InfoHub Logo

الماتىداعى ءال-فارابي داڭعىلىندا بولعان، ءۇش ادامنىڭ ءومىرىن قيعان جول اپاتى قوعامدا قىزۋ تالقىلانۋدا. بۇل وقيعاعا قاتىستى الەۋمەتتىك جەلىلەردە مارقۇمداردىڭ جاقىندارىنان جازىلعان ەموسيونالدى حابارلامالار پايدا بولدى. ولار ءادىل تەرگەۋ مەن اشىق سوت پروسەسىن تالاپ ەتۋدە.

بۇل تۋرالى Infohub.kz اقپارات اگەنتتىگى حابارلايدى.

قايتىس بولعانداردىڭ دوستارىنىڭ ءبىرىنىڭ ايتۋىنشا، ولار ادىلدىك ءۇشىن كۇرەسەدى. «مەنىڭ قۇرمانىم ءومىردى سۇيەتىن ەدى... ول مەيىرىمدى، ادال، ءارقاشان كۇلىپ جۇرەتىن. بۇگىن ءبىز ونىڭ جەرلەۋىندە جۇزدەگەن ادامداردىڭ اراسىندا تۇردىق – ونىڭ ەندى جوق ەكەنىنە سەنە المادىق. ونى قايتارا المايمىز. تەك ەستەلىكتەر قالدى... ءبىراق ءبىز ءبىر نارسەنى انىق بىلەمىز: ءبىز ادىلدىككە قول جەتكىزەمىز. كىنالىلەر زاڭ بويىنشا جاۋاپ بەرۋى ءتيىس»، - دەپ جازدى ول.

جەلى قولدانۋشىلارى دا كوڭىل ايتىپ، جاريا سوت پروسەسىن تالاپ ەتۋدە. كەيبىر پىكىرلەردە «بيشىمبايەۆتىكى سياقتى اشىق سوت بولسىن» دەگەن تىلەكتەر ايتىلعان.

اپات تۋرالى نە بەلگىلى؟

الماتى قالالىق پوليسيا دەپارتامەنتىنىڭ مالىمەتىنشە، اپات 21 ناۋرىزعا قاراعان ءتۇنى ءال-فارابي داڭعىلى مەن مەڭدىقۇلوۆ كوشەسىنىڭ قيىلىسىندا بولعان. باتىس باعىتتا كەلە جاتقان Zeekr اۆتوكولىگىنىڭ جۇرگىزۋشىسى قارسى بەتكە شىعىپ، قاراما-قارسى باعىتتا كەلە جاتقان Mercedes كولىگىمەن سوقتىعىسقان.

اپات سالدارىنان Mercedes كولىگىنىڭ جۇرگىزۋشىسى مەن ەكى جولاۋشىسى وقيعا ورنىندا كوز جۇمدى. ال Zeekr اۆتوكولىگىنىڭ جۇرگىزۋشىسى ءتۇرلى جاراقاتتارمەن اۋرۋحاناعا جەتكىزىلدى. قازىرگى تاڭدا اتالعان دەرەك بويىنشا قىلمىستىق ءىس قوزعالىپ، سوتقا دەيىنگى تەرگەۋ امالدارى جۇرگىزىلۋدە.

قوعامنىڭ رەاكسياسى

بۇل تراگەديا جۇرتشىلىقتىڭ كەڭىنەن قولداۋىنا يە بولدى. الەۋمەتتىك جەلىلەردەگى قولدانۋشىلار اشىق تەرگەۋ مەن كىنالىلەردى جازالاۋدى تالاپ ەتۋدە.