قيىلىسىندا Zeekr كولىگى قارسى جولاققا شىعىپ، Mercedes اۆتوكولىگىمەن سوقتىعىسقان. سالدارىنان 29 جاستاعى Mercedes جۇرگىزۋشىسى مەن 20 جانە 22 جاستاعى ەكى جولاۋشى وقيعا ورنىندا كوز جۇمدى.

Zeekr كولىگىنىڭ جۇرگىزۋشىسى امان قالدى، ءبىراق جاراقات العاندىقتان اۋرۋحاناعا جاتقىزىلدى. ءساۋىردىڭ 26-سىندا تەرگەۋ سوتى ونى قاماۋعا الدى. اپات كەزىندە جۇرگىزۋشىنىڭ جەڭىل دارەجەدەگى الكوگولدىك ماساڭ كۇيدە بولعانى انىقتالدى.

كۇدىكتىگە قىلمىستىق كودەكستىڭ 345-بابى 4-بولىگى بويىنشا، ياعني «ابايسىزدا ەكى جانە ودان دا كوپ ادامنىڭ ولىمىنە اكەپ سوقتىرعان جول ءجۇرىسى قاعيدالارىن بۇزۋ» بابىمەن قىلمىستىق ءىس قوزعالدى. بۇل باپ بويىنشا 10 جىلعا دەيىن باس بوستاندىعىنان ايىرۋ جازاسى قاراستىرىلعان.

الەۋمەتتىك جەلىدەگى نۇسقالار

الەۋمەتتىك جەلىدە اپاتقا سەبەپ بولعان جاعدايلاردىڭ ءبىرى رەتىندە پوليسيا قىزمەتكەرىنىڭ قاتىسۋىمەن بولعان كوشەدەگى جارىس بولۋى مۇمكىن دەگەن نۇسقالار پايدا بولدى. بۇل ماسەلە بويىنشا تەكسەرۋلەر مەن قىزمەتتىك تەرگەۋلەر باستالدى. ىشكى ىستەر مينيسترلىگى الماتى قالالىق پوليسيا دەپارتامەنتىنىڭ ءبىرقاتار باسشىلارىن قىزمەتىنەن بوساتتى.

شەنەۋنىكتەردىڭ جاۋابى

وسى جاعدايدان كەيىن ءساۋىردىڭ 26-سىندا ىشكى ىستەر مينيسترلىگى مالىمدەمە جاسادى. مينيسترلىكتىڭ حابارلاۋىنشا، ىشكى ىستەر ءمينيسترى ەرجان سادەنوۆتىڭ بۇيرىعىمەن الماتى قالالىق پوليسيا دەپارتامەنتى باستىعىنىڭ سىرتقى قىزمەتتەر مەن جول قاۋىپسىزدىگىنە جاۋاپتى ورىنباسارى، سونداي-اق اكىمشىلىك پوليسيا جانە قوعامدىق قاۋىپسىزدىك باسقارمالارىنىڭ باسشىلارى قىزمەتىنەن بوساتىلدى.

ءىىم تەرگەۋ تۋرالى جاڭا مالىمەتتەردى دە جاريالادى.

«پوليسيا دەپارتامەنتى باسشىلارىنىڭ ءبىرىنىڭ جۇرگىزۋشىسىنىڭ ارەكەتسىزدىگى فاكتىسى بويىنشا قىلمىستىق ءىس قوزعالدى. ول ۋاقىتشا ۇستاۋ يزولياتورىنا قامالدى. قىزمەتتىك تەكسەرۋ مەن قىلمىستىق ىستەر اياسىندا بارلىق ءمان-جايلار، سونىڭ ىشىندە بۇقارالىق اقپارات قۇرالدارىندا تاراعان اقپاراتتار دا مۇقيات تەكسەرىلەتىن بولادى»، - دەدى ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ.