InfoHub Logo

الماتىداعى DoubleTree by Hilton ءقوناقۇيىنىڭ يەلىگىنە قاتىستى داۋ جاڭا سيپات الدى. كاسىپكەر شولپان قارانەيەۆا نىساننىڭ وزىنەن زاڭسىز تارتىپ الىنعانىن ايتىپ، قۇقىعىن قالپىنا كەلتىرۋگە تىرىسۋدا. وقيعانىڭ استارىندا ءقوناقۇيدى مەملەكەت مەنشىگىنە وتكىزۋ كەزىندە ورىن الۋى مۇمكىن زاڭسىزدىقتار جاتىر.

بۇل تۋرالى Infohub.kz اقپارات اگەنتتىگى حابارلايدى.

ماسەلەنىڭ ءمان-جايىنا سۇيەنسەك، كاسىپكەر بۇعان دەيىن DoubleTree by Hilton Almaty ءقوناقۇيىن بانك نەسيەسىنە سالىپ، Hilton فرانشيزاسىن ساتىپ العان بولاتىن. الايدا پاندەميا كەزىندە ءقوناقۇي جۇمىسى توقتاپ، قارجىلىق قيىندىقتار تۋىنداعان. كەيىن بانك ليسەنزياسىنان ايىرىلىپ، قارىزداردى ءوندىرۋ پروسەسىنە كوللەكتورلىق اگەنتتىك ارالاسقان.

قۇنى ميللياردتاعان نىسان ارزانعا ساتىلعان

كەيىننەن قۇنى 9 ميلليارد تەڭگەدەن اساتىن ءقوناقۇي الدەقايدا ارزان باعاعا ساتىلىپ كەتكەنى ايتىلادى. باسىلىم دەرەگىنشە، نىسان كەيىن قايرات ساتىبالدىعا قاتىسى بار كومپانيالاردىڭ باقىلاۋىنا وتكەن. كوللەكتورلىق اگەنتتىك ءقوناقۇي مۇلكىن وتە تومەن باعالاپ، ونى Baidala V كومپانياسىنا وتكىزگەن. بۇل كومپانيا كەيىن نىساندى قايرات ساتىبالدىنىڭ يەلىگىنە راسىمدەگەن. ودان كەيىن ءقوناقۇي مەملەكەتكە “قايتارىلعان اكتيۆتەردىڭ” قاتارىنا ەنگەن.

زاڭسىزدىق پەن رەيدەرلىك ايىپتارى

الايدا، كاسىپكەر شولپان قارانەيەۆا مەن ونىڭ ادۆوكاتتارى بۇل پروسەستىڭ ءبارى زاڭسىز جۇرگىزىلگەنىن مالىمدەپ وتىر. ولار ءقوناقۇي رەيدەرلىك جولمەن تارتىپ الىنعان دەپ سانايدى. بۇل بويىنشا قىلمىستىق ءىس تە قوزعالعان، ءبىراق 11 اي تەرگەلگەن ءىس كۇتپەگەن جەردەن توقتاتىلعان.

ءقوناقۇي مۇلكىن باعالاعان ساراپشىنىڭ نەبارى بىرنەشە كۇن ىشىندە 400 بەتتىك ەسەپ دايىنداعانى جانە نىساننىڭ توزۋ دەڭگەيى ناقتى قۇجاتسىز، “كوزبەن شامالاپ” انىقتالعانى داۋ تۋدىرۋدا.

Hilton برەندىنىڭ تاعدىرى

داۋدىڭ تاعى ءبىر قىرى – Hilton برەندىنە قاتىستى. كاسىپكەر ادۆوكاتتارىنىڭ ايتۋىنشا، حالىقارالىق Hilton اتاۋىن پايدالانۋ قۇقىعى ءالى دە زاڭدى فرانشيزا يەسىندە قالۋى ءتيىس. ءقوناقۇي مەملەكەتكە برەندپەن بىرگە بەرىلگەندەي كورسەتىلگەنىمەن، مۇنداي قۇقىقتى ەشكىم زاڭدى تۇردە وتكىزە الماعان.

Exclusive.kz بۇل وقيعانى “ەسكى قازاقستاننىڭ” ادىستەرى ءالى دە جويىلماعانىنىڭ بەلگىسى رەتىندە باعالاپ وتىر. بيزنەسكە قىسىم كورسەتۋ، مۇلىكتى كۇماندى جولمەن قايتا ءبولۋ جانە قىلمىستىق ىستەردىڭ اياقسىز قالۋى قوعامدا كوپتەگەن سۇراقتار تۋعىزۋدا.